Otandyq sport tarıhynda Jánibektiń óz orny bar ekeni esh daý týǵyzbasa kerek. Bala kezinen belgili boksshy, tanymal bapker Murat Sıqymbaevtyń qol astynda jattyqqan Almaty oblysy Alakól aýdanyna qarasty Jylandy aýylynyń týmasy áýesqoı rıngte aýyz toltyryp aıtarlyqtaı tabystarǵa qol jetkizdi. Alǵash ret ol qyraǵy mamandardyń nazaryna 2012 jyly ilikti. Sol jyly Astanada ótken el birinshiliginde 75 keli salmaq dárejesinde óner kórsetken 19 jastaǵy óren barlyq qarsylastaryn jolynan yǵystyryp, bas júldege ıe boldy. 2013 jyly Amman men Astanada uıymdastyrylǵan Azııa jáne álem chempıonattarynda top jaryp, 2014 jyly Inchhonda Azııa oıyndarynyń jeńimpazy atandy.
Bıyl Shymkentte ótken Qazaqstan chempıonatynda sátsizdikke ushyrǵannan soń Jánibek Álimhanuly biraz ýaqyt jankúıer nazarynan tys qalǵan edi. Sol kezderi «Ol úlken sporttan túbegeıli qol úzdi» nemese «Kásipqoı boksqa ketkeli jatyr eken» degen syńaıda túrli áńgimeler órbidi. Sol saýaldarǵa sportshynyń ózi BAQ ókilderi aldynda resmı túrde jaýap berdi.
Kásipqoı rıngte kúsh synasýǵa túbegeıli bet burǵan Jetisýdiń óreni tanymal menedjer Egıs Klımaspen kelisimshartqa otyrýdy qup kórgen eken. AQSh-ta turyp jatqan tegi lıtvalyq azamat kóptegen bylǵary qolǵap sheberlerin óz qamqorlyǵyna alyp, búgingi tańda tolaǵaı tabystarǵa qol jetkizip otyr. Solardyń qatarynda Vasılıı Lomachenko, Aleksandr Ýsık, Sergeı Kovalev, Aleksandr Gvozdık jáne basqa shoq juldyzdar bar. Sonymen qatar 2017 jyldyń eń úzdik menedjeri atanǵan mamanmen Madııar Áshkeev, Meıirim Nursultanov, Ashat Ýálıhanov, Saǵadat Rahmanqulov jáne Qanat Islam syndy qazaqstandyq boksshylar jumys isteıdi.
Esterińizge sala keteıik, Jánibek Álimhanuly osy kúnge deıin kásipqoılar arasynda eki kezdesý ótkizip úlgerdi. Eki retinde de ol jeńiske jetti. 2016 jyly qandasymyz Almatyda kolýmbııalyq Mılton Nýnesti birinshi raýndta uryp jyqsa, byltyr Astanada brazılııalyq Jılberto Pereırý dos Santosty upaı sanymen utty.
Ǵalym SÚLEIMEN,
«Egemen Qazaqstan»
ALMATY
