Táýelsizdik toıyna yqylasty quttyqtaýlar men izgi tilekter

Qazaqstan Respýblıkasynyń Prezıdenti Nursultan Nazarbaevtyń atyna memleket, Úkimet basshy­la­ry­nan, halyqaralyq uıym­dar­dyń jetekshilerinen Qazaq­stan Res­pýb­lıkasy Táýelsizdiginiń 20 jyldyǵyna baı­la­nysty kóptegen quttyqtaýlar kelip tú­sýde. Pan Gı MÝN,

BUU Bas hatshysy.

Joǵary mártebeli, qurmetti Nursultan Ábishuly, qurmetti myrzalar men hanymdar. Qazaqstan halqy men Úkimetin Sizder­diń elderińizdiń Táýelsizdiginiń 20 jyl­dy­ǵyna baılanysty quttyqtaýǵa qýanyshtymyn. «Qazaq» degen sóz kóne túrik tilinde «táýelsiz» nemese «rýhy erkin» degen maǵynany bildiredi. Bul uǵym qazaq halqynyń naǵyz bolmysyn dál anyqtaǵan. Sebebi, táýelsizdik alǵan kezeńnen bastap Qazaqstan halqy Qazaqstandy aımaqtyq  sahnanyń barlyq salalarynda sheshýshi oıynshyǵa aınaldyrý úshin úlken belsendilik tanyta bildi. Iаdrolyq qarýsyzdaný máselesin damytý jóninde kóp memleket Qazaqstan sııaqty tabandylyq tanyta almady. О́tken jyly men aralaý múmkindigine ıe bolǵan Semeı ıadrolyq polıgony bul ǵasyr tajalynyń adamzatqa tıgizetin zardabyn elestetetin kóńilsiz kórinisterge toly. Osyǵan baılanysty Ortalyq Azııada ıadrolyq qarýdan azat aımaq qurý jónindegi jasalǵan Kelisim búkil dúnıe júzindegi beıbitshilik pen qaýipsizdikke qosylǵan mańyzdy úles bolyp sanalady. Sonymen birge Qazaqstan 29 tamyzdy – Iаdrolyq synaqqa qarsy is-sharalardyń halyqaralyq kúni retinde atap ótý jóninde bastama kóterdi. Bul bastamany BUU Bas Assambleıasy bekitti. Men Qazaqstanǵa ıadrolyq qarýdan azat beıbitshilik súıgish álem qurý jolyndaǵy bastamasy úshin rızamyn. Buǵan qosymsha Eýropadaǵy qaýipsizdik jáne yntymaqtastyq uıymy, Shanhaı yntymaqtastyq uıymy jáne Islam Yntymaqtastyǵy Uıymy sııaqty aımaqtyq jáne halyqaralyq uıymdarǵa oıdaǵydaı tóraǵalyq ete otyryp, Qazaqstan búgingi zamannyń etnosaralyq úılestik jáne dinaralyq dıalog sııaqty óte mańyzdy máselelermen belsendi aınalysyp keledi. Álemdik jáne dástúrli dinder kóshbasshylarynyń sezderi – Qazaqstannyń búgingi zaman úshin óte qajetti bastamasy. Bul bastama toleranttylyqty damytýǵa, mádenıetter, dástúrler jáne dinı nanym-senimder arasyndaǵy ózara túsinistik pen tózimdilikti qalyptastyrady. Men Qazaqstandy osy saladaǵy kúsh-jigerdi odan ári damytýǵa shaqyramyn, óz kezeginde BUU ultyna, etnosyna, mádenıetine, dinine nemese dinı senimine qaramastan, barlyq halyqtardyń qaýipsizdigin, qundylyqtaryn jáne bolashaqqa degen senimin qamtamasyz etý úshin qyzmetin jalǵastyra beretinine senim bildiremin. Qazaqstan Res­pýb­lıkasy Myńjyl­dyq­ty damytý maqsatyn