Astana eýropalyq sapa sertıfıkatyn aldy

Tórtkúl dúnıeni túgel moıyndatqan Astana qalasy Táýelsizdigimizdiń 20 jyldyq torqaly toıy ótip jatqanda taǵy da bir úlken jetistikke jetti. 2011 jyldyń 19 jeltoqsanynda Brıýssel qalasynda ornalasqan Eýropalyq sapa menedjmenti qorynyń shtab-páterinde Astana qalasy mýnısıpalıtetine (ákimdigine) «Tanylǵan Jetistik» sertıfıkatyn tapsyrý rásimi bolyp ótti. Osy rásim barysynda EFQM-niń bas dırektory Per Kashe Astana qalasy ákiminiń orynbasary Erlan Qojaǵapanovqa saltanatty jaǵ­daı­da atalmysh sertıfıkatty tap­syr­dy. Ol óz sózinde EFQM-niń «Ta­nylǵan Jetistik» atty sertı­fıkaty Qazaqstan elordasy ákim­di­giniń Eýropada keńinen ta­nylǵan basqarý sapasynyń stan­dart­­tary­na saı jumys júrgizý jónindegi um­tylysyn aıǵaqtaı­dy dep atap kórsetti. Sóıtip, Astana qalasynyń ákim­­digi Qazaqstan Respýb­lı­ka­synda Eýropalyq sapa menedjmenti qory­nyń sertıfıkatyna ıe bolǵan birinshi memlekettik organ bolyp tanyl­dy. Astana ákimdegi halyqaralyq bedeldi qordyń osyn­daı joǵary baǵasyna ıe bol­ǵan tórtinshi mýnısıpalıtet bo­lyp otyr. Dástúr bo­ıynsha, EFQM ser­tıfıkatyna kom­mer­sııalyq kásip­oryndar ıe bola­tyn. Alaıda sońǵy jyldary EFQM iskerlik jetistikteriniń modelin aıqyndaý maqsatynda bul sertıfıkatty bu­qaralyq sektor­lar­ǵa, onyń ishinde memlekettik basqarý salasyna da bere bastady. 2008 jyly EFQM sertıfıkatyna túriktiń Býrsa qa­lasy, 2011 jyly Polshanyń Djerjonıov, 2011 jy­ly Ispanııa­nyń Kıýdad qala­lary ıe bolǵan bolatyn. Sertıfıkat tapsyrý salta­na­tynda Astana ákimdiginiń EFQM-niń eýropalyq aldyńǵy qatarly uıymdar reestrine kirgendigi atap kórsetildi. О́z kezeginde bul qala­nyń ımıdjin arttyrýǵa yqpal etetindigi daýsyz. «Biz úshin sońǵy jyldary ákim apparatyna Jetistiktiń irgeli tu­jyrymdamalaryn, Jetistik ól­shem­derin, sonymen birge RADAR óz-ózine baǵa berý tetikterin, memlekettik organ eńbekkerleri­niń qyz­metine baǵa berý jumysyn engizdik», dedi rásimde sóılegen só­zinde Astana qalasy ákiminiń orynbasary Erlan Qojaǵapanov. Onyń aıtýynsha, EFQM tarapy­nan júrgizilgen táýelsiz baǵa berý jú­ıesi qala ákimdigine óz jumy­syna syn kózben qaraı otyryp, jumys­tyń kúshti jáne jetildirýdi qajet etetin álsiz tustaryn anyqtaýǵa múmkindik bergen. Sonymen birge, ishki rezervterdi eskere kelip, bas­qarý tıimdiligin jetildirip, múd­deli barlyq tarap­tar­dyń surany­myn qanaǵattan­dyratyn qyzmetti damytýǵa jol ashqan. Astana qalasy ákimdiginiń sapa menedjmenti baǵasyn anyq­taý­ǵa EFQM músheleri, asessorlar Tadeýsh Býchash, Andrıano Rýchını, Azat Abdarhmanov, Oleg Kaınazarov qa­tysqan. Olar Qazaq­stan elordasy ákimi apparatynyń jáne onyń 11 qalalyq basqar­ma­lary men qury­lymdarynyń ju­my­syn jan-jaqty zerttep, saraptaýdan ótkizdi. Bul saraptaýlar Qor ádistemesinde belgilengen 9 krıterıı boıynsha júr­gizildi. Olar: kóshbasshylyq, strategııa, personaldar, áriptestik jáne resýrstar; úderister, ónimder jáne qyzmet kórsetý; tutynýshylar úshin jetistik, qyzmetkerler úshin jetistik, qoǵam úshin jetistik; sheshýshi qorytyndylar. Eýropalyq sapa menedjmenti qorynyń «Tanylǵan Jetistik» ser­tı­fıkatynyń berilýi – Astana qa­lasy ákimdiginiń  qala turǵyn­dary­nyń turmys jaǵdaıyn jaq­sartý maqsatyndaǵy júıeli de tabandy júrgizilgen jumysynyń jemisi. Qala ákimdigi aldaǵy ýa­qytta osy jetistik ıgiligin nyǵaıta otyryp, bıik belesterden kórine bermek. Jylqybaı JAǴYPARULY.