Úsh ǵasyrǵa jýyq ýaqyt boıy bodandyqtyń buǵaýynda bolyp, osydan 20 jyl buryn egemendigin alǵan elimizdiń ár azamaty úshin Táýelsizdik kúni merekesiniń orny aıryqsha. Bul kún – ata-babalarymyz ańsaǵan armannyń júzege asqan, keýdesin maqtanysh kernep mereıi tasqan, elimizge erkindik syılaǵan Uly kún. Mine, keń baıtaq qazaq dalasynda aspankók týymyzdyń jelbiregenine 20 jyl toldy. Jıyrma jylda elimiz júz jylǵa tatıtyn jumys jasady. Áleýmettik-ekonomıkalyq reformalar, ındýstrııalyq-ınnovasııalyq damý qarqyny óz nátıjesin berdi. 46 konfessııa men 130-dan astam etnostyń ortaq ordasy bolyp otyrǵan elimizde bereke-birlik, tatýlyq qalyptasqan. Táýelsizdiktiń týyn bıik kóterip kele jatqan Elbasy halqymyzdy qyspaqqa uryndyrmaı, uly jolǵa bastap keledi. Ol elimizdi baıandy baqytqa jeteleıtin azattyq joly.
Aýdan jurtshylyǵy jyl saıyn Táýelsizdik kúnin úlken qýanyshpen merekeleıdi. Aýdan ortalyǵyndaǵy merekelik is-sharalar Moıynqum aýdanynyń ákimi Sáken Arýbaev pen Jeltoqsan oqıǵasynyń qurbany, ««Halyq Qaharmany»» Q.Rysqulbekovtyń anasy Dámetken Asanbaevanyń mekeme-uıym basshylarynyń Jeltoqsan kóterilisi erleriniń biri, ««Halyq Qaharmany»» Q.Rysqulbekovtiń Jastar saıabaǵyndaǵy eskertkishine gúl shoǵyn qoıýdan bastady. Kópshilik qatysqan mıtıngide aýdan ákimi Sáken Arýbaev sóz sóıledi.
1986 jylǵy Almatydaǵy Jeltoqsan oqıǵasy kemerinen asyp turǵan shovınıstik otarshyl saıasatqa qazaq halqynyń qarsylyǵynan týyndaǵan edi. Bizdiń jerlesimiz, «Halyq Qaharmany» Qaırat Rysqulbekov qatarynda bolǵan bul kóterilis Kreml bıleýshilerine qarsy ún qatqan jastarymyzdyń jalyndy daýysy jańa zamanǵa jol ashty. Qaırat Rysqulbekov Jeltoqsan oqıǵasynyń bas qaharmany ǵana emes, aýyrtpalyǵyn arqalaǵan bas qurbany, qyrshyn jas Qaırattyń esimin búginde búkil qazaqstandyqtar qurmetteıdi. Qashanda zulymdyqty ádildik jeńýmen keledi. Bul joly da ádildik saltanat quryp, tarıh tarazysy bárin óz ornyna qoıdy.
Elbasymyz N.Á. Nazarbaevtyń kemeńgerligi men sarabdal saıasatynyń arqasynda biz búgin tek táýelsiz el bolyp qana qoımaı, álem elderi moıyndaǵan irgeli memleketke aınalyp otyrmyz. Táýelsizdikke qol jetkizýden góri, ony saqtap turý baǵasy qymbat. Sondyqtan bizder keshegi táýelsizdik jolynda janyn qıǵan ardalarymyzdyń asyl armandaryn aqıqatqa aınaldyryp qana qoımaı, baıandy etýge tıispiz.
Bizdiń aldymyzda turǵan Qaırattyń ójet beınesi búkil jastarymyzdy Táýelsizdik jolynda erlik isterge shaqyryp turǵandaı sezinemiz. Ol barsha qazaq jastarynyń aıaýly tulǵasyna aınalaryn tirshiliginde bile alǵan joq. Ol azamattyq is atqardy, namys pen ar-ojdannyń taptalýyna jol bergen joq. Qaırat biz úshin máńgi tiri, máńgi jasaı beredi, – dep túıindedi sózin aýdan basshysy.
Al aýdandyq ardagerler keńesiniń tóraǵasy, aýdannyń Qurmetti azamaty Jasharaly Qoıgeldıev Jeltoqsan oqıǵasy, el birligi, órimdeı jas jigitter men qyzdardyń shovınıstik kózqarastaǵy totalıtarlyq júıege qarsylyǵy jaıynda aıtsa, Qaırattyń anasy Dámetken Asanbaeva jastarǵa Qaırattyń erjúrektigin, namysshyldyǵyn bersin, elimizdiń aıtýly azamattary bolyńdar, degen izgi analyq tilegin jetkizdi.
Táýelsizdik kúnine arnalǵan merekelik shara Abylaıhan alańynda jalǵasty. Shara barysynda aýdan basshysy Táýelsizdiktiń 20 qurdasyna estelik syılyq, áleýmettik jaǵynan az qamtylǵan 20 otbasyǵa qaıyrymdylyq paketin tapsyrdy. Ári qaraı merekelik is-shara aýdandyq mádenıet úıi ónerpazdarynyń konsertine ulasty.
Sol kúni tús qaıta aýdan ákimi Sáken Arýbaev bastaǵan aýdan basshylary Jeltoqsan oqıǵasynyń qurbany, «Halyq Qaharmany» Qaırat Rysqulbekovtyń týǵan aýyly Birlikte bolyp, Qaırattyń eskertkishine gúl shoǵyn qoıdy jáne merekege jınalǵan qaýymdy ózge merekelerge qaraǵanda shoqtyǵy bıik el Táýelsizdiginiń 20 jyldyǵymen quttyqtady.
Joldybaı DÁMETOV, jýrnalıst.
Jambyl oblysy, Moıynqum aýdany.
