Parlament Senatynyń depýtaty, «Prezıdenttiń bes áleýmettik bastamasyn» baqylaý jónindegi respýblıkalyq qoǵamdyq keńestiń tóraǵasy Baqytjan Jumaǵulovtyń tóraǵalyq etýimen ótken jıynǵa Bilim jáne ǵylym mınıstrliginiń laýazymdy qyzmetkerleri men Almaty qalasynda ornalasqan Joǵary oqý oryndarynyń rektorlary qatysty. Kezdesý barysynda JOO-nyń Almaty qalasyndaǵy jataqhanalar qurylysynyń barysy egjeı-tegjeıli talqylandy. Atap aıtqanda, qajetti qujattardy ýaqtyly daıyndaý, osy iske ınvestorlardy tartý, kezek kúttirmeıtin mańyzdy sharýalardy júzege asyrýdyń tetikterin tabý jáne basqa da keleli máseleler boıynsha keńinen áńgime qozǵaldy.
Joǵaryda aıtylǵan úndeýdiń úshinshi bastamasynda Memleket basshysy bylaı degen edi:
Biz álemdik standarttarǵa saı bilim berý júıesin qalyptastyra otyryp, stýdentterdiń bilim alýyna jáne turatyn jerine jaǵdaı jasaýǵa tıisti nazar aýdarýymyz qajet.
Qazir joǵary oqý oryndary men kolledjderdiń stýdentterin jataqhanamen qamtamasyz etý máselesi óte ózekti.
Bul mindetti sheshý úshin joǵary oqý oryndary, kolledjder men developerlik kompanııalar memleket pen jeke menshiktiń seriktestigi qaǵıdasymen jataqhana salýdy bastaýy kerek.
Memleket óz tarapynan Bilim jáne ǵylym mınıstrligi arqyly jataqhana qurylysyna jumsalǵan ınvestısııalardyń belgili bir bóligi birtindep qaıtarylýyna kepildik beredi.
2022 jyldyń sońyna deıin stýdentterge arnap keminde 75 myń oryndyq jańa jataqhana salýdy tapsyramyn.
Bul aldaǵy jyldarda óse túsetin suranysty eskergenniń ózinde jataqhana tapshylyǵyn birjola sheshedi».
Mine, osy tapsyrmanyń oryndalýy barysy jaıynda Parlament Senatynyń depýtaty, «Prezıdenttiń bes áleýmettik bastamasyn» baqylaý jónindegi respýblıkalyq qoǵamdyq keńestiń tóraǵasy Baqytjan Jumaǵulov, Bilim jáne ǵylym vıse-mınıstri Bıbigúl Asylova jáne basqa da osy iske jaýapty qyzmetkerler baıandama jasady. Al JOO-nyń rektorlary áli de sheshilmeı jatqan túıtkildi máselelerdi tilge tıek etip, alǵa qoıǵan josparlarymen de bólisti.
Ǵalym SÚLEIMEN,
«Egemen Qazaqstan»
ALMATY
