Búginde Taraz qalasyndaǵy «Úmit» balalar úıinde bes jasqa deıingi jetpis búldirshin tárbıelenýde. Al osy balalardyń jaǵdaıy qalaı deıtin bolsaq, kúmiljip qalatynymyz anyq. Olaı deıtinimiz, jýyrda Jambyl oblysynyń ákimi Asqar Myrzahmetov atalǵan balalar úıine tosynnan barǵanda birqatar kemshilik anyqtalǵan bolatyn. Áýeli ákim mekemeniń ashanasyna bas suǵyp, mundaǵy azyq-túlik taǵamdarynyń jetispeýshiligin baıqaǵan edi. Sonda bul balalar ne iship, ne jep júr? Memleketten bólingen qarajat qaıda? Árıne, mekeme basshysynan bastap qyzmetkerlerine deıin eshqandaı mardymdy jaýap bere alǵan joq. Sonda basshylar keletin bolsa ǵana bárin jaınatyp, qalǵan ýaqytta osylaı júre berý kerek pe degen oı keledi. Tekseris kezinde ǵana emes, árdaıym talapqa saı qyzmet etýge mindetti emes pe? Al ákimniń keletinin bilmeı dymy quryǵan mekeme basshylyǵynan ne kútýge bolady? Demek, balalardyń kúndelikti kúnkórisi kóńildegideı emes degen sóz.
Taǵy bir mysal, Taraz qalasyndaǵy 170 adamǵa qyzmet kórsetip otyrǵan №1 arnaýly áleýmettik qyzmetter usyný ortalyǵynda syrqattanǵan qarttardyń em-domyna qajetti dári-dármekter jetispeıdi. Bul rette mekeme qyzmetkerleriniń abdyrap, áýre-sarsańǵa túskeninen basqa eshteńe de bolǵan joq. О́ńir basshysyna qarııalar ınvataksı kerektigin aıtyp jatty. Ákim tosynnan kelgende mundaı jaıttar Q.Sarymoldaev atyndaǵy balalar úıinde de anyqtalǵan edi. Atalǵan balalar úıiniń tárbıelenýshilerine monsha kerek. Basshy kelgende ǵana bas kóterip, qalǵan ýaqytta buǵyp otyra beretin mekeme qoǵam damýyna qandaı úles qosa alady. Áleýmettik mekemelerdi tosynnan aralaǵan ákim qoǵamnyń bul toptary qashanda meıirimge muqtaj ekenin, olarǵa kórsetiletin qyzmettiń de minsiz bolý kerektigin aıtyp ketti. Endi jaýapty basshylar jaıshylyqta da talapqa saı jumys atqarsa jaqsy ǵoı...
Hamıt ESAMAN,
«Egemen Qazaqstan»
Jambyl oblysy
