Eki eldiń ýnıversıtetteri arasynda ǵylymı izdenisti ushtastyryp, bilim jáne ǵylymı zertteý resýrstaryn damytýǵa baǵyttalǵan ýaǵdalastyq aıasynda Oralǵa Beıjiń orman sharýashylyǵy ýnıversıtetiniń qaýymdastyrylǵan professory Sınhý Sın jumys saparymen keldi. Ǵalym batysqazaqstandyq áriptesterimen halyqaralyq deńgeıde baılanys ornatyp, birlese ǵylymı zertteý júrgizýge, tájirıbe almasyp, taǵylymdama uıymdastyrýǵa múddeli ekenin aıtady. Qytaı professory Batys Qazaqstan agrarlyq-tehnıkalyq ýnıversıtetiniń zerthanalaryn aralap, oqý ornynyń ǵylymı áleýetimen de tanysty.
Qytaılyq ǵalymdy ýnıversıtet rektory Asqar Námetov, ǵylym jónindegi prorektor Áljan Shámshidin, Ǵylym jáne tehnologııalardy kommersııalandyrý departamentiniń dırektory Indıra Beıshova qabyldap, halyqaralyq yntymaqtastyq boıynsha is-sharalardy zerdeledi. Sınhý Sın memorandým sheńberinde doktoranttar men magıstranttarǵa «Mashınalyq oqytý jáne popýlıasııalyq genetıka ádisterin qoldaný arqyly bıoalýantúrlilikti saqtaýdy kúsheıtý» taqyrybynda dáris oqydy.
Osy saparda Sınhý Sın veterınarııa ǵylymdarynyń doktory, professor Qaısar Kóshálıevtiń ǵylymı mektebinen tálim alǵan shákirtterimen kezdesti. Qytaı professory birneshe baǵytta ǵylymı zertteý jobalarymen aınalysyp júrgen BQATÝ ǵalymdarynyń izdenisine erekshe nazar aýdardy. Bolashaqta birlese eńbektenýge, úlken jobalardy birge júzege asyrýǵa nıet bildirip, Beıjiń ýnıversıtetinde taǵylymdamadan ótýge shaqyrdy.
Aıta keteıik, Beıjiń ýnıversıteti ǵalymdary Jáńgir han ýnıversıtetiniń kıikti qolǵa úıretý jobasyna kópten nazar aýdaryp keledi. Byltyr qazan aıynda BQATÝ ǵalymdary Qaısar Kóshálıev pen Vadım Ýlıanov kórshi elge arnaıy shaqyrtýmen baryp qaıtqan edi.
«Qazaqstan Prezıdenti Qytaıǵa 1 500 bas kıik berý jóninde sheshim qabyldady. О́tken jyly ýnıversıtetimizge kelgen elimizdiń qos ǵalymy kıikti qolǵa ustaý, olarǵa ǵylymı zertteý júrgizý boıynsha tájirıbesin aıtyp bergen edi. Osy joly kıikti óz kózimmen kórdim. Bul janýar erterekte Qytaıda da bolǵan, biraq qazir kezdespeıdi. Álem boıynsha azaıyp ketken bul janýardy qorǵaý isine biz de atsalyssaq deımiz. Jalpy kıik – kúnine 80 shaqyrymǵa deıin jóńkilip jaıylatyn, ózin-ózi emdep alatyn qyzyq janýar ǵoı. Olardyń sanyn tabıǵat ózi rettep otyrady. Ǵalym retinde osy máselege qyzyǵyp, zerttep júrmin. Budan ári Jáńgir han ýnıversıtetimen halyqaralyq deńgeıde ǵylymı yntymaqtastyq ornatyp, birge jumys isteýge nıettimiz», dedi qytaılyq ǵalym.
Batys Qazaqstan oblysy
