Baıqaý-saıystyń basty maqsaty – áskerı qyzmetshilerdiń kásiptik daıyndyq deńgeıin joǵarylatý, kólikterdi jóndeý, sarbazdardyń qyzmet kórsetý jáne basqarýdaǵy mashyqtaryn shyńdaý. Saıysqa óńirlik qolbasshylyqtardan iriktelip shyqqan úzdik áskerı qyzmetshiler qatysty.
Báseke barysynda Ulandyqtar BTR júrgizý, BTR-den oq atý, júrip bara jatyp jáne qysqa kidiris jasaı otyryp jyljymaly nysandardy pýlemetpen atý, avtomobıl júrgizý, tehnıkalyq daıyndyq boıynsha normatıvter oryndaý, BTR-men sý kedergilerinen ótý, avtomobıldi temir jol platformasynda tıeý boıynsha normatıv oryndaý syndy saıystarda baqtaryn synady.
Júrgizýshiler arasyndaǵy jekelegen jarysta jınaǵan jalpy upaı sandaryna sáıkes 5516 áskerı bóliminiń aǵa mamany serjant Jantileý Káken «Úzdik júrgizýshi» dep tanyldy. Dál osy atalymda– 5511 áskerı bóliminiń aǵa mamany kishi serjant Aıdyn Omarov ekinshi oryndy ıelense, 5547 áskerı bóliminiń aǵa mamany starshına Maqsat Ushaqbaev úzdik úshtikti túıindedi. Al BTR ekıpajdary arasynda ótken komandalyq birinshilikte jınaǵan upaı sany boıynsha 5516 áskerı bóliminiń BTR ekıpajy 108 upaımen kósh basynan kórindi. Atalǵan saıysta 101 upaı jınaǵan 6656 áskerı bóliminiń BTR ekıpajy men 94 upaı enshilegen Ulttyq ulan áskerı ınstıtýtynyń BTR ekıpajy ekinshi jáne úshinshi oryndardy ózara bólisti. Sondaı-aq Júrgizýshiler men BTR ekıpajy arasynda ótken toptyq birinshilikte 5516 áskerı bóliminiń komandasy «Úzdik komanda» retinde tirkeldi.
– Bıylǵy jyl – Qazaqstan Respýblıkasynyń Ulttyq ulanynda jeke quramnyń kásiptik daıyndyǵyn joǵarylatý jyly bolyp bekitildi. Elbasynyń «Bolashaqqa baǵdar: Rýhanı jańǵyrý» atty baǵdarlamalyq maqalasynda qoǵam men jeke adamnyń rýhanı jańǵyrýǵa qosar úlesi básekege qabiletti bolýynda dep kórsetilgen. Al áskerı qyzmetshiler eńbeginiń nátıjesi – jeke quramnyń aldyna qoıylǵan qyzmettik-jaýyngerlik mindetter men áskerı boryshyn jaýapkershilikpen sapaly oryndaýǵa árqashan daıyn bola alýyna baılanysty. Ulttyq ulandyqtar ózderiniń kúndelikti qajyrly eńbekterimen Elbasynyń alǵa qoıǵan strategııalyq maqsattary men mindetterin oryndaýǵa eleýli úles qosyp keledi. Jaýyngerlerdiń biligin arttyrýǵa baǵyttalǵan búgingi sharanyń da maqsaty osy, – deıdi Ulttyq ulannyń «Ońtústik» óńirlik qolbasshylyǵynyń baspasóz qyzmetshisi Danara Baımaǵanbetova.
Jarys qorytyndysynda úzdik dep tanylǵan ulandyqtar Qazaqstan Respýblıkasy Ulttyq ulany Bas qolbasshysy general – leıtenant Rýslan Jaqsylyqovtyń atynan kýbok, dıplom jáne baǵaly syılyqtarmen marapattaldy.
Arman OKTIаBR,
«Egemen Qazaqstan»
ALMATY
