Tusaýkeser rásiminde sóılegen Raıymbek aýdanynyń ákimi Jolan Omarov atalǵan kitapta Álnur Meıirbekovtiń ónegeli ómiri, Narynqol óńirinen shyqqan Muqaǵalı Maqataev, Erkin Ibitanov, Saǵat Áshimbaev, Baqqoja Muqaı, Janbolat Aýpbaev syndy talanatty aqyn-jazýshylar men jýrnalısterge kórsetken aǵalyq qamqorlyǵy, redaktorlyq tálimgerligi keńinen kórinis tapqanyn atap ótti. Budan keıin sahnada jazýshy ómiriniń árbir sátinen, qoǵamdyq oryndarda atqarǵan eleýli eńbekterinen estelik retinde beınekórinis usynyldy.
Alǵashynda aýdandyq baspahanada, odan keıin gazet redaksııasynda tilshi bolyp qyzmetter atqarǵan Á.Meıirbekov Uly Otan soǵysy bastalǵanda bir top qurdastarymen birge qan maıdanǵa attanady. Urys kezinde mergendigimen kózge túsip, ajal tóndirip kele jatqan jaý tankisin jaıratyp, janyndaǵy jaýyngerlerdi ólimnen qutqaryp qalady. Bul jóninde soǵystan keıin jazylǵan «Qarapaıym qaharmandar» kitabynda jan-jaqty aıtylady. Maıdannan jaraqat alyp elge oralǵan Álnur atamyz 1950-jyldardyń orta sheninde Almatydaǵy partııa mektebiniń jýrnalıstıka bóliminde oqyp, bilimin tolyqtyrady. Mine, sodan bastap ol kisi aýdandyq «Sovettik shekara» gazetinde (qazirgi «Hantáńiri» gazeti) kóp jyldar boıy bas redaktor bolady.
Sahnadaǵy beınekórinisten keıin Álekeńniń tóte tárbıesinen ótken, osy jıynǵa qonaq bop kelgen qalamger Dáýlet Jeldikbaev ótken men búginniń birshama áńgimesin Álekeńdi eske ala otyra oı tarazysyna saldy.
– «Áıgili Álnur Meıirbekov» dese degendeı. Ol kisi shyn máninde áıgili adam. Úlkenniń de, kishiniń de tilin tabatyn, bata bergende tilinen bal tamyzatyn, sol betimen júrgen jerinde, turǵan ornynda bárimizge úlgi kórsetetin. Álekeńdi jýrnalıst retinde aıtpaı-aq qoıaıyn. Adam retinde, azamat retinde, ustaz retinde, áke retinde Narynqol aýdanyndaǵy eki adamnyń eńbegi sińse bireýi, bireýiniń eńbegi sińse sonyń ózi Álekeń bolatyn, – dedi Dáýlet aǵa Jeldikbaev.
Rasymen de aýdanymyz Raıymbek babanyń atymen atalady. Aýdandyq gazetimizdi «Hantáńiri» deımiz. Sondaı-aq el súıiner Raıymbek batyrǵa arnalǵan eskertkishimiz boı kóterdi. Osy úsh jumystyń úsheýiniń de basynda Álekeń tur. Onyń ıdeıasyn gazet arqyly da usynyp, bylaısha da halyqqa nasıhat aıtyp degenine jetken ózi bolatyn.
Jetisý óńirine belgili Toqqoja Estenov myrzanyń qarjylaı demeýshiligimen jaryq kórgen kitapty bastan-aıaq qolǵa alyp, Álnur atanyń shákirtteri búginde beldi jýrnalıster, bir-bir gazet-jýrnaldarǵa tutqa bolyp otyrǵan qoǵam qaıratkerleri, aqyndar men jazýshy inileriniń eskirmeıtin estelikterin jınaqtap, keleshek urpaqqa qundy dúnıe qaldyryp jatqan aqyn Aıtaqyn Ábdiqaldyń eńbegi eleýli.
Sonymen kitaptyń tusaýy kesildi. Álnur qarııanyń súıikti nemeresi, ómirden ozǵan Altaı degen balasynyń uly Aıbekke sahna tórinde kitaptyń bir parasy syı etip tartyldy. Sodan soń qalǵan zalda otyrǵan aýyl azamattaryna taratylyp, qoldan-qolǵa ótti. Jaqsynyń sharapatyn kórgen qalamgerdiń nemeresi qolyndaǵy kitabyn aýyldas aǵa-ápkelerine, ustazdaryna, týǵan-týystaryna úlestirip, kópshilik qaýymnyń batasyn aldy.
Serikjan MÝRASILOV
Almaty oblysy,
Raıymbek aýdany,
Narynqol aýyly
