Jarys barysynda qatysýshylar anafılaktıkalyq shok, náresteni reanımasııalaý, jaraqat alý kezindegi sıtýasııalyq tapsyrmalardy oryndap, «oqıǵa» ornynda manekender jáne standarttalǵan pasıentter paıdalanyldy. Aýqymdy shara aıasynda sársenbi kúni Qalalyq jedel medısınalyq járdem stansasynyń konferens-zalynda shuǵyl jaǵdaılar boıynsha «Astana» klınıkalyq ortalyǵynyń jetekshi mamandarynyń qatysýymen Reseı, Izraıl, QHR, Malaızııa jáne basqa elder ókilderiniń sheberlik synyptary uıymdastyryldy. Jıynnyń ashylýyna qatysqan Densaýlyq saqtaý mınıstri jedel járdem brıgadalarynyń jarysyn ótkizý tájirıbe almasýǵa, bilim men bilikti shyńdaýǵa yqpal etetin mańyzdy shara ekenin atap ótti.
«Osymen 3 jyl qatarynan uıymdastyrylyp otyrǵan osynaý jarysqa byltyr elimizdiń 6 óńirinen ǵana komandalar qatysqan bolatyn. Bıyl olardyń sany artyp, 17 komandaǵa jetkenine qýanyshtymyz. Jarysty ótkizýdegi basty maqsattyń biri – jedel járdem jumysynyń sapasyn kóterý, halyqaralyq standarttarǵa kóshý. О́tken jyly Densaýlyq saqtaý mınıstrliginiń tarapynan jedel járdem jumysyn jetildirýge, emhanalar qyzmetin odan ári damytý jóninde buıryq shyǵarǵan bolatynbyz. О́ıtkeni bul sala asa mańyzdy. Elimizdegi oryn alyp jatqan ólim sanynyń ósýi kóbinese osy jedel medısınalyq kómektiń der kezinde jetpeýi jaǵdaılarynan týyndaýda. Sol sebepti medısınalyq qyzmet sapasyn arttyrý maqsatynda osy sharany qolǵa aldyq», dedi E.Birtanov.
Densaýlyq saqtaý mınıstrligi jáne Astana qalasy ákimdiginiń qoldaýymen Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy, Astana qalasy Qoǵamdyq densaýlyq saqtaý basqarmasy jáne «Astana» oqý-klınıkalyq ortalyǵynyń uıytqy bolýymen uıymdastyrylǵan jedel járdem brıgadalarynyń bıylǵy jarysy 6-7 qyrkúıek kúnderi «Jeruıyq» saıabaǵynda ótti.
Sonymen qatar tótenshe jaǵdaılarǵa qatysatyn jedel medısınalyq járdem brıgadalaryna sanıtarlyq avtokólik jáne medısınalyq jabdyqtar tabystalyp, komandalar trıaj júıesinde jumys isteý daǵdylary men komandalyq jumysty kórsetti. Munymen qosa, jarys sheńberinde otandyq óndirýshilerdiń medısınalyq tehnıkasynyń, dárilik zattarynyń kórmesi uıymdastyryldy.
Jarys nátıjesinde elimizdiń eń úzdik jedel járdem brıgadasy bolyp, Aqmola oblysynyń komandasy tanyldy. Al ekinshi oryndy Jambyl oblysynan kelgen brıgada enshilese, úshinshi orynǵa astanalyq jedel járdem qyzmetkerleri ıe boldy.
Raýan QAIDAR,
«Egemen Qazaqstan»
