2010 jyly bastalǵan «Medısınalyq poıyzdar» jobasy jemisti jumys atqaryp, jurtshylyqtyń kóńilinen shyǵyp keledi. On jylǵa jýyq ýaqyt aralyǵynda konsýltatıvtik-dıagnostıkalyq poıyzdar respýblıkanyń barlyq oblysynda bolyp, 1326 stansanyń 379 myńnan astam turǵynyna medısınalyq kómek kórsetken. Mamandar sonyń ishinde 8 3806 balany tekserýden ótkizgen. Dárigerlik qabyldaýdyń jalpy sany 2,5 mln adamdy quraǵan.
Igiligi men izgiligi mol joba bıyl da óz jumysyn qarqyndy jalǵastyryp otyr. Jýyrda Qaraǵandy jáne Almaty qalalarynan «Densaýlyq» jáne «Salamatty Qazaqstan» medısınalyq poıyzdary jolǵa shyqty. Úsh aı boıy poıyzdar elimizdiń shalǵaıdaǵy temir jol beketterinde toqtap, eldi meken turǵyndaryna medısınalyq kómek kórsetedi. Poıyzdardyń medısınalyq brıgada quramyna terapevt, pedıatr, nevropatolog, okýlıst, LOR, gınekolog, hırýrg, ýrolog, mammolog, stomatolog sııaqty bilikti dárigerler kiredi.
Poıyz zamanaýı dıagnostıkalyq quraldarmen jabdyqtalǵan, onyń ishinde kompıýterlik spırometrlik júıemen, ehoensefalografpen, dıagnostıkalyq júkteme synaqtaryn júrgizý úshin kardıologııalyq monıtorıng júıesimen, sondaı-aq rentgen, stomatologııalyq, LOR jáne oftalmologııalyq jabdyqtardyń sońǵy úlgilerimen qamtamasyz etilgen.
Bıyl «Densaýlyq» poıyzy Atyraý, Mańǵystaý, Qyzylorda, Túrkistan jáne Almaty oblystary boıynsha, barlyǵy 82 beketke toqtaıdy. «Salamatty Qazaqstan» poıyzymen Shyǵys Qazaqstan, Pavlodar, Qaraǵandy jáne Qostanaı oblystarynyń shalǵaıdaǵy 57 stansanyń turǵyndaryn qamtý josparlanyp otyr.
Stansa turǵyndary joǵary bilikti medısınalyq kómek, sonyń ishinde shaǵyn hırýrgııalyq operasııalar, sondaı-aq joǵary sapaly stomatologııalyq kómek ala alady.
Joba «Samuryq-Qazyna» AQ kompanııalar tobynyń «Samruk-Kazyna Trust» áleýmettik jobalardy damytý qory jáne Densaýlyq saqtaý mınıstrligi, sonymen qatar «Qazaqstan Temir Joly» UK» AQ-tyń «Áleýmettik jobalar» Korporatıvtik qorynyń qoldaýymen júzege asyrylady.
Mıras ASAN,
«Egemen Qazaqstan»
