Dáriger – halyqqa qyzmet etýge ómirin arnaıtyn abzal mamandyq. Ol moınyna ómirdegi eń qymbat jaýapkershilik sanalatyn adam ómirin alady. Sondyqtan da bedeldi, qajetti jáne adamgershilikti talap etetin izgi mamandyqtardyń biri bolyp qala bermek.
Osy ispetti aýyrtpalyq júgin qoryqpaı arqalaǵan Qostanaı oblysyndaǵy Rýdnyı qalalyq aýrýhanasynyń kardıologııa bólimshesiniń dárigeri Zınat Kenishbekqyzy 23 jyldan beri naýqastar janyna arasha bolyp kele jatqan tájirıbeli maman.
Dáriger qandaı qasıetterge ıe bolýy kerek? Zınat Kenishbekqyzynyń aıtýynsha, eń aldymen aq jeleńdi jandar aqjúrek bolýy qajet. Iаǵnı adamdy jaqsy kóre bilýi tıis. Bilimdi de bilikti, kúrdeli jaǵdaılarǵa ázir jáne mahabbat pen meıirimdilikti tý etýi shart. Sonda ǵana salasynyń jiligin shaǵyp, maıyn ishken mamanǵa aınalady.
«Dárigerdiń jumysy naýqastyń janyn qınaǵan azapty jeńýden turady. Ol halyqtyń densaýlyǵyna jaýapty maman. Boıyndaǵy qaısar minez – dárigerdiń basty qarýy. Iаǵnı aldynda qandaı qıyn is kútip tursa da, bárine birdeı tótep berýge daıyn bolýy dárigerdiń qaısarlyǵy men kúreskerliginiń aınasy. Sondaı-aq adam ómiriniń arashashysy sheshimdi tez qabyldap, jaýapkershilikten jaltarmaýy kerek. О́ıtkeni qaı jeriń aýyrsa, janyń sol jerde ǵoı, deıdi kardıolog-dáriger.
Álbette, qanshama adamnyń janyn saqtap qalǵan meıirimdi jan barlyq qurmetke ıe. Ol tipti bas aýyryp, baltyr syzdap kelgen myńdaǵan adamdardyń kóńiline demeý, janyna súıenish bola bilgen dárigerdiń biraýyz jyly sózi aýyryp jatqan adamǵa dáriden de artyq áser etetinin aıtady.
– Jumys barysynda túrli jaǵdaımen betpe-bet kelýge týra keledi. Qıyn sátterde kúrdeli jaǵdaıdan shyǵa bilý – tapqyrlyqtyń belgisi. Áıtpese senimsizdiktiń kesirinen júrek soǵýyn toqtatady. Sol sebepti sabyrly sheshim qabyldaı bilýdiń mańyzy zor. Árıne, eńbek jolynda este qalarlyq sátter kóp. Alaıda, men úshin sonyń ishindegi eń qıyn ári júregime tıgeni eki birdeı jannyń ómirin arashalap qalýǵa jantalasqan oqıǵa der edim. Júrek aqaýy bar júkti áıeldiń bizdiń aýrýhanaǵa kelgeni áli esimde. Dárigerlerdiń aıtqan sózine qulaq aspaı, óz betinshe áreket jasaǵan jas ananyń ómiri qyl ústinde turǵanyn ol bilmegen edi. О́mirin barynsha saqtap qalý bizdiń dárigerlik mindetimiz bolatyn. Júreginiń álsiz ekendigine qaramastan qursaǵyndaǵy nárestege jańa ómir syılaý jankeshtilik qoı. Alaıda munyń bir ǵana joly boldy. Ne ananyń ómirin arashalaý, ne nárestege jańa ómir syılaý. Bul – óte qıyn sheshim. Dál osyndaı aýyrtpalyqty buryn-sońdy sezinip kórmeppin. Mundaı medısınalyq operasııany júzege asyrýǵa bizdiń aýrýhana qaýqarsyz edi. Sol sebepti de anany tez arada oblystyq aýrýhanaǵa jetkizý kerek boldy. Jol ústinde júkti áıeldiń qan qysymy kenetten tómendep ketip, júregi bir mezette toqtap qalady. Bar jigerimdi jınap, sol arada alǵashqy kómek kórsetýge asyqtym. Defıbrılıatordyń kómegimen sóngen júrekti qaıta ómirge ákeldim. Biraq, bul ýaqytsha ǵana boldy. Aýrýhanaǵa jetkenshe ananyń ómirin arashalap qalý múmkin emes edi. Sol sebepti qursaqtaǵy nárestege jańa ómir syılaǵan dárigerdiń qandaı aýyrtpalyqpen betpe-bet kelgenine kózimiz jetip otyr, deıdi Zınat Kenishbekqyzy tolqyp.
Dárigerge osy adal qyzmeti úshin 2016 jyly qala ákiminiń dıplomymen marapattaldy. Jalpy, Rýdnyı qalalyq kardıologııa bólimshesiniń qyzmetkerleri adam ómirin arashalap alyp qalý, olarǵa ekinshi ómir syılaý- ár dárigerdiń basty mindeti dep biledi. Olardyń kómegimen toqtaǵan júrek qaıta soǵyp, sóngen úmit qaıta janady. Sondyqtan olarǵa árdaıym qurmet kórsetip júreıik.
Laýra EShNAZAROVA,
L.N.Gýmılev atyndaǵy Eýrazııa Ulttyq ýnıversıteti
Saıasattaný jáne jýrnalıstıka fakýltetiniń I kýrs stýdenti
