Baıqaýdyń talabyna saı, árbir úmitker eki ánnen oryndap shyqty. Birinshi kezekte álemdik hıt ánder oryndalsa, sheshýshi kezeńde qazaqtyń tanymal týyndylary shyrqaldy.
Talaby taýdaı talant ıelerin anyqtap, olardy shyǵarmashylyqqa baýlý maqsatynda ótken respýblıkalyq án baıqaýyna elimizge belgili mádenıet qaıratkerleri men ánshiler qazylyq etti. Qazylar alqasy músheleriniń biri, «MuzArt» tobynyń ánshisi Sáken Maıǵazıevtiń aıtýynsha, mundaı óner baıqaýlary ánshilerdiń kásibı deńgeıge kóterilýine tikeleı yqpal etedi. Sondaı-aq osyǵan balama bolatyn án konkýrstary jıi ótkizilse degen tilek te aıtyldy.
Sonymen baıqaý nátıjesi boıynsha Dástúr Asylhan (Astana qalasy), Anar Tájentaeva (Qaraǵandy oblysy) jáne Aılına Lepesova (Almaty qalasy) dıplomant atansa, Pavlodardan kelgen Natalıa Proskaıa kórermender kózaıymyna aınaldy.
Baıqaýdyń úshinshi júldesine Merjan Qabdolov (Atyraý oblysy) pen Janerke Qabataeva (ShQO) laıyq dep tanyldy. Túrkistan oblysynyń ánshisi Erik Tólenov ekinshi júldege ıe bolsa, birinshi oryn Almaty oblysynan kelgen úmitker Qarlyǵash Bıǵazyqyzyna buıyrdy. Al «Juldyz-2018» respýblıkalyq baıqaýynyń Gran-prı júldesine Soltústik Qazaqstan oblysynan kelgen Ádilhan Makın ıe boldy.
Konkýrsta úzdik shyqqandarǵa dıplomdar men aqshalaı sertıfıkattar tabys etildi. Baıqaý sońy konkýrs jeńimpazdary men qazylar alqasynyń músheleri jáne qazaq estradasy juldyzdarynyń qatysýymen ótken gala-konsertke ulasty.
Qaırat ÁBILDA,
«Egemen Qazaqstan»
QARAǴANDY
