Zaýyttyń alyp jatqan aýmaǵy 2640 sharshy metrdi quraıdy, qýaty táýligine 35 tonna nan-toqash ónimderin óndirýge jetedi dep josparlanǵan. Bul jobany iske asyrýǵa 2 mlrd teńgeden astam ınvestısııa jumsaldy. Jańa nan zaýyty Elbasy Nursultan Ábishuly Nazarbaevtyń ekonomıkalyq strategııasyn, «Tórtinshi ónerkásiptik damý jaǵdaıyndaǵy damýdyń jańa múmkindikteri» Joldaýyn, «Sıfrly Qazaqstan» keshendi baǵdarlamasyn júzege asyrý maqsatynda salyndy. Zaýyt halyqaralyq standarttarǵa, óndiristi sıfrlandyrý boıynsha talaptarǵa tolyq sáıkestendirilgen, ol TMD men Eýropa elderi aýmaǵyndaǵy zamanaýı nan zaýyttarynyń biri bolyp tabylady.
Bul kólemdi de serpindi jobany nan pisirý óndirisiniń eń jańa tehnologııalaryn qoldana otyryp, ónimniń joǵary sapasyn qamtamasyz etýdi maqsat etken biliktiligi joǵary kásibı mamandar júzege asyrdy. «Ulytaý Nan» nan zaýyty aldyńǵy qatarly Eýropa elderinde shyǵarylǵan energııalyq tıimdi, joǵary tehnologııalyq zamanaýı quraldarmen jabdyqtalǵan. Italııanyń «Echer» kompanııasynan qamyr ıleıtin mashınalar, qamyr ashytatyn aýdarǵyshtar, mıkser, «Mondıal Fornı» kompanııasynan qamyr bólgishter men qamyr dóńgelektegishter, tolyqsytý shkaftary, tabandy jáne rotasııaly peshter, «Sartorı» kompanııasynan toqashtarǵa arnalǵan bólgishter men dóńgeletkishter, «Djeneral sıstem pak» kompanııasynan nan-toqash ónimderin oraýǵa arnalǵan jabdyq, Slovakııanyń «A-T» kompanııasynan qaptarda saqtaýǵa, undy tasý men mólsherleýge, ashytqy jasaýǵa arnalǵan jabdyq jınaqtary, shveısarııalyq «Rondo» kompanııasynan krýassan túrindegi qattama ónimderdi shyǵarý úshin qamyr jaıýǵa arnalǵan jabdyq satyp alyndy. Germanııadan «Hobart» kompanııasynan shyǵarylǵan nan jáshikterin jýýǵa arnalǵan mashına ákelindi. Nan zaýytynyń joǵary tehnologııaly jabdyqtaryn montajdaý jáne qalpyna keltirip retteýdi eýropalyq mamandar iske asyrdy, sondaı-aq olar keleshekte osy qurylǵylarda qyzmet kórsetýshi jergilikti mamandardan qurylǵan óndiristik brıgadırlerdi oqytty. Nan zaýytynyń óndiristik qyzmetinde dýaldy bilim berý júıesi qoldanylady.
Kásiporynda 225 jańa, onyń ishinde múmkindigi shekteýli adamdarǵa arnalǵan jumys oryndary ashyldy. Qyzmetshilerdiń eńbek jaǵdaıyn barynsha jaqsartý jáne olardy áleýmettik paketpen qamtamasyz etýmen qatar, jalpy bekitilgen normalardan tys jumys aýysymy barysynda tegin tamaqtandyrý qarastyryldy.
Zamanaýı tehnologııalar men jabdyqtar, bilikti personal ónimderdiń ekologııalyq tazalyǵyn, 50-den astam nan-toqash ónimderi túrleriniń joǵary dám sapasyn jáne taǵamdyq qundylyǵyn qamtamasyz etedi. Tutynýshylar úshin tutas dándi sorttardan óndirilgen qazaqstandyq unnan jasalǵan jáne ártúrli daqyl dánderi, kebek qosylǵan dıetalyq jáne basqa da nan sorttary shyǵarylady.
Jańa nan zaýytynyń alǵashqy ónimderi bóbekter úıine, Jezqazǵan balalar úıine, kámeletke tolmaǵandardy beıimdeý ortalyǵyna, jasóspirimder úıine jáne qarttar men múgedekter úıine joldanady. Kásiporyn metallýrgterdi, kenshilerdi jáne baıytýshylardy sapaly ári paıdaly ónimmen qamtamasyz etý úshin óndiristik ashanalardyń nan-toqash ónimderin jetkizýshi bolyp tabylady. Nan zaýytynyń satý-ótkizý bólimine qazirgi ýaqyttan bastap kásipkerlerden, iri sýpermarket jáne saýda núkteleri ıelerinen kóptegen suranystar túsip, turaqty negizde ónimdi jetkizýge kelisimsharttar jasalýda, olardy ónimniń sapasy, san alýan túrliligi men arzan baǵasy qyzyqtyrady. Tutynýshylarǵa nan-toqash ónimderin jetkizýdi menshiktegi satyp alynǵan jáne brendtelgen avtopark iske asyrady, sonymen qatar Jezqazǵan jáne Sátbaev qalalarynda óz brendimen «dóńgelekti dúkender» jumys isteıtin bolady.
О́skeleń urpaq pen aımaq turǵyndarynyń boıynda nanǵa jáne naýbaıshylardyń eńbegine degen qurmetti qalyptastyrý ári kásibı baǵdarlaý jumysyn júrgizý maqsatynda kásiporynda ekskýrsııalyq estakada jumys isteıtin bolady, onda barlyq tilek bildirýshiler nan-toqash ónimderiniń óndiris tehnologııasymen tanysa alady.
Zamanaýı jańa kásiporyn «Ulytaý Nan» nan zaýyty aımaqta jańa jumys oryndarynyń ashylýyna, aldyńǵy qatarly ınnovasııalyq tehnologııalardy engizý arqyly adamı kapıtaldy damytýǵa, salyq salý bazasyn ósirýge jaǵdaı týǵyza otyryp, jahandyq damý jaǵdaıynda elimizdiń ekonomıkasyn kóterýge jáne Elbasy Nursultan Ábishuly Nazarbaevtyń Qazaqstannyń álemniń eń damyǵan 30 memleketiniń qataryna kirýi jónindegi tapsyrmasyn júzege asyrýǵa múmkindik beredi.
Qaırat ÁBILDA,
«Egemen Qazaqstan»
Qaraǵandy oblysy,
Jezqazǵan qalasy
