Bolashaq tiregi jastar

Eldiń erteńi – jastar. Olar myqty bolsa, bilimdi, sanaly bolsa, memlekettiń bolashaǵy jarqyn, keleshegi kemel. Sol jastar Táýelsizdiktiń 20 jyldyǵy qorytyndylanyp jatqanda ne deıdi, qandaı problemalary bar, ne tyndyrdy, bolashaqtaǵy josparlary qandaı degenge kelsek, Ońtústik Qazaqstan memlekettik pedagogıka ınstıtýtynda Táýelsiz­diktiń 20 jyldyǵyna arnalǵan jastar forýmy bolyp ótti. Oǵan qalalyq jastar ortalyǵy, “Jas Otan”  jastar qanaty, Ctýdentter Alıansy ókilderi, “Báıterek” qoǵam­dyq birlestiginiń músheleri jáne pedagogıka ınstıtýtynyń stýdentteri qatysyp, ózekti máselelerdi talqylady. Onda­ǵy kóterilgen máseleler týraly aıtar bolsaq, Táýelsiz­diktiń 20 jyldyǵynda Qazaqstan qandaı belesterden ótti, oǵan jastar qandaı úles qosty. Eldiń saıası-ekonomıkalyq jaǵdaıy, erteńgi bolashaǵy, búgingi atqarylyp jatqan jumystar tarazylandy. Ońtústik Qazaqstan oblysynyń 14-29 jas aralyǵyndaǵy turǵyndaryn esepke alǵanda, oblystyń 30 paıyzyn jastar quraıdy eken. Iаǵnı, úlken kúsh, úlken múmkindik. Shymkent qalalyq jastar odaǵynyń tóraǵasy Zańǵar Úsipahmetov te Qazaqstandy órkendetýde jastardyń jumyla kúsh qosýy úlken belesterge jetkizetindigin aıtty. Eki myńynshy jyldardyń basynda stýdentterdiń shá­kirt­­aqysy 1700 teńge bolsa, qazir 15000 teńgege jetti. Úki­met taǵy da kóterý nıetinde. Jumyssyzdyqpen kúres baǵdarlamasy qabyldandy. “Jol kartasy – 2020”, “Dıplommen – aýylǵa” baǵdarlamalary jastar úshin jaqsy jumys istedi, úlken múmkindikterge jol ashty. OQMPI-diń jastar isi jónindegi komıtetiniń tóraǵasy Nurken Aralbekov memleket tarapynan qabyldanǵan kadrlyq rezerv júıesiniń jastardy yntalandyrýda úlken ról atqarǵandyǵyn aıtady. 2009 jyly osy ınstıtýtta rezervke 70 adam múshe bolsa, aldy memlekettik mekemelerde tabysty jumys istep jatyr eken. Basqosýda, sondaı-aq  búgingi kúni ózekti máselege aınalyp otyrǵan elimizge jat dinı aǵymdardyń áserinen jastardy arashalaý máselesi de kóterildi. Baqtııar TAIJAN, Shymkent.