Aıtpaǵymyz, ASKHAT brendimen tigilip, saýdaǵa túsetin otandyq etik jaıly. Bul qystyq aıaq kıim – Almaty oblysynyń Kerbulaq aýdanynda, Saryózek kentinde tigilip, daıyndalatyn naǵyz jergilikti ónim. Is basynda Asqat Talǵarbaev esimdi jigit júr. Asqattyń ózi taǵdyrly jigit. Ekinshi top múgedegi, estý jáne sóıleý qabiletinen týabitti aıyrylǵan. Basqa salǵan synaqtan synyp ketpeı, ómir aǵysyna qarsy júze bilgen erjúrek! Qazir Asqattyń jeke fırmasy bar. О́ziniń súıikti kásibin dóńgeletip, jaqsy adamdardyń kómegimen úlken bızneske aınaldyra bildi.
– Asqattyń tirshiligi qol-aıaǵy balǵadaı, on eki múshesi saý kez kelgen jigitti oılandyrýy kerek. Múmkindiginiń shekteýli ekendigine qaramastan, jigerli-aq. О́zi qolynan bizi men tebeni túspegen sheber eken. Oılasa kele, Asqatqa aıaq kıim tigý men jóndeý sehyn ashýdy usyndyq. Bul iste tájirıbesi bar. О́ndiristi uıymdastyrý úrdisimen tanystyryp, bıznes-jospardy ázirlep berdik. Keıin sýrdoaýdarmasy bar «Bıznes keńesshi» jobasyna jazyldy. Oqýdan ótip, jańa bilim alǵan soń memlekettik grant alýǵa ótinim berildi. Nátıjesinde, ASKHAT brendimen tigilgen otandyq aıaq kıim tutynýshylarǵa jol tartty, – deıdi bizge kásipkerdiń isi jaıly áńgimelegen Almaty oblystyq Kásipkerler palatasy Kerbulaq aýdandyq fılıalynyń basshysy Bolat Tastanbekov.
Qazir Asqattyń aıaq kıim tigetin sehynda múmkindigi shekteýli taǵy úsh adam jumys isteıdi eken. Bir-birin aıtpaı túsinetin tórteýdiń isi de ónimdi. Orta eseppen aıyna 40 jup aıaq kıim tigedi. Etik tigýge qajetti shıkizat, bylǵary ónimin Shyǵys Qazaqstannan tapsyryspen aldyrady. Basqa qosalqy usaq-túıek zattar Reseıden keledi.
Shúkir, bıyl ASKHAT brendimen tigilgen bylǵary etikke suranys kóbeıip tur. Jaqynda Aqtóbe oblysynyń kásipkerlerinen 2 myń dana etikke tapsyrys túsken. Shyǵys Qazaqstan oblysynan da Asqattyń ónimine «quda túsýshiler» tabylýda. Kásipkerdiń endigi armany tigin sehyn keńeıtip, tapsyrysty kóptep oryndaý bolyp tur. Balalardyń qystyq etigin tigip, saýdaǵa shyǵarsam dep oılaıdy. Asqat ónimin ótkizerde bólshek saýdadaǵy baǵasyn tym qymbattatpaýdy ótinedi eken. Árbir qazaq Saryózektegi shaǵyn sehta tigilgen etikti kıip júrgenin qalaıdy, ol úshin baǵasy qoljetimdi bolǵany durys deıdi.
Aıtpaqshy, Asqat Talǵarbaev byltyr «Bıznes keńesshi» oqý kýrsynda oqyǵan 200-ge jýyq kásipkerdiń biri. Almaty oblystyq Kásipkerler palatasynyń muryndyq bolýymen osy kýrsty bitirgen 120 adamǵa bıznesin júrgizý úshin 340,4 mln teńge kóleminde qarjy bólingen-di. Nátıjesinde, keıipkerimizdiń sharýasy dóńgelenip, isi ilgeriledi. Ynta men iskerlik oqý men bilimge ushtassa, nátıjesi oń bolmaq. Adam múmkindiginiń sheksizdigin óz kásibimen dáleldep júrgen Asqattyń tirshiligi soǵan dálel...
Qalmahanbet MUQAMETQALI,
«Egemen Qazaqstan»
Almaty oblysy,
Kerbulaq aýdany
