Munyń syrtynda «20 ıgi is» degen taqyryppen ótkizilgen qaıyrymdylyq sharalary jasy ulǵaıǵan jáne múmkindigi shekteýli jandarǵa, tabysy az kóp balaly otbasylarǵa moraldyq jáne materıaldyq turǵydan qoldaý kórsetýge baǵyttaldy. Degenmen, «bul án burynǵy ánnen ózgerek» degendeı, «Qutty meken Aqtóbeden – araıly Astanaǵa» degen taqyryppen uıymdastyrylǵan avtokerýenniń orny da, joly da bólek boldy dep aıtýǵa tolyq negiz bar.
Atalǵan avtokerýen óziniń baǵytyn 25 maýsym kúni Qyzylordaǵa qaraı burǵan edi. Onyń quramyndaǵy qoǵam, mádenıet pen óner qaıratkerleri, ǵalymdar men jastar ókilderi bir apta boıy el-jurtpen emen-jarqyn pikir alysyp, Astananyń abyroıyn asqaqtatty. Olar Qyzylorda, Túrkistan, Jambyl, Qaraǵandy oblystarynyń ortalyqtarynda jáne Almaty men Jambyl qalalarynda bolǵan kezdesýlerde elimizdiń júregi Astana týraly tartymdy áńgimeler órbitti.
Astana tutastaı el óńirleriniń ósip-órkendeýine basty temirqazyq bola alatyny jóninde óreli oı-pikirler de sabaqtaldy. Astanaǵa qarap oı túzeý de, Astanaǵa qarap boı túzeý de jastarǵa ábden jarasady. Sondyqtan da avtokerýen quramynda jastardyń kóbirek bolýyna kóńil bólindi. Bul týraly atalǵan mándi de mańyzdy mádenı-kópshilik sharanyń basy-qasynda júrgen Aqtóbe oblystyq mádenıet, arhıvter jáne qujattama basqarmasynyń basshysy Marjan Qorǵanbaeva aıtyp berdi.
Avtokerýen atalǵan ýaqyt aralyǵynda elimizdiń 11 eldimekeninde bolyp, el-jurt pen Astana arasyndaǵy baılanystar men qarym-qatynastardyń jaqyndaı túsýine jáne turǵyndar arasynda Astanaǵa degen súıispenshilik sezim men mahabbattyń ornyǵýyna alǵyshart jasaı alǵany onyń alǵa qoıǵan basty maqsatynyń oryndalǵanyn kórsetedi. Qysqasy, Aqtóbeden elordaǵa baǵyt ustaǵan avtokerýen 5170 shaqyrym jolyn artqa tastap, shildeniń alǵashqy kúninde Astana qalasyna jetti. Sol kúni aqtóbelik óner sheberleri elordanyń tórinde úlken merekelik konsert qoıdy.
Temir QUSAIYN,
«Egemen Qazaqstan»
AQTО́BE