jú­zege asyrýda aıtar­lyq­taı jetistikterge jetti. Qazaqstan Res­pýb­lı­ka­synyń Úki­me­tin jáne onyń árip­testerin Qa­zaq­stannyń kún tár­ti­bine belgilegen maq­sa­tyna «SRT+» jetý jo­lynda kúsh-jigerlerin aıamaýǵa sha­qyramyn. Ortalyq Azııanyń basqa memleketteri sııaq­ty Qazaqstan da esirtki tasymaly jáne lańkestik aktileri sııaqty trans­sheka­ralyq qylmys problemalaryna kezdesip otyr. BUU aldaǵy ýaqytta da osyndaı qaýipterge qarsy kúreste qoldaý tanytatyn bo­lady. Onyń ishinde BUU-nyń qarjylyq qoldaýymen esirt­kige jáne qylmysqa qarsy qurylǵan Almaty qala­synda turaqty jumys  isteıtin Azııalyq aımaqtyq-aqpa­rat­tyq úılestirý ortalyǵynyń jumysyn da jumyl­dyratyn bolady. Biz sondaı-aq aımaqtyń memleketterinde zańdylyq jáne adam quqynyń basymdyqqa ıe bolyp, osy úderistiń turaqty jáne úzdiksiz júrgizilýin qamtamasyz etýge tereń kúsh-jiger jumsaıtyn bolamyz. Sý jáne energetıkalyq resýrstardy basqarý, qorsha­ǵan orta ahýalynyń nasharlaýy Ortalyq Azııada buryn­ǵysynsha mańyzdy másele bolyp qalýda. Mine, osy sala­daǵy aımaqtyq baılanystar óte mańyzdy. Birikken Ult­tar Uıymynyń júıesi BUU-nyń Aımaqtyq ortalyqtary­men birige otyryp, Ortalyq Azııada osy mańyzdy mindetterdi ózara tıimdi negizde sheshý úshin birlesken basta­malaryn odan ári  jalǵastyratyn bolady. Qazaqstan halqyn Táýelsizdiktiń 20 jyldyǵymen taǵy da quttyqtaımyn. Gúldengen, demokratııalyq jáne tabys­ty Qazaqstan qurmeti úshin meniń shyn júrekten shyqqan quttyqtaýymdy qabyldaýlaryńyzdy ótinemin. Bizdiń tyǵyz baılanystaǵy yntymaqtastyǵymyzdyń aldaǵy ýaqytta da jalǵasyn tabatynyna senemin.

D.MEDVEDEV,

Reseı Federasııasynyń Prezıdenti.

Qazaqstan Respýblıkasynyń  Prezıdenti Joǵary mártebeli  Nursultan Nazarbaev myrzaǵa Qurmetti Nursultan Ábishuly, Qa­zaqstan Respýblıkasynyń ulttyq me­­rekesi – Táýelsizdik kúniniń 20 jyl­dyǵyna baı­lanysty shynaıy quttyq­taýymdy qabyl alyńyz. О́tken jyldar ishinde Qazaqstan ekonomıkalyq damýda, halyq­tyń ál-aýqatyn qamtamasyz etýde asa zor jetistikterge qol jetkizdi. Turaqtylyq jáne qoǵamdaǵy ózara túsinistik, zor jaýapkershilikpen júzege asyrylǵan syrtqy saıasattaǵy baǵyt respýblıkanyń halyqaralyq bedeliniń ósýi úshin senimdi negiz boldy. Qazaqstandaǵy júıeli júrgizilgen qaıta qurýlar jáne bizdiń memleketterimizdiń halyqtarynyń dostyq pen tatý kórshilikke negizdelgen dástúri Reseı-Qazaqstan arasyndaǵy strategııalyq áriptes­tik­tiń joǵary qarqynmen damýyna oń áserin tıgizýde. Ekonomıkanyń she­shýshi salalaryndaǵy kooperasııadan keń kólemdegi mádenı-gý­ma­nıtarlyq baılanysqa deıingi ártúrli salalardaǵy birlesken