Toǵyzqumalaqshylardyń upaıy túgel
Dúnıejúzilik kóshpendiler oıyndarynda sportshylarymyzdyń ishinen eń jaqsy kórsetkishti toǵyzqumalaqshylar kórsetti. Toǵyzqumalaqtan 4 altynnyń 3-eýin qazaqstandyqtar jeńip aldy. 1 altynǵa qyrǵyzstandyqtar ıe boldy. Sondaı-aq toǵyzqumalaqshylarymyz 2 kúmis, 1 qola medaldi enshiledi. Toǵyzqumalaqshylar mangala oıynyna (túrik toǵyzqumalaǵy) qatysyp, komandalyq eseppen 2 kúmis, 2 qola medaldy aldy. Toǵyzqumalaqtan álemniń 8 dúrkin chempıony Ásel Dálıeva jeke esepte 1 altyn, komandalyq esepte (eki sportshy birigip) 1 altyn alyp berdi.
Qazaqstan ekinshi oryndy mise tutty
Qyrǵyzstannyń Ystyqkól oblysynda ótken III Dúnıejúzilik kóshpendiler oıyndarynda Qazaqstan quramasy jalpy esepte ekinshi orynǵa ıe boldy. Birinshi orynǵa qorjynyna túsken jalpy 100 medaldiń 40-y altyn, 30-y kúmis, 30 qolasy bar, Qyrǵyzstannyń úlesine tıdi.
Ekinshi oryndy qazaqstandyq sportshylar enshiledi. Altyn sany boıynsha reseıliktermen teń túsken jerlesterimiz, kúmis medaldiń sany basymdyǵymen alǵa shyqty. Qazaqstan qorjynynda 16 altyn, 24 kúmis, 29 qola medal (barlyǵy 69 medal) bar. Al reseılikterdiń qorjynynda 52 medal: 16 altyn, 11 kúmis, 25 qola.
Tórtinshi orynda túrikmenstandyq sportshylar. Olardyń enshisinde 10 altyn, 5 kúmis, 12 qola (27 medal). Alǵashqy bestikti ózbekstandyq sańlaqtar túıindedi. Olardyń qorjynyna 7 altyn, 8 kúmis, 18 qola (33 medal) tústi.
2-8 qyrkúıek aralyǵynda ótken Dúnıejúzilik kóshpendiler oıyndaryna 80-nen astam elden 3000-ǵa jýyq sportshy qatysty. Olar 37 sport túrinen baq synady. Dúbirli dodada Qazaqstannyń namysyn 134 sportshy qorǵady.
Nazarbek BAIJIGITOV,
arnaıy «Egemen Qazaqstan» úshin
Qyrǵyz Respýblıkasy,
Sholpan-Ata qalasy
