Kásipodaq belsendilerine syı-qurmet kórsetildi

Qazirgi tańda jer-jerlerde Táýel­sizdigimizdiń 20 jyldyq torqaly toıyn laıyqty atap ótý sharalaryn uıym­das­tyrý jumystary óz deńgeıinde júrip jatyr. Ár salanyń qyzmetkerleri mereke kúnderi etken eńbek pen tókken terdiń arqasynda túrli marapatqa ıe bolyp, mereıleri ústem bolýda. Sondaı is-sharalardyń biri ońtústiktegi úlken oqý oryndardyń biri – M.Áýezov atyndaǵy OQMÝ-da da bolyp ótti. Ony uıymdastyrýǵa oqý ornynyń ká­sipodaq uıymy men stýdenttik kásip­odaq uıymy muryndyq boldy. Oqý ornynyń basshylyǵy jınal­ǵan­dardy Táýelsizdiktiń 20 jyldyq me­rekesimen quttyqtap, Táýelsizdikke qol jetkizýde kásipodaqtyń da mol úle­si bar ekendigin atap ótti. Atap aıtý kerek, jyl ótken saıyn kásipodaq uıy­myna senim artýshylar sany arta tú­sýde. Bul degen ýnıversıtette eńbek et­ip júrgen qyzmetkerler men bilim alyp júrgen barlyq stýdentterdiń qu­qy­ǵy men áleýmettik jaǵdaıyn jan-jaq­ty jaqsartýdy maqsat tutatyn uıym jumysynyń jaqsy jolǵa qoı­ylǵanyn dáleldeı tússe kerek. Ná­tıjesi de kópshiliktiń kóz aldynda. Saltanatty basqosýda jyldy qo­ry­tyndylaı kele ýnıversıtetimizdiń jan-jaqty damýyna jáne elimizdi ınnovasııalyq tyń ıdeıalary arqyly damytý jolynda aıanbaı eńbek etip kele jatqan professor-oqytýshylar qu­ra­my kásipodaq keńesiniń tósbelgi­simen, alǵys hattarmen, dıplomdarmen marapattaldy. Sondaı-aq, memlekettik jastar saıa­satyn júzege asyrý jolynda eńbek etip júrgen belsendi stýdentter de al­ǵys hattarmen marapattalsa, al uıym qamqorlyǵynda júrgen ata-anasynan aıyrylǵan 26 stýdentke qarjylaı syı­­aqy berildi. Sońy merekelik konsertke ulasty. Qýanysh MUSABEKOV,  M.Áýezov atyndaǵy Ońtústik Qazaqstan memlekettik ýnıversıteti kásipodaq uıymynyń tóraǵasy. Shymkent.