Merekege tamasha syılyq

Táýelsizdik merekesi qarsańynda A.Baı­tursynov atyndaǵy Qostanaı memlekettik ýnıversıtetinde jaǵymdy jańalyq boldy. Ýnıversıtette úzdik tehnologııamen salyn­ǵan zamanaýı sport kesheni paıdalanýǵa berildi. 150 mıllıon teńgege túsken bul qurylysty ýnıversıtet óz qarjysyna, óz kúshimen saldy. Elbasy Nursultan Nazarbaev Qazaqstan halqyna Joldaýynda salamatty ómir sal­tyn nasıhattaý kerektigine jáne halyqtyń 30 paıyzyn sportqa tartýǵa erekshe mańyz bergen bolatyn. – Jańa sport kesheni jastardyń betin sportqa aýdarýǵa jáne buqaralyq sport túrleriniń keń jaıylýyna ózindik úlesin qosady degen senimdemin, – deıdi ýnıversıtet rektory Asqar Nametov. Jańa sport kesheni stýdentterdiń dene­shynyqtyrý sabaǵynyń ótýine laıyqtalǵan. Onyń ishinde oıyn alańy, trenajer zaly, kórermender orny, kıim aýystyratyn, jýy­natyn, sanıtarlyq bólmeler bar. Sonymen qatar sport keshenine jasandy kilem tósel­gen jazǵy oıyn alańy da kiredi. Bul bilim ordasyndaǵy birinshi sport kesheni emes. Qalanyń KJBI shaǵyn aýda­nynda ornalasqan jaratylystaný fakýltetterinde jalpy sport sharalaryna arnal­ǵan jáne kúres, tennıs zaldary, shahmat klýby bar. Endi qalanyń ortalyǵynda ornalasqan fakýltetterdiń oqytýshylary men stýdentteri sportzal úshin Qostanaıdyń ekinshi shetine at sabyltpaıtyn bolady. Jataqhanada jatatyn stýdentter úshin jańa sport kesheni qarǵa adym ǵana jerde ornalasqan. Ýnıversıtettegi sport kesheniniń ashy­lýyna kelgen oblys ákimi Sergeı Kýlagın qalalar men aýdandarda berilip jatqan turǵyn úılerdiń aýlasynda osyndaı sport alańdary men keshenderi qosa salynýy kerektigin aıtty. Qostanaı qalasynda onyń jarqyn mysal­dary qazirdiń ózinde bar. Jańadan salynǵan «Naýryz» shaǵyn aýdanyndaǵy sport alańy turǵyndardyń ıgiligine aınalǵan. Ýnıversıtet ujymy Táýelsizdik merekesi qarsańynda ózderine osyndaı tamasha syılyq jasady. Názıra JÁRIMBETOVA, Qostanaı.