Qyzylordada oblys basshylyǵy, Qazaqstannyń ekologııalyq uıymdary qaýymdastyǵy, múddeli mekemeler jáne memlekettik organdardyń qatysýymen májilis ótti.
«QR Prezıdenti Nursultan Nazarbaevtyń tarıhı sheshimderiniń arqasynda Qazaqstan «jasyl ekonomıkany» iske asyrýǵa baǵyttalǵan birqatar bastamalardyń bastaýshysyna aınalyp otyr. Olardy iske asyrý bıznes pen ǵylymnyń kúshin biriktirýdi, memleket pen halyqaralyq uıymdardyń júıeli qarym-qatynas qurýyn talap etedi. Úkimettik emes uıymdarǵa osy sala boıynsha úlken jaýapkershilik artylýda. Qazirgi tańda olardyń respýblıka boıynsha jalpy sany shamamen 20 000-ǵa jetti, olardyń 8%-y qorshaǵan ortany qorǵaý jáne jasyl tehnologııalar salasynda jumys isteıdi. Qyzylorda oblysynda qorshaǵan ortany qorǵaý salasy boıynsha 7 uıym jumys istep tur», - dedi aımaq basshysy.
Qol qoıylǵan memorandým aıasynda taraptar birqatar mindetterdi sheshýdi josparlap otyr: Qyzylorda oblysynyń qorshaǵan ortasyn jaqsartý boıynsha birlesken keshendi sharalardy júzege asyrý; Tómen kómirtekti damý prınsıpterin qoldana otyryp, jalpy ekologııalyq jaǵdaıdy jaqsartý strategııasyn ázirleý jáne bekitý úshin ınteraktıvti platforma qurý; Atmosferaǵa túrli kózderden kómirqyshqyl gazyn shyǵarýdy azaıtý úshin ekologııalyq, ǵylymı-zertteý jáne monıtorıng qyzmetin júzege asyrý úshin áleýmettik tapsyrysty qalyptastyrý.
Qyzylorda oblysynyń Tabıǵı resýrstar jáne tabıǵatty paıdalanýdy retteý basqarmasynyń bastyǵy Aıdar Abdýalıev Qorshaǵan ortany qorǵaýdyń keshendi josparyn júzege asyrý aıasynda atqarylatyn jumystar týraly baıandady.
Jospar segiz bloktan turady, olardyń árqaısysynda naqty is-sharalar men jaýapty tulǵalar jáne qarjylandyrý túrleri kórsetilgen.
«Keshendi jospardy iske asyrý úshin qajetti qarajat jobalyq-smetalyq qujattary men tehnıkalyq-ekonomıkalyq negizdemeniń nátıjelerine baılanysty bolady», - dedi Aıdar Abdýalıev.
Mysaly, «stasıonarlyq kózderden atmosferaǵa lastaýshy zattardyń qaldyqtaryn azaıtý» birinshi blogynda, aımaqtaǵy ónerkásiptik óndiristermen shań-gazustaıtyn jabdyqtar men qondyrǵylardy ýaqytyly jóndeý arqyly lastaýshy zattardan bólinetin qaldyqtardy birtindep azaıtýǵa baǵyttalǵan salalyq ekologııalyq sharalar salasyn qamtamasyz etý qarastyrylǵan; Atap aıtsaq, stasıonarlyq kózderdiń qaldyqtaryn azaıtý jónindegi sharalardy iske asyrý; Jeke úı-jaılardy, ǵımarattardy, qurylystardy kezeń-kezeńmen gazdandyrý.
Ekinshi blok jyljymaly kózderden aýaǵa lastaýshy zattardyń qaldyqtaryn azaıtýǵa baǵyttalǵan, bul kólik quraldarynyń gazben júrýge kóshirý boıynsha is-sharalar josparyn ázirleýdi jáne paıdalanylǵan gazdardyń qaldyqtaryn ekologııalyq standarttaryn saqtaý úshin qoǵamdyq kólikterdi, kommýnaldyq jáne jeke avtokólikterge tekserý júrgizýdi kózdeıdi.
Úshinshi blok «Jasyl beldeýdi damytý, kógaldandyrý jáne abattandyrý» máselesin qamtıdy: sanıtarlyq qorǵaý aımaǵyn jáne ónerkásiptik kásiporyndar aýmaǵyn kógaldandyrý, sondaı-aq Qyzylorda qalasynyń aınalasynda jasyl beldeý qurý; Aral aýdanynyń Aqespe, Shıjaǵa, Sazdy, Qosaman, Sekseýil aýyldyq okrýgterinde aǵash otyrǵyzý arqyly qumnyń taralýyna qarsy turý sharalary. Bul baǵyttaǵy jumystar 80 mıllıon teńgeni qajet etedi.
Tórtinshi blok ónerkásip jáne óndiris qaldyqtaryn basqarý, bul ónerkásiptik kásiporyndardyń qatty turmystyq qaldyqtarynyń qoqystaryn boldyrmaý jónindegi sharalaryn, sondaı-aq qatty turmystyq qaldyqtardy bólek jınaý úshin arnaıy konteınerlermen jabdyqtaý máselelerin sheshýge baǵyttalǵan.
Dóńgelek ústel barysynda Qazaqstannyń ekologııalyq uıymdary qaýymdastyǵynyń Basqarma tóraıymy Aıgúl Soloveva, orynbasary Eldos Abaqanov, Qyzylorda oblysynyń ekologııa departamenti bastyǵy Marat Qurmanbaev sóz sóıledi.
