Mádenı sharanyń ashylýynda sóz sóılegen joǵarydaǵy búkilreseılik mekeme-mýzeı dırektory Elana Tıtova hanym, atalmysh oqıǵa «Dostastyq murasy, keleshek úshin dástúrler» atty halyqaralyq baǵdarlama aıasynda ótip otyrǵanyn jetkizdi. Iаǵnı, baǵdarlamanyń alǵashqy kezeńi 2016 jyly Ázerbaıjan memlekettik mýzeıi bazasynda Baký qalasynda ótse, ekinshi kezeńi ótken jyly Bishkekte, úshinshisi mine búgin elorda tórinde qanat jaıýda.
Kórme sóresine qoıylǵan eksponattardyń basym kópshiligi, naqtyraq aıtqanda 300-ge jýyǵy Máskeýden jetkizilipti. Bul jádigerler uıymdastyrýshy taraptyń biri Sándik-qoldanbaly jáne halyqtyq ónerdiń búkilreseılik mýzeıi qorynan jáne Stroganov atyndaǵy Máskeý memlekettik kórkem-óndiristik akademııasy men Reseı Sýretshiler odaǵy qatarly mekemelerden arnaıy iriktelip alynǵan eken.
Kolleksııalar qataryna kilem jáne kilemsheler, kórkem gobelender, teri buıymdary, avtorlyq kıim, keramıka, zergerlik zattar, kórkem metall, tastan jasalǵan muralar, oıýly aǵash, áshekeıli podnos syndy qoldanbaly óner jádigerleri toptastyrylǵan. Osylardyń arasynan keıbireýlerin atap óter bolsaq, HI-HII ǵasyr murasy «At» salpynshaǵy («Konek»), Reseıdiń Soltústik Dvına aýdanynan ákelingen HH ǵasyr týyndysy qaqpaqty qobdısha, Vologod gýbernııasyna tán jádiger HIH ǵasyr murasy mys ojaý, HIH ǵasyrda Arhangelsk gýbernııasynda jasalǵan jumsaq súlgi, sondaı-aq Tver gýbernııasy muraǵatynan ákelingen áıelderdiń ártúrli bas kıimderi t.b. bar.
Sonymen qatar Reseı quramyndaǵy ulttar murasy: daǵystandyq sheberdiń qolynan shyqqan mys shekimeler, tyvalardyń aq tastan qashap jasaǵan agalmatolıtteri, saha aǵaıyndarymyzdyń qoldanbaly óneri – aǵashtan naqyshtap oıyp jasaǵan qymyz quıatyn ydys, VI-V ǵasyrlarǵa tán súıekten jasalǵan qasyq, V ǵasyrdyń qola aınasy jáne basqa buıymdar sóre sánine kórik berip turdy.
Kórmeniń ekinshi bólimin reseılik zamanaýı sýretshilerdiń avtorlyq óner týyndylary quraǵan eken. «Bul týyndylar osy joba úshin arnaıy iriktelip alynǵan» deıdi uıymdastyrýshylar. Máselen, máskeýlik avtor Alla Shmakovanyń «Perishteler sherýi» atty gobeleni, Gennadıı Lensovtiń «Oıý sıqyry» panno-trıptıhy, sondaı-aq 1939 jyly qazaq dástúrine qatysty sa- lynǵan óte kólemdi sýretti N.Nıvchınskııdiń «Báıge» gobeleni kórermender kózaıymyna aınalýda.
Beken QAIRATULY,
«Egemen Qazaqstan»