aýqymdy jobalar oıdaǵydaı júzege asyrylýda. Kelisim-quqyqtyq bazany jetildirý jónindegi jumystar eleýli ıgi jemisin berýde. Ǵylymı-teh­nıkalyq baılanys jáne ınnovasııa salalarynda, atom energetıkasy jáne basqa da kóptegen baǵyttarda iri múmkindikter ashylýda. Qoldaǵy múmkindikterdi barynsha is júzine asyrý maqsatyndaǵy qýatty qarqyn TMD, EýrAzEQ, UQShU, ShYU – aımaqtyq birlestikteriniń sheńberinde yntymaqtastyqty turaqty tereńdetýge ıgi yqpalyn tıgizýde. Qazaqstannyń ıntegrasııalyq úderisterdi damytýdaǵy belsendi rólin aıryqsha atap ótkim keledi. Tıimdi jumys istep jatqan Keden odaǵy, Birtutas ekonomıkalyq keńistik qurý jáne Eýrazııalyq ekonomıkalyq odaq qurý jónindegi naqty tájirıbelik qadamdar ózara tıimdi áriptestikti damytýǵa jan-jaqty qolaıly jaǵdaı jasaıdy. Biz alda turǵan josparlardy is júzine asyrý maqsatynda aldaǵy ýaqytta da ózara eń tereń yntymaqtastyq pen baılanysqa daıynbyz. Qazaqstan-Reseı arasyndaǵy odaqtastyq jónindegi salmaqty áleýetti paıdalaný aldaǵy ýaqytta da bizdiń halyqtarymyzdyń ómir sapasyn arttyrýǵa jaǵdaı jasaıtyndyǵyna, búkil eýroazııalyq aımaqta turaqtylyq pen qaýipsizdikti nyǵaıtý mindetterine qyzmet etetindigine senimdimin.   Barak OBAMA, AQSh Prezıdenti. Qurmetti Prezıdent myrza! Qazaqstannyń Táýelsizdiktiń jáne ult egemendiginiń 20 jyl­dy­ǵyn toılaýyna oraı Amerıka Qurama Shtattary halqy atynan eń jyly quttyqtaýymdy jetkizemin. Biz 1991 jyldyń 16 jel­toq­sanynan bastap birlesip kóp­tegen ister atqardyq jáne búgin­de Qazaqstan bizdiń elderimizdiń óńirlik turaqtylyqty alǵa bastyrý, órkendeý men energetıkalyq áriptestigi jolynda birlese jumys isteýdi jalǵastyryp keledi. Sizdiń basshylyǵyńyzben Qazaqstan Aýǵanstandaǵy áskerı operasııalarǵa qoldaý kórsetý úshin Soltústik Taratý Jelisinde mańyzdy ról atqarady. Men Sizdiń Úki­mettiń bizdiń soldattarymyzdy jaqsy qorǵaýdy jáne Aýǵanstandaǵy uzaq merzimdi qaýipsizdik perspektıvala­ryn qamtamasyz etýge kómektesetin dońǵalaqty brondal­ǵan máshıneler men eki jaqty tranzıt týraly kelisimdi qýattaǵany úshin Sizge alǵys bildirgim keledi. Sizdiń kólik ınfraqurylymyn jaqsartý men jas aýǵandyqtardy kásibı oqytýǵa qoldaý jasaýyńyz Aýǵanstannyń damýy úshin nyǵaıtýshy kúsh bolmaq. Men búkil óńirdiń ekonomıkalyq ıntegrasııasyn jáne órkendeýin alǵa bastyrý jóninen birlesken qadamdar jasaýdy jalǵas­tyramyz dep senemin. Osydan 20 jyl buryn Qazaqstanda barlyq ıadrolyq qa­rýdan bas tartyp, búkil halyqaralyq qoǵamdastyq úshin úlgi kórsete otyryp, Siz tarıhı jáne kóregen sheshim qabyl­da­dy­ńyz. Bul baǵyttyń óńirdi jáne búkil álemdi neǵurlym