AQSh prezıdenti Donald Tramp Vashıngton 11 maýsym keshinde Iranǵa qýatty soqqy jasaıtynyn málimdedi.
«Amerıka Qurama Shtattary búgin keshke Iranǵa óte kúshti soqqy jasaıdy», dep jazdy Tramp Truth Social áleýmettik jelisinde.
Ýaqyt aıyrmashylyǵyna baılanysty Qazaqstanda bul 12 maýsymnyń tańǵy ýaqytyna sáıkes keledi.
Osy jazbasynda Tramp Iran qarýly kúshteriniń jaǵdaıyna da toqtaldy. Onyń aıtýynsha, Irannyń áskerı-teńiz jáne áskerı-áýe kúshteri, radarlary, áýe qorǵanysy júıeleri jáne ózge de qorǵanys quraldary, sondaı-aq eldiń shabýyldaý áleýetiniń basym bóligi «qazirdiń ózinde joıylǵan».
Budan bólek, AQSh prezıdenti jýyq arada Irannyń munaı ınfraqurylymy men munaı-gaz naryǵyn baqylaýǵa alatynyn aıtty.
«Jaqyn bolashaqta biz Hark aralyn jáne munaı ınfraqurylymynyń basqa da nysandaryn baqylaýǵa alamyz, sondaı-aq Irannyń munaı-gaz naryǵyna tolyq baqylaý ornatamyz. Biz muny Venesýelada qalaı júzege asyrsaq, dál solaı jasaımyz. Bul Venesýela úshin de, AQSh úshin de óte tıimdi jumys istep jatyr», dep jazdy Tramp.
AQSh pen Iran arasynda sáýir aıynda jasalǵan bitim týraly kelisimge qaramastan shıelenis áli jalǵasyp otyr. Keıinirek Tegeran Izraıldiń Lıvanǵa shabýyldaryn jalǵastyrýy jaǵdaıynda kelisimnen shyǵýy múmkin ekenin eskertken. Odan keıin taraptar qaıtadan ózara soqqylarmen almasa bastady.
