Jýyrda qazaq akteri, Qazaqstannyń eńbek sińirgen qaıratkeri Tóleýbek Aralbaı Qytaıda ótken kınofestıvalde júldege ıe boldy. Sındao qalasynda maýsymnyń 13-i men 17-i aralyǵynda ótken festıvalge Shanhaı yntymaqtastyq uıymyna múshe elder kınotýyndylary qatysty. Qazaqstandyq akterler elimizdiń Mádenıet jáne sport mınıstrliginiń tapsyrysy boıynsha «Adıgýl prodakshn» kınokompanııasynyń qatysýymen Sh.Aımanov atyndaǵy «Qazaqfılm» AQ túsirgen rejısser T.Temenovtiń «Bizdiń qalanyń hanzadasy» fılmin aparǵan bolatyn. Bıbol esimdi qamkóńil ul – balalar úıiniń alty jasar tárbıelenýshisi men Qasymhan esimdi mýzykant qarııanyń kezdeısoq kezdesýinen órbıtin kınonyń dramalyq jelisi odan ári múldem bóten eki keıipkerdiń ózara etene jaqyn bolyp, bir-birine áke men baladaı baýyr basyp ketýine ulasady. Adamgershilik qasıetti basty orynǵa qoıyp, osy izgi qasıet arqyly baqytqa bólený múmkindigin alǵa tartqan melodrama Astanada jáne Aqmola oblysynyń Býrabaı aýylynda túsirilip, 2017 jyly 1 maýsym – halyqaralyq balalardy qorǵaý kúninde tusaýy kesildi. Sol jyly qazan aıynan bastap elimizdiń kınoteatrlarynan kórsetilip, qyrkúıek aıynda Reseıde ótken II halyqaralyq «Eýrazııalyq kópir» kınofestıvaliniń negizgi baǵdarlamasy aıasynda kórsetildi.
QHR memlekettik kınematografııa basqarmasy men Shandýn provınsııasynyń ákimshiligi uıymdastyrǵan ShYU aıasyndaǵy kınofestıvalde kórermender nazaryna 60 kartına usynylǵan bolatyn. «Bizdiń qalanyń hanzadasy» fılminde basty rólderdi Ánýar Tóleýǵajy men buryn «Jaýjúrek myń bala», «Joıýshy», «Tyǵyryqtan jol tapqan» fılmderinde oınaǵan Tóleýbek Aralbaı somdady jáne fılmge Astana qalasyndaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń akterleri qatysty. О́z rólin sheber, tartymdy somdaǵan Tóleýbek Aralbaı kınofestıvalde «Úzdik er adam» róli júldesin jeńip aldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
