Saıystyń maqsaty memlekettik til saıasatyn nasıhattaý, tilge qurmetti arttyrý, qazaq tilin jetik úırenýge yntalandyrý, áskerı qyzmetshilerge memlekettik tildi meńgertýdiń oń tájirıbesin taratý boldy.
Atalǵan saıys Ulttyq ulanda birneshe jyl qatarynan ótkizilip keledi. Jyl saıyn saıystyń talaby kúsheıip, zamanǵa saı jańalyqtar engizilip otyrady. Til taqyryby ǵana emes, tarıhty, salt-dástúrdi, otansúıgishtikti nasıhattaǵan sharanyń jeke quramdy tárbıeleýde atqaryp kele jatqan róli zor.
«Ońtústik» óńirlik qolbasshylyqqa qarasty Shymkent, Taraz, Qyzylorda qalalary men Almaty oblysynyń Uzynaǵash aýlynan shaqyrylǵan ulandyq saıyskerler Almaty qalasynda ótetin sharaǵa úlken daıyndyqpen kelgen. Kileń saıdyń tasyndaı irkitelgen jigitter aldymen ózderin tanystyrýdan bastady. Saıysqa jeti úmitker qatysty, atap ótsek, 7552 áskerı bóliminen serjant Shelokov Aleksandr Vladımırovıch, 3650 áskerı bóliminen aǵa leıtenant Krýk Vıktor Vladımırovıch, 5571 áskerı bóliminen serjant Naımýshın Andreı Aleksandrovıch, 5513 áskerı bóliminen serjant Baklagın Vladımır Aleksandrovıch, 5547 áskerı bóliminen aǵa leıtenant Ibatýllın Rýslan Pavlovıch, 6506 áskerı bóliminen aǵa leıtenant Podolıak Svıatoslav Vladımırovıch, 6698 áskerı bóliminen serjant Mustafaev Nýraddın Dagestanovıchter, 28237 áskerı bóliminen qatardaǵy Mamykın Aleksandr Aleksandrovıchter baq synasyp, óz bólimderiniń namysyn qorǵady.
Maqal-mátel aıtýdan jarysqa túsken áskerıler arasynda serjant Shelokov Aleksandr qatarlastarynan oq boıy ozyp shyqty, ol ózin tanystyrýda da dombyrany aıtystyń maqamymen shertip, kórermendi birden baýrap alǵan edi. Shymkentten kelgen ázerbaıjan ultynyń ókili serjant Mustafaev Nuraddın qazaqtyń salt-dástúrin tereń oıly sózdermen jetkizip, parasatty qazaq er-azamatynyń tulǵasyn somdap shyqty. Nuraddınniń tili jatyq, oıyn erkin jetkizetindigi baıqaldy.
Al saıyskerler ishindegi eń jasy qatardaǵy Mamykın Aleksandrǵa tótep berer qarsylas bolmady. Jas kelse, iske degen osy bolar. Aleksandrdyń sóz saptaýy, oı qorytýy, tanym-túısigi men bilimi artymyzda kele jatqan jas tolqyn urpaqtyń shyǵar bıigin kórsetkendeı. Ol osy sharanyń ózine jańa úlgi alyp keldi. Kúni keshe, Otan qorǵaýshylar kúni jaýyngerlik paradta shyrqalǵan «Men qazaqpyn» ánin rýhtanyp, arqalanyp aıtty.
Sondaı-aq, til baıqaýynyń barysynda B.Momyshulyna arnaý, tilge qurmet, Qazaqstannyń jetistikteri, Astananyń 20 jyldyǵy, Otandy súıý taqyryptarynda sheshen sóıleýge talpynys boldy.
Saıys qorytyndysy boıynsha kórermender kózaıymy bolǵan 5547 áskerı bóliminiń áskerı qyzmetshisi, tatar halqynyń ókili, aǵa leıtenant R.Ibatýllın arnaıy gramotamen marapattaldy. 6698 áskerı bóliminen kelgen serjant N.Mustafaev 3-oryndy, 7552 áskerı bóliminen qatysqan serjant A.Shelokov 2-oryndy, al 28237 áskerı bóliminen saıysqa túsken qatardaǵy A.Mamykın 1-oryndy ıelenip, dıplomdarmen jáne baǵaly syılyqtarmen marapattaldy.
Memlekettik til mártebesi ulyqtalǵan keshke Qazaqstan halqy assambleıasynyń Almaty qalasyndaǵy ókilderi qatysyp, ulttyq-mádenı ortalyqtardyń án-shashýlary syıǵa tartyldy. Qazaqtyń qolóner buıymdarynan kórme qoıyldy. Atalǵan baǵdarlama men kórmeni uıymdastyrýǵa qoldaý kórsetken Qazaqstan Respýblıkasy Prezıdentiniń janyndaǵy «Qoǵamdyq kelisim» Respýblıkalyq memlekettik mekemesi Almaty qalasyndaǵy «Dostyq» úıiniń birqatar músheleri alǵys hattarmen marapattaldy.
