Oılanyp-tolǵana kele, soltústiktiń jurtyna ne qat ekendigin aqyl tarazysyna salǵan. Aqyry jylyjaı salsam degen sheshimge keldi. «Damý» qorynan 10 mıllıon teńge nesıe alǵan. Onysy jetpeı qalyp, ákesiniń qaltasyn da shamalap qaǵady. Aqyry jarty gektar jerge tap-tuınaqtaı etip jylyjaı salyp, Konstantın kásipti bastap ketedi.
Buryn-sońdy tájirıbesi bolmaǵandyqtan, qysy-jazy ónim beretin jylyjaıdyń qurylysyn ınternetten izdegen. Halyqtyq tájirıbege de súıendi. Aqyr sońynda kisi boıy orlap qazyp, joǵarǵy jaǵyn kúmbezdep polıkarbonatpen qaptady. Orlanǵan tómengi jaqqa qos qabattan jylý qubyryn júrgizdi. Pesh saldy. Aýyzeki tilde «samaýyr» dep atalatyn qos qaptaly, tómengi jáne joǵarǵy jaǵy sýǵa tolyp turatyn peshke ystyq sýdy qýalaıtyn nasos ornatty. Al qystygúni kókónisterin sýaratyn sýdy peshtiń ústindegi ydysta jylytyp alady. Bylaı qaraǵanda tym qarapaıym.
– Osyndaı jumys isteý úshin asa kóp bilimniń keregi joq, – dep kúledi Konstantın Nıkolaevıch. Tek ynta bolsa bolǵany. «Memlekettiń qamqorlyǵynyń arqasynda qazir turmysymyz táýir. Jylyjaıdan táýligine 250-300 keli shamasynda ónim alamyn. О́nim ótkizýde eshbir qıyndyq joq. Aýdan ortalyǵy, tipti, Stepnogorsk qalasy men Astanadan da tapsyrystar túsip jatady», deıdi kásipker.
Aýyldastarynyń dastarhanyna da jas kásipkerdiń ónimi qoıylyp jatyr eken. Jer bar, sý jetkilikti, kókóniske kerekti kóń degenińiz taý-teńiz. Sonda aýyl turǵyndarynyń óz baqshalarynda kókónis ekpeı, Konstanınnen kelisin úsh júz teńgege nege satyp alatyndyǵyn túsinip kórińiz endi?
Qysta kókónistiń baǵasy tipten sharyqtaıdy. Ásirese jańa jyldyń aldynda qasqaldaqtyń qanyndaı taptyrmaıdy. Qara jumysqa qajyrly Konstantın eki jylǵa jeter-jetpes ýaqytta eptep eńsesin basqan qaryz ataýlydan birjola qutylǵan. Qazir qysylǵan janǵa qol ushyn beretin qaýqary bar.
Jalǵyz jylyjaı ǵana emes, onymen qosa bal arasyn da ustaıdy eken. On eki uıa. Árqaısysynan shamamen maýsymyna 200 myń teńgeden kiris kiredi. Jylyjaıdyń janynda jasyl shalǵyn jaıqalyp, alýan túrli gúl kóz jaýyn alyp samsap tur. Qujynaǵan, bal jınaǵan jumysshy aranyń jumyla kirisken ortaq isine kóziń súısinedi. Beıneleı aıtsaq, ómirden óz kásibin tapqan Konstantınniń tirshiligi tárizdi.
Baıqal BAIÁDIL,
«Egemen Qazaqstan»
Aqmola oblysy,
Birjan sal aýdany
