Saltanatty rásimge Azıada aldyndaǵy sońǵy jattyǵý jıyndaryn Almatyda ótkizgen sporttyq gımnastıka, sadaq atý, nysana kózdeý, stend atý, erkin kúres, sporttyq quzǵa órmeleý, sý doby jáne voleıbol komandalary qatysty.
«Qurama komandalar Azıadaǵa daıyndalý úshin UOK Mádenıet jáne sport mınıstrligimen birlese otyryp, barlyq múmkindik jasady. Qazaqstan UOK prezıdenti Tımýr Asqaruly Qulybaev sportshylardy keshendi-ǵylymı toptarmen, tehnıkalyq mamandarmen qamtamasyz etip, olımpıadalyq sport túrleri boıynsha oqý-jattyǵý jıyndaryn tolyqtaı ótkizýdi óz baqylaýyna aldy. Biz bul eńbek aqtalyp, óz jemisin beredi dep úmittenemiz. Qazaqstan atletteri qurlyqtyq dodada dástúrli túrde úzdikter qatarynan kórinedi. Sondyqtan, sportshylarymyz bıylǵy oıyndarda da jankúıer qýanyshyn eseleı túsedi dep senemin», dedi Qazaqstan UOK bas hatshysy Eldos Ramazanov.
Jazǵy Azııa oıyndary 18 tamyz kúni bastalady. Atalǵan oıyndarǵa Qazaqstan ulttyq quramasy atynan 440 sportshy qatysady, onyń ishindegi 404 sportshy 25 olımpıadalyq sport túrinen baq synaıdy.
Djakartadaǵy (Indonezııa) Azııa oıyndarynda jalpy esebi 462 medaldar jıyntyǵy sarapqa salynady, onyń ishinde 363 júlde olımpıadalyq sport túrlerinen óz ıesin tappaq. Taǵy bir aıta keterligi, bıyl Azııa oıyndarynyń baǵdarlamasynan nysana kózdeý jáne stend atýdan komandalyq jarys pen bokstan erler arasynda aýyr salmaq dárejeleri (81 keli, 91 keli, +91 keli) alynyp tastaldy.
Qurlyq dodasy Djakarta jáne Palembang qalalarynda ótedi. Atletıkalyq aýyldar eki qalada da ornalasqan.
Djakartada sporttyń myna túrlerinen jarys ótedi: jeńil atletıka, boks, dzıýdo, kúres túrleri, velosport (trek, shosse, maýtınbaık), sý doby, qazirgi bessaıys, taekvondo, semserlesý, karate, regbı, sýda júzý, gandbol, sınhrondy júzý, sadaq atý, kórkem gımnastıka, jelkendi sport, kógaldaǵy hokkeı, eskek esý (slalom), sporttyq gımnastıka, voleıbol, golf, basketbol, basketbol 3h3, batýtta sekirý.
Palembangta sporttyń myna túrlerinen jeńimpazdar anyqtalady: akademııalyq esý, baıdarka men kanoede esý, nysana kózdeý, stend atý, trıatlon, jaǵajaı voleıboly, sporttyq quzǵa órmeleý, tennıs.
Atletıkalyq aýylda resmı túrde Qazaqstan baıraǵyn kóterý rásimi 16 tamyz kúni Djakartada ótedi. Palembangtaǵy atletıkalyq aýylǵa birinshi bolyp akademııalyq esýshiler komandasy attandy. Búgin, 12 tamyz kúni gandbol, sý doby jáne basketboldan áıelder komandasy, sondaı-aq, grek-rım kúresiniń balýandary barady. Indonezııaǵa barlyq sportshylar aldyn ala bekitilgen keste boıynsha sapar shegedi.
Qazaqstan quramasynyń barlyq sportshylary keshendi-ǵylymı top mamandarymen jabdyqtalǵan. Atalǵan top músheleri Qazaqstan UOK bastamasymen olımpıadalyq sport túrindegi komandalarmen jumys isteı bastady. Djakarta men Palembangta dárigerler shtaby, psıhologtar men kezekshi massajshylar táýlik boıy qyzmet etedi. KǴT mamandary alǵash ret jarys kezinde ulttyq qurama sportshylaryna kásibı kómek kórsetpek.
Azııa oıyndary 18 tamyz ben 2 qyrkúıek aralyǵynda ótedi. Qazaqstan týyn boksshy Ábilhan Amanqul kóterip shyǵady.
