BUU-nyń alty tiline aýdarylatyn antologııanyń mazmuny, qurylymy qandaı bolatynyn talqylaý úshin ádebıetimizdiń kórnekti ókilderi Almatydaǵy Dostyq úıinde bas qosty. «Qazirgi zamanǵy qazaq mádenıeti álem nazarynda» jobasy – Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynan tamyr tartqan, ıgilikti sharýa. Mundaı aýqymdy aýdarma jumysy qatań baqylaýda bolady. Negizi jumys tobyna Prezıdent Ákimshiligi ishki saıasat bóliminiń meńgerýshisi Aıda Balaeva jetekshilik etedi. Almatyda ótken jıynda Aıda Balaeva aýdarma sapasynyń joǵary bolýyn jáne antologııanyń taralý mańyzdylyǵyna toqtalǵan bolatyn. Sondyqtan da qazaq qalamgerleriniń shyǵarmalaryn aýdaryp, taratýǵa Brıtan Keńesi men Kembrıdj ýnıversıteti sııaqty bedeldi uıymdar peıil tanytyp otyr. Jobany uıymdastyrýshy top antologııany fransýz, ıspan, qytaı, arab, orys tilderine aýdarǵanda da úlken jetistikke jetýdi kózdeıdi.
Memlekettik syılyqtyń laýreaty, jazýshy Álibek Asqarov: «Jalpy bizdiń qazaq ádebıetindegi ornyn toltyra almaı júrgen bir kemshiligimiz bar. Ol – nebir injý-marjan jaqsy shyǵarmalardy shetelge tanytý. Buryn shetelge tanytý jaǵy óte aýyr, qıyn jaǵdaı edi. Elbasynyń «Bolashaqqa baǵdar: rýhanı jańǵyrý» maqalasy aıasynda qazir qalamgerler arasynda úlken serpilis bar. Alty tilge aýdarý úshin alty memleketke barý kerek. Onyń baspagerleri bar, basqasy bar solarmen kelissóz júrgizý kerek. Kelisimge qol qoıý kerek. Sonyń bárin memleket jasap berdi. Endigi mindet – soǵan laıyq injý-marjandardy tańdap otyryp, aýdarýǵa berý», dedi.
«Prostor» jýrnaly bas redaktorynyń orynbasary Lıýbov Shashkova bolsa: «Qazaq ádebıetiniń klassıkteri men jańa zamanǵy ókilderin qamtıtyn eki tomdyq antologııanyń bir tomy – poezııa, bir tomy – proza. Úlken jumys atqaryldy, endi jaqsymyzdy jarqyratyp kórsete alýymyz kerek», dep pikir bildirdi.
Aıda Balaevanyń aıtýynsha, bul joba aqyn-jazýshylarymyzdyń shetelmen qarym-qatynas ornatýyna, qazaq ádebıetin álem jurtshylyǵyna tanytýǵa, álemdik ádebı úrdiske at salysýǵa zor múmkindik beredi.
Sonymen qatar antologııa tek kitap formatynda ǵana emes, elektrondy jáne aýdıo formatta da jaryq kórip, onlaın platformalarda oqyrman nazaryna usynylady.
Baǵashar TURSYNBAIULY,
«Egemen Qazaqstan»
