Palata sammıtke 15-ke jýyq sala mekeme ókilderin bastap bardy. Qazaqstan Saraptama uıymdary palatasynyń basqarma tóraǵasy Birlik Erejepov jıynda álemniń ár aımaǵynan jınalǵan qurylys sheberlerine kásibı birlestik jumysyn tanystyryp, Elbasy Nursultan Nazarbaevtyń elordanyń kelbetinde eń sońǵy úzdik qala qurylysy men sáýlet óneri jańalyqtary kórinis tapqanyn jiti qadaǵalaıtynyn aıtty. Sonymen qatar palata tóraǵasy, elimizdegi qurylys qarqynynyń ekonomıkaǵa da sony serpin berip otyrǵanyn atap ótti.
«Astana Qazaqstannyń alyp qurylys alańy ispetti. Onda biregeı sáýlet óneriniń qoltańbasy sezilip turady. Tórtkúl dúnıeniń eń bilikti sáýletshileri men ınjenerleri úshin bas qalamyzdyń qushaǵy árdaıym ashyq», – deı kele, B.Erejepov Norman Foster, Manfredı Nıkolettı sııaqty ataqty sáýletshilerdiń Astana qalasyndaǵy biregeı jobalaryna toqtaldy.
Bul aqparatqa ıspandyq mamandardyń qyzyǵýshylyǵy zor boldy. Sebebi Santıago Kalatrava men Rıkardo Bofıll ispetti Ispanııanyń bedeldi sáýletshileri Elbasyna qala aýmaǵyn damytý jónindegi óz tujyrymdaryn usynǵany belgili.
Sammıt barysynda jobalaý jáne saraptama qyzmeti boıynsha tórt jumys sessııasy ótti. Atalǵan kezdesýlerge qatysýshylar mańyzdy máselelerge baılanysty jemisti suhbat quryp, qos tarap qurylys salasyndaǵy ruqsat berý qaǵazdaryn kelisimdeý, qyzmetti saqtandyrý tárizdi ózekti máselelerdi talqylady.
Qazaqstandyq qonaqtar Ispanııanyń qurylys sarapshylaryn ózindik kásibı keńistikke biriktirý tájirıbesin zerdelep, sáýletshiler Fran Sılvester men Hose Marııa Tomas Lıavadordyń keńse-stýdııalarynda boldy. Máselen alǵashqysynyń tól jobasy boıynsha salynyp jatqan «Casa Hofmann» turǵyn úıinde ishki jaılar men syrtqy ortanyń qazirgi zamanǵy úılesimi oılastyrylǵan. Bul jerde Qazaqstan ókilderi nysandy turǵyzýdaǵy ozyq tehnologııalar jáne materıaldarmen tanysty.
Venera TÚGELBAI,
«Egemen Qazaqstan»