qaýip­siz orynǵa aınaldyrýda kórsetken yq­palyn baǵalamaý múm­kin emes. Taratpaý salasyndaǵy biz­diń keń kólemdi qyzmet­testigimiz áli kúnge deıin jalǵasý­da, ásirese, bizdiń ıadrolyq qaýipsizdik salasyndaǵy yn­ty­maqtastyǵymyz óte tamasha boldy. Men Sizdiń osy máse­lelerdegi uzaq jylǵy tájirıbeńizdi joǵary baǵalaımyn jáne naýryz aıynda Seýlde Sizben kezdesken kezde ıadrolyq qaýipsizdik jónindegi bizdiń maqsattarymyzdy qamtamasyz etýdi qalaı jalǵastyrý kerektigi jóninde Sizdiń oılaryńyzdy estımin dep úmittenemin. Qazaqstan qańtardaǵy saılaý arqyly kóp partııaly Parlamentke kóshýge daıyndalýda. Kandıdattar úshin biregeı oıyn erejesin jáne saılaý úderisiniń ádildigin qamtamasyz etýde Sizdiń basshylyǵyńyz ómirlik mańyzdy bolyp tabylady. О́z ákimshiligimniń alǵashqy jumysynan bastap men ámbebap qundylyqtar men irgeli bostan­dyqtardy moıyndaıtyn elder neǵurlym turaqty bolyp, órkendeı túsedi degen  ilimdi basshylyqqa ala otyryp, demokratııany alǵa bastyrýdy qoldaıtynymdy aıǵaq­ta­dym. Aldaǵy parlamenttik saılaý demokratııalyq damýdyń sabaqtastyǵyn nyǵaıtýǵa múmkindik berip, onyń ózi Qazaqstan úshin aldaǵy 20 jyl men odan keıingi kezeńde qyzmet etetin bolady. Biz Qazaqstanmen jáne Ortalyq Azııamen qarym-qatynastardaǵy betburysty sátte turmyz. Osynaý syn­darly sát bizdiń eki jaqty baılanystarymyzdy ózara syılastyq pen ortaq múddeler negizinde tereńdete túsý turǵysynda jańa perspektıvalar týyndatady. Sizder Qazaqstan tarıhynyń taǵdyrsheshti sátin merekeleýdesizder, soǵan oraı Sizge jáne Qazaqstan halqyna degen meniń eń izgi tilekterimdi qabyl alyńyzdar.   Maıkl HIGGINS, Irlandııa Prezıdenti. Qazaqstan Respýblıkasynyń  Prezıdenti, Joǵary mártebeli  Nursultan Nazarbaev myrzaǵa Irlandııa halqy jáne men Sizdiń elińizdiń ulttyq merekesine baılanysty Sizdiń Joǵary márte­be­ńizge ózimizdiń quttyqtaýymyzdy joldaımyz. Osy múmkindikti paıdalana otyryp, Qazaqstan Respýblıkasynyń halqyna shynaıy baqyt jáne óristi órkendeý tileımin.   Nıkolıa SARKOZI, Fransýz Respýblıkasynyń Prezıdenti. Prezıdent myrza, qymbatty Nursultan! Qazaqstan Respýblıkasy Táý­el­sizdiginiń 20 jyldyq mereı­toı­y­na baılanysty meniń eń jyly lebizderimdi qabyl alyńyz. Qazaqstannyń Sizdiń basshy­ly­ǵyńyzben bulyńǵyr bola­shaqty burynǵy keńestik respýblıkadan halyqaralyq abyroıy kún sanap ósip kele jatqan, etnosaralyq jáne konfessııaaralyq kelisim ústemdik qurǵan, biryńǵaı serpindi damý jolyndaǵy elge aınalý barysynda júrip ótken  joly tań qaldyrady. 