Bólim basshysy polkovnık Oral Batyrǵalıev depýtattarǵa shekarashylardyń kúndelikti áskerı qyzmeti týraly aıtyp berdi jáne shekaradaǵy ótkizý beketindegi ahýal týraly baıandady. Sondaı-aq senatorlarǵa shekara kúzetindegi tehnıkalyq quraldar kórsetilip, pasportqa baqylaý júrgizý jumysynyń barysy tanystyryldy.
Sol kúni 2535 áskerı bóliminiń Kúrshim shekara otrıadynda Shyǵys Qazaqstan oblysynyń ákimi Danıal Ahmetov, elimizdiń Ulttyq qaýipsizdik komıtetiniń Shekara qyzmetiniń, Qorǵanys mınıstrliginiń, Ishki ister mınıstrligi Ulttyq ulannyń basshylyǵy, shekaralyq aýdandar ákimderi qatysqan Senat komıtetiniń otyrysy boldy.
Otyrysta memlekettik shekarany kúzetý máseleleri talqylandy. Atap aıtqanda, memlekettik shekaranyń shyǵys shebindegi qazirgi jaǵdaı, áskerı qyzmetshilerdiń áleýmettik-turmys jaǵdaıyn jaqsartý týraly aıtyldy.
Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Darhan Dilmanov senatorlarǵa qarjylandyrýdaǵy jetispeýshilikter týraly aıtty. Shekarashylarǵa 1 mıllıard 94 mıllıon teńgege jýyq qarjy kerek. Bul qarjy Qazaqstan men Qytaı arasyndaǵy memlekettik shekaranyń Shyǵys Qazaqstan oblysy aýmaǵynan ótetin bóliginiń boıynda ornalasqan bólimshelerdiń ınfraqurylymdaryn damytý úshin qajet.
Senatorlar Tóleýbek Muqashev, Serik Jaqsybekov, Muhtar Qul-Muhammed, Talǵat Musabaev, Nurjan Nursıpatov sheshimin tabýy tıis birqatar ózekti máselelerge toqtaldy. Al D.Nazarbaeva kóshpeli otyrystyń qorytyndysy boıynsha usynystar ázirlenip, Úkimetke jiberiletinin atap ótti. «Kóterilgen barlyq máseleler depýtattardyń baqylaýynda bolady», dedi senator.
Shyǵys Qazaqstan oblysy aýmaǵynda ornalasqan birqatar áskerı bólimderde bolǵan depýtattar áskerı qyzmetshilerdiń tynys-tirshiligimen, azyq-túlikpen qamtamasyz etilý jaǵdaıymen tanysty jáne áskerı bólimniń ınfraqurylymyn damytý men turǵyn úımen qamtamasyz etý máselelerin talqylady.
