Biraq ata kásibine adal jurt aýyldan údere kóshken joq. Tósinde tórt túligin órgizip, órisin keńeıtti. Bıyl Qyzylúıdiń alǵashqy kirpishi qalanǵanyna 105 jyl toldy. Osyǵan oraı Elbasynyń «Rýhanı jańǵyrý» baǵdarlamasynyń «Týǵan jer» jobasy aıasynda Tushyqudyq aýyldyq okrýgi ákimshiliginiń uıymdastyrýymen «Qyzylúı – qutty mekenim» atty shara ótti.
Qum tósindegi aýylǵa arnaıy stella-belgi ornatylyp, taza aýyz sý qubyry men sý taratý ımaraty paıdalanýǵa berildi. Saltanatty sharada eldi mekenniń ótken joly men aldaǵy baǵdary sóz bolyp, bir top aýyl sharýashylyǵy ardagerleri, sharýa qojalyqtarynyń ıeleri marapattaldy. Ata kásipti meńgerip, áke jolyn jalǵastyrǵan sharýagerlerge Qurmet gramotasy tapsyryldy.
Shaǵyn aýyldaǵy toıda «Án – jyrym, saǵan, týǵan jer» atty konserttik baǵdarlama, balýandar beldesýi, qoı kóterý, arqan tartys, jaıaý jarys sekildi sporttyq jarystar da joǵary deńgeıde uıymdastyryldy. Qaz-qatar tizilgen kıiz úıler de saltanattyń sánin keltirdi. 21 shaqyrymdyq alaman báıgege 15 sáıgúlik qatysyp, 1-shi oryndy Meńdiǵul Aqqýatovtyń júırik tulpary jeńip aldy. Jergilikti kásipkerler jármeńkege ónimderin shyǵardy.
– О́ńirde aýyl sharýashylyǵynyń qalyptasyp, órkendeýine eńbek sińirgen aǵa urpaqty qurmetteý, aýyl jastaryn eńbek dástúrin jalǵastyrýǵa tárbıeleý maqsatynda osy sharany uıymdastyrdyq, – deıdi aýyldyq okrýg ákimi Mádı О́teǵalıev. – Qyzylúıdiń áli de kórkeıe bereri kámil, qazir tabıǵı gaz jetkizýdiń alǵysharttary jasalýda, jańa mektep qurylysy júrip jatyr. Turǵyn úı qurylysy kóbeıdi.
Týǵan jer tósindegi meıramǵa osy aýyldan túlep ushqan, búginde elimizdiń túkpir-túkpirinde eńbek etip júrgen jerlester de keldi. Dala eńbekkerlerine erekshe mereke syılaǵan Qyzylúıdegi shara jastardyń aı astynda altybaqan teýip, oıyn-saýyq baǵdarlamalaryna qatysýymen támamdaldy.
Baqytgúl BABASh,
«Egemen Qazaqstan»
ATYRAÝ