2009 jyldyń qazan aıynda maǵan resmı saparmen kelip, Astanany tamashalaý baqyty buıyrdy. Jańa elordalaryńyz osy kórnekti jetistikterińizdiń fýtýrıstik sımvoly bolyp tabylady. Bizdiń turaqty kezdesýlerimiz 2008 jyldyń 11 maý­symynda Parıj qalasynda Sizben qol qoıǵan strategııalyq áriptestik týraly kelisimge óte naqty mazmun engizýge múmkindik berdi. Men 2012 jyl onsyz da qarqyndy, údemeli ekijaqty áriptestikke jańa kókjıekter ashady dep senemin. Prezıdent myrza, qymbatty Nursultan, Sizge degen   shynaıy qurmetimdi jetkizemin.   Krıstıan VÝLF, Germanııa Federatıvtik Respýblıkasynyń Prezıdenti. Prezıdenti, Joǵary mártebeli Nursultan Nazarbaev myrzaǵa Prezıdent myrza, óz atymnan jáne barlyq otandastarymnyń atynan Sizdi jáne Sizdiń halqy­ńyzdy Qazaqstan Respýb­lı­ka­synyń Táýelsizdigi kúnimen shyn júrekten quttyqtaımyn. Qazaqstan Respýblıkasy bıylǵy jyly óz Táýel­sizdiginiń 20 jyldyǵyn atap ótýde. Osy kezeńde Sizdiń elińiz asa zor damý jolynan ótti. Shynaıy maqtan tutatyn qol jetkizgen je­tistikter kóp jáne búkil halyq múddesi úshin Sizdiń eli­ńiz­di odan ári jańǵyrtý jolynda alda da kóptegen mindetter tur. 1991 jyldan bastap bizdiń elderimizdiń arasynda barlyq dárejedegi dostyq baılanystar qalyptasty. Germanııa alǵashqy kúnnen bastap Táýelsiz Qazaqstanǵa belsendi qoldaý jáne járdem  kórsetti. Jańa baılanystardy keńeıtý úshin saıası, ekonomıkalyq jáne mádenı salalarda buryn­ǵy­synsha zor áleýetter bar. Quqyq jáne qundylyqtar týraly saıası únqatysýlardy tereńdete otyryp, Germanııa aldaǵy ýaqytta da Sizdiń memleketińizdiń senimdi seriktesi bolady. Sizge barlyq sáttilikterdi jáne Qazaqstan halqyna beıbitshilik, azattyq jáne gúldený jaǵdaıyndaǵy baqytty bolashaq tileımin.   Abdalla Ben Abdelazız Al Saýd, Saýd Arabııasy Koroldiginiń koroli. ssalaýmaǵaleıkým ýa rahmatýlla ýa barakatý Qazaqstan Respýblıkasynyń Prezıdenti, baýyrym, Joǵary mártebeli Nursultan Nazarbaevqa Qazaqstan Respýblıkasy Táý­el­sizdigine 20 jyl tolý merekesimen barsha hal­qy­mnyń, Koroldik Úkimeti jáne óz atymnan shyn júrekten quttyqtaımyn. Sizge osy ystyq quttyqtaýlarymdy joldaı otyryp, zor densaýlyq pen baqyt tileımin. Sonymen birge Qazaqstan halqyna bolashaqta da damyp, gúldene berýine nıettestigimdi bildiremin. *  *  * Alla jar bolsyn! Assalaýmaǵaleıkým ýa rahmatýlla ýa barakatý Qazaqstan Respýblıkasynyń Prezıdenti, Joǵary mártebeli Nursultan Nazarbaevqa Sizdi Qazaqstan Respýblıkasy Táýelsizdiginiń 20 jyldyq torqaly toıymen quttyqtaımyn. Sizge zor densaýlyq jáne baqyt tileımin. Sizdiń baýyryńyz, Naıf Ben Abdelazız Al Saýd, Saýd Arabııasy Koroldiginiń murager hanzadasy, Premer-mınıstrdiń orynbasary, Ishki ister mınıstri.   