«100 jańa esim» jobasynyń maqsaty – tabysty, básekege qabiletti bolý, pragmatızm men bilim kýlti ıdeıalaryn, Táýelsizdik jyldary Qazaqstannyń damýyna eleýli úles qosqan adamdardyń ómirbaıanyn úlgi ete otyryp nasıhattaý. Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynda basa nazar aýdarylǵan jastar máselesi de qoǵam talqysynan tys qalmaǵan bolatyn. Qalyń el qoldaǵan sol baǵdarlamalyq maqalada aıtylǵan ár másele jeke-jeke qaralyp, ár tapsyrma jiti qadaǵalaýmen iske asyp keledi. Sonyń bir tarmaǵy retinde «100 jańa esim» jobasy da iske qosylǵan bolatyn. О́tken jyly atalǵan jobaǵa 2 myńnan asa ótinim qabyldanyp, onyń 302-i irikteý kezeńinen ótip, 102 úmitker «Qazaqstannyń 100 jańa esimi» jobasynyń jeńimpazy atanǵan, Elbasy ózi qabyldap, arnaıy kezdesý ótkizgen bolatyn. Bul jobanyń basty máni keıingi tolqyndy eńbekke, bilimge, iskerlik pen adaldyqqa qushtar etý ekendigi de basa aıtylyp keledi. Bıylǵy ekinshi kezeńniń ózindik ereksheligi bar.
«Osydan bir jarym jyl buryn Elbasynyń jańa zamandaǵy trendter men jańa baǵyttarǵa sáıkes jastardyń sana-sezimine, rýhanı dúnıesine qozǵaý salǵan maqalasy shyqty. Bul maqala bizdiń elimizdegi qoǵam ókilderiniń arasynda qyzý qoldaý tapty. Sońǵy jyldarda kezdespeı ketken azamattyq qoǵam men bıliktiń arasynda dıalog ornady. Sol rýhanı jańǵyrý maqalasy aıasynda «100 jańa esim» baǵdarlamasy iske asqan bolatyn. Múlde basqa baǵyt, jańa tehnologııa arqyly júzege asty. Táýelsizdik jyldary qazaq qoǵamynyń damýyna zor úles qosqan azamattar tańdaldy. Áleýmettik optımızmniń arqasynda tańdalǵan jańa tulǵalarymyz qoǵamǵa úles qosady deýge negiz bar. Azamattyq qoǵamnyń tarapynan 100 jańa esimdi ári qaraı jalǵastyrsaq degen usynystar boldy. Qazaq qoǵamynyń damýyna úles qosyp kele jatqan azamattar 100-den kóp degen pikirler aıtylǵan soń, soǵan sáıkes jańa esimderdi izdesek degen qoǵamdyq tapsyrys bolyp otyr. 100 jańa esimniń ekinshi kezeńin bastaǵaly otyrmyz. Bul jastardyń arasyna jańa baǵyt, rýhanı dúnıelerge jańa serpin ákeledi dep oılaımyn. Ártúrli taǵdyrlardy jastarǵa úlgi etip kórsetip, jaqsy jaǵynan usynamyz» dedi Kásipodaqtar federasııasy tóraǵasynyń orynbasary Erlan Saırov.
«100 jańa esim» Qazaqstanda erekshe talantty jáne tulǵalyq sıpatqa ıe adamdardy izdep, jobaǵa belsene qatysýǵa shaqyryp otyr. Atalǵan joba kásibı salada jetistikke jetken, óz dara joly ózgege ónege bolatyn adamdarǵa arnalǵan. Osymen ekinshi jyl uıymdastyrylyp otyrǵan jobanyń bıylǵy erekshelikterine kelsek, úmitker ózin ózi usynýǵa jáne úmitkerdi uıym atynan usynýǵa bolady. Sonymen qatar úkimettik emes uıymdar ókilderine basymdyq beriletini aıtyldy. Sol sııaqty ótken jylǵy irikteý kezeńinen ótpeı qalǵan úmitkerler bıyl taǵy da ótinim berýge quqyly. О́tinim osy jyldyń qazan aıynyń ortasyna deıin 100esim.el.kz saıty arqyly qabyldanady, odan ári qarasha aıy boıy onlaın daýys berýge jalǵasady. «100 jańa esim» jobasynyń jańa maýsymyn ashyq dep jarııalaımyz. Úmitkerdi tańdaýda qoıylatyn basty talap, ol adamnyń táýelsiz elimizdiń damýyna óz úlesin qosýy. Úmitkerlerdi anyqtaýda qazylar alqasy bolmaıdy, laıyqty degen azamatty ne azamatshany halyq daýys berý arqyly ózi tańdaıdy», dedi «Qazkontent» AQ-tyń basqarma tóraǵasy Evgenıı Kochetov.
Qyzmet salasy boıynsha uıymdar tobynyń keńinen tanystyrylýyn qamtamasyz etý, sondaı-aq azamattyq bastamalardy nasıhattaý maqsatynda jobanyń jańa úmitkerlerin tańdaý ınstıtýsıonaldyq ádistermen júrgiziledi. Ár qoǵamdyq uıym, birlestik erekshe tarıhy men kásibı jetistikteri bar úmitkerlerin usyna alady. Úmitkerlerge qoıylatyn negizgi talap mynadaı:
• úmitkerdiń kámelet jasqa tolǵan bolýy (18);
• qyzmet salasynda eldiń jaǵymdy ımıdjin qalyptastyrýǵa úles qosqan aıryqsha jetistikteriniń, qatysýshy ımıdjin damytýǵa yqpal etetin tulǵalyq qasıetteriniń bolýy;
• úlgi alýǵa laıyq, jastardy patrıottyq jáne týǵan jerge adaldyq rýhynda tárbıeleýge, eńbek kýltin qalyptastyrýǵa yqpal etetin qoǵamdyq-saıası jáne eńbek qyzmetiniń bolýy;
• Qazirgi Qazaqstannyń damýyna qosqan naqty úlesiniń bolýy.
• Qazirgi Qazaqstannyń, onyń tabystary men túrli saladaǵy jetistikteriniń jarqyn úlgisi bola alatyn tulǵa;
«100 jańa esim» jobasynda úkimettik emes uıymdarǵa basymdyq berilýi – úlken senim men qoldaý. Laıyqtylar, árıne, kóp. Sonyń ishinen 100 esimdi anyqtaý barynsha ádil ótýi tıis. Sol úshin úkimettik emes uıymdardyń qyzmetine basymdyq berý qajet. Qazaqstan halqynyń kóbi aýylda turady. Sol sebepti aımaqtaǵy talantty jastardy, azamattardy anyqtaý úshin osy uıymdar barynsha atsalysady dep oılaımyn», dedi Dáýren Babamuratov.
«100 jańa esim» jobasy qazaq qoǵamyna, ıa jastaryna ne beredi? Onyń mańyzdylyǵy nede? Osy suraqtarǵa da baspasóz jıynynda jaýap berildi. Bul qazaq qoǵamynyń optımıstik sanasyn damytýǵa, qazaq jastaryna úlgili el azamattaryn kórsetýde mańyzdy qyzmet atqaratyn joba. El úshin ter tógip júrgen zamandastarymyz elenýge de, qurmettelýge de laıyq.
Baǵashar TURSYNBAIULY,
«Egemen Qazaqstan»
