Jańa oqý jylynda Almaty qalasynda 240 myńnan astam bala alǵashqy qońyraý únimen mektep tabaldyryǵyn attady. Olardyń 25 myńy alǵashqy synypqa barǵan baldyrǵandar. Bıylǵy bilim kúnine oraı ońtústik astanada 2300 balaǵa arnalyp tórt jańa mektep ashyldy.
Almaty qalasynyń quramyna qosylǵan Naýryzbaı aýdanynda 1200 oryndy mektep ashyldy, onda balalardyń sapaly bilim alýyna tolyq múmkindik jasalǵan. Jańa oqý ornynda robot tehnıkalary kabınetteri, fızıka men hımııa synyptary, ata-analarǵa arnalǵan bólmeler, oıyn alańdary jańa jıhazdarmen, kórnekiliktermen jabdyqtalǵan. Qaýipsizdik sharalaryna da erekshe kóńil bólingen.
Mekteptiń taǵy bir ereksheligi – zaǵıp jáne nashar kóretin balalar úshin Braıl qarpine oqytatyn synyptarmen, arnaıy sanıtarlyq bólmeler jáne shaqyrý núktelerimen qamtamasyz etilgen.
Qala ákimi Baýyrjan Baıbek jańa mekteptiń oqýshylary jáne ata-analarymen kezdesti. Munda ózdiginen júre almaıtyn balalarǵa da arbamen júrýge qolaıly jaǵdaı jasalǵan. Sonymen qatar mektepte atamekenine oralǵan otbasylar balalarynyń da erkin bilim alýyna barynsha múmkindik qarastyrylǵan.
Qala ákimdigi baspasóz qyzmetiniń derekteri boıynsha, bıyl bilim oshaqtaryn salý men kúrdeli jóndeýden ótkizýge 17 mlrd teńgeden astam qarjy bólingen. Osy oqý jylyna oraı Almatynyń Alataý aýdanyndaǵy №151 mektep janynan salynǵan 600 oryndy qosalqy nysan paıdalanýǵa berilse, №26 mekteptiń eski ǵımaraty jańartyldy. Al kúzdiń sońyna qaraı munda 600 oryndyq jáne №184, 185 mektepter janynan 400 oryndyq qosalqy nysandar ashylatyn bolady.
Elvıra SERIKQYZY,
«Egemen Qazaqstan»
ALMATY