Vıktor IаNÝKOVICh, Ýkraına Respýblıkasynyń Prezıdenti. Asa qadirli Nursultan Ábishuly! Qazaqstan Respýblıkasy Táýelsizdiginiń 20 jyldyq merekesimen shyn júregimnen shyqqan quttyqtaýymdy qabyl alyńyz. Qazaqstannyń ındýstrııalyq-ınnovasııalyq baǵdarla­ma­lar aıasyndaǵy reformalar men ınvestısııalyq pers­pek­tıvaly jobalardyń joǵary deńgeıde kórinis taýyp, halyqaralyq arenada úlken bedelge kóterilýi Sizdiń tikeleı jetekshiligińiz ben dana saıasatyńyzdyń arqasynda bolyp otyr. Ýkraına men Qazaqstannyń aldaǵy ýaqyttarda da bizdiń memleketterimizdiń múddeleri jolynda bizdiń halyq­tarymyzdyń dástúrli dostyǵyna berik ózara túsinistik pen áriptestikke negizdelgen ózara tıimdi, jemisti yntymaqtastyǵy budan keıin de nyǵaıa bererine senimdimin. О́zara qyzyǵýshylyq tanytyp otyrǵan birlesken jobalar, onyń ishinde avıaǵaryshtyq, energetıkalyq jáne agrarlyq keshen salasyndaǵy jobalar Qazaqstan men Ýkraınany tıimdi modernızasııalaýǵa ıgi yqpal jasaǵany sózsiz. Sonymen birge bul bizdiń elderdiń halyqaralyq arenadaǵy bedelin kóterip, halyqtarymyzdyń sapaly ómir jaǵdaıyn arttyrady. Sizge shynaıy júrekten jaýapty memlekettik qyzmetińizde tabys jáne zor densaýlyq, sol sııaqty baýyrlas Qazaqstan halqyna gúldený, sáttilik tileımin.   Kıeli Taq Papasy Benedıkt HVI Joǵary mártebeli Qazaqstan Respýblıkasynyń Prezıdenti Nursultan Nazarbaev myrzaǵa Joǵary mártebeli, Qazaqstan Respýblıkasynyń ulttyq merekesi Sizge jáne Qa­zaqstan halqyna beıbitshilik pen órkendeý ıgi tilekterimdi joldaýyma qýanyshty múmkindik týǵyzyp otyr. Elińizdiń Táýelsizdiginiń 20 jyldyǵyna oraı, Ja­ra­týshy elińizdiń turǵyndarynyń neǵurlym úılesimdi ári ádiletti qoǵam qurýyna qýat berip, olardyń otbasylyq, áleýmettik jáne ulttyq ómirleri nurly bolyp, mádenı jáne rýhanı qundylyqtardy qurmetteýdi násip etsin dep tileımin. Joǵary mártebeli, Sizge jáne eldiń barlyq azamattaryna Jaratqannan shapaǵat tileımin.   Aleksandr LÝKAShENKO, Belarýs Respýblıkasynyń Prezıdenti. Qurmetti Nursultan Ábishuly! Belarýs halqynyń jáne jeke óz atymnan Sizdi Qazaqstan Res­pýblıkasynyń jańa tarıhyn­daǵy aıtýly kúnmen – Táýel­siz­diktiń 20 jyldyǵymen shyn júrekten quttyqtaımyn. Qazaqstan halqynyń eńbek­súıgishtigi men patrıotızminiń arqasynda Sizdiń elińiz osy jyldar ishinde óńirlik jáne jahandyq qaýipsizdikti qamtamasyz etýde, postkeńestik keńistikte ıntegrasııalyq úderisterge mańyzdy úles qosýda, Qazaqstanǵa halyq­aralyq qatynastardyń bedeldi qatysýshysy ımıdjiniń bekýinde, áleýmettik-ekonomıkalyq damýda jáne memleketti nyǵaıtýda aıtarlyqtaı tabystarǵa qol jetkizdi. Osyndaı úlken jetistikterge qol jetkizý, Qazaqstannyń qazirgi zaman progresi jolynda Tuńǵysh Prezıdenttiń úlken jeke úlesiniń arqasynda múmkin bolǵandyǵy shúbásiz. Sizdi «Halyq Qaharmany» mártebeli memlekettik  nagradasyna  usynýdyń ózi úlken eńbegińizge degen joǵary baǵa dep túsinemin.   Emomalı RAHMON, Tájikstan Respýblıkasynyń Prezıdenti. Qurmetti Nursultan Ábishuly! Sizdi jáne dostas Qazaqstan halqyn Táýelsizdiktiń jıyrma jyldyq mereıtoıymen shyn júrekten quttyqtaımyn! Táýelsizdik jyldary ishinde Qa­zaqstan óziniń áleýmettik-eko­nomıkalyq jáne saıası damýynda Sizdiń kóshbasshylyǵyńyzben úlken tabystarǵa qol jetkizdi, halyqaralyq arenada óz abyroı-bedelin bekitip, bıiktete tústi. Dástúrli dostyq ráýishtegi jáne ózara tıimdi tájik-qazaq qarym-qatynastary keleshekte de eki el men halyq ıgiligine qyzmet ete beretinine senimdimin. Sizge, qurmetti Nursultan Ábishuly, baqyt jáne myqty densaýlyq, al dostas Qazaqstan halqyna – jaqsylyqtar men órkendeý tileımin!   Ivo IOSIPOVICh, Horvatııa Respýblıkasynyń Prezıdenti. Qazaqstan Respýblıkasynyń Prezıdenti, Joǵary mártebeli Nursultan Nazarbaevqa Joǵary mártebeli Nursultan Ábishuly! Qazaqstan Respýb­lı­kasynyń Táýelsizdik merekesine baılanysty Sizdi jáne halqy­ńyzdy Horvatııa Respýblıkasy azamattary jáne óz atymnan shyn júrekten quttyqtaǵym keledi. Elińizdiń qarqyndy úderisine baılanysty azamattaryńyzǵa eń jaqsy tilekterimizdi jetkizemin. Joǵary mártebeli, Sizge degen jeke qurmetimdi qabyl alyńyz.   Nadjıb Mıkatı, Lıvan Respýblıkasynyń Premer-mınıstri. Joǵary mártebeli Qazaqstan Respýblıkasy Prezıdenti, qurmetti Nursultan Nazarbaev myrza! Men dostas Qazaqstan Respýb­lı­kasynyń 20 jyldyq táýel­siz­dik merekesine jáne elińizdi 20 jyl basqarý mereıtoıyna oraı quttyqtaýlarymyz ben izgi lebiz-tilekterimizdi jetkizsem deımin.  Men Sizdiń sarabdal basshylyǵyńyzdyń nátı­je­sinde eldegi turaqtylyq pen damý, órkendeý tek bekı túsetinine senemin. Osy eki erekshe oqıǵalarǵa baılanysty Lıvan men dostas Qazaqstan Respýblıkasyn baılanystyratyn tereń dostastyqqa arqa súıeı otyryp, biz eki el men halyqtarymyzdyń ıgiligi úshin senim men áriptestigimizdi arttyra túsýge umtylatynymyzǵa sendirgim keledi. Joǵary mártebeli Prezıdent, meniń eń izgi tilekterim men jyly lebizimdi, qurmetimdi qabyl alyńyz.   Mahmud ABBAS, Palestına memleketiniń Prezıdenti,  Palestınany azat etý uıymy Atqarýshy komıtetiniń tóraǵasy Palestına Ulttyq Ákimshiliginiń Basshysy. Joǵary mártebeli Nursultan Nazarbaev Qazaqstan Respýblıkasynyń Prezıdenti Qazaqstan Táýelsizdiginiń 20 jyldyq mereıtoıyna oraı ózimniń jáne barsha Palestına halqynyń atynan ystyq yqylasqa toly shynaıy quttyqtaýymdy joldaý men úshin zor qýanysh. Osy oraıly sátte Sizge, Úkimetińizge, dostas halqyńyzǵa jáne memleketińizge gúldený men órkendeý tileımin. Bizdiń uzaq jyldarǵa sozylǵan kúresimiz barysynda kórsetken aǵaıyndyq qoldaýyńyz ben Palestına halqymen tilektestigińizdi joǵary baǵalaıtynymyzdy atap ótkim keledi. Memleketterimiz arasyndaǵy aǵaıyndyq qarym-qatynastar men ózara iltıpatqa negizdelgen baılanystardy halyqtarymyzdyń ıgiligi úshin odan ári damytýǵa múddeligimizdi qýattaımyn. Sizge, Joǵary mártebeli, zor densaýlyq pen baqyt, al dos­tas Qazaqstan halqyna órleý men qut-bereke tileımin. Ramalla, 2011 j. 13 jeltoqsan.   Joze Manýel BARROZÝ, Eýropalyq Komıssııanyń tóraǵasy. Qazaqstan Respýblıkasynyń Prezıdenti, Joǵary mártebeli  Nursultan Nazarbaev myrzaǵa Qurmetti Prezıdent myrza, Men úshin Sizdi jáne Qazaqstan Res­pýblıkasynyń barlyq azamat­ta­ryn 1991 jyly 16 jeltoqsanda ja­rııa­lanǵan Táýelsizdiktiń 20 jyl­dy­ǵy­men quttyqtaý úlken qurmet jáne zor qýanysh. Qazaqstan osy tarıhı oqıǵa bolǵan sátten saıası, ekono­mı­kalyq jáne mádenı salalardyń halyqaralyq sahnasynda ózin qalyptastyrý, damytý jáne nyǵaıtý jolynda teńdessiz kúsh-jiger tanytty. Men Eýropalyq odaqtyń ekijaqty ynty­maq­tastyq jáne bizdiń  ózara baılanystarymyz arqyly osy progressıvti baǵyttyń ornyǵýyna ózindik úlesimizdi qosqanymyzǵa qýanyshtymyn. Osy aıtýly oqıǵaǵa baılanysty meniń Eýropalyq odaqtyń Qazaqstan Respýblıkasynyń jáne onyń azamattarynyń árqa­shan dosy jáne seriktesi bolatyndyǵyn taǵy da atap ótkim keledi. Bizdiń qoldanystaǵy Áriptestik jáne yntymaqtastyq týraly kelisimdi is júzine asyrýdaǵy jáne Áriptestikti damytý jó­nin­degi jańa kelisim boıynsha kelissózder júrgizýdi iske asyrý jo­lyn­daǵy baılanysymyz ózara qarym-qatynasymyzdy nyǵaı­týǵa jáne tereńdetýge múmkindik beredi. Sonymen birge, Qazaq­stannyń úlesi óte mańyzdy bolyp otyrǵan Ortalyq Azııadaǵy bizdiń strategııamyzdyń rýhy boıynsha baılanysymyzdy odan ári nyǵaıta bermek. Qazaqstan Respýblıkasyndaǵy, sonymen birge Eýropalyq odaqtaǵy negizgi reformalardy damytý, Eýro­palyq odaq jáne EO-ǵa múshe memleketter ınstıtýttaryn qoldaý jónindegi atqarylyp jatqan bastamalarǵa biz únemi qoldaý kórsetemiz. Bul reformalyq úrdister Sizderdiń elderińizge demokratııalyq ekonomıkalyq jáne áleýmettik damý jáne halyqtyń ál-aýqatyn jaqsartý jolynda alǵa qoıǵan maqsattaryńyzǵa jetýge ıgi yqpalyn tıgizetin bolady. Sizge jáne Qazaqstan Respýblıkasynyń barlyq azamat­taryna baqyt jáne sáttilik tilegen meniń shyn júrekti sezimimdi qabyl alyńyz.