Astanadaǵy L.N.Gýmılev atyndaǵy Eýrazııa ulttyq ýnıversıteti «Alash» mádenıet jáne rýhanı damý ınstıtýty kórnekti Alash qaıratkeri, ǵalym, alǵashqy matematıka oqýlyǵy avtorlarynyń biri Á.Ermekovtiń týǵanyna 120 jyl tolýyna oraı «Táýelsiz Qazaqstan jáne Álimhan Ermekov murasy» atty ǵylymı-praktıkalyq konferensııa ótkizdi. Ǵylymı jıyndy uıymdastyrýshylar Alash Ordanyń jáne qazaq zııalylarynyń ult tarıhyndaǵy, táýelsizdik pen bilim-ǵylym bastaýyndaǵy mıssııasyn qaıratker, ǵalym Á.Ermekovtiń murasy arqyly zerdeleýdi maqsat etken. Konferensııaǵa akademık Muhtarbaı О́telbaev, Adam quqyqtary jónindegi ókil Asqar Shákirov, jazýshy Aldan Smaıyl, Ulttyq muraǵattyń bas dırektory Marat Ábsemetov jáne basqa da ǵalymdar men mamandar qatysyp, baıandama jasady. Tanymal ǵalymdardyń táýelsizdik úshin kúresken, qazaq jeriniń tutastyǵyn bolshevıkter kósemi V.I. Lenınniń aldynda dáleldeı alǵan azamat-tulǵa týraly jan-jaqty oılary elorda zııalylaryna, stýdent qaýymyna erekshe áser etti.
Shara barysynda Álimhan Ermekovtiń nemeresi Oleg Maǵaýııauly bastaǵan Alash tulǵalarynyń urpaqtary estelikter aıtty. Qaıratker sóziniń túpnusqa mátini hattalǵan aýdıojazba tyńdalyndy.
Ǵylymı jıyn qorytyndysynda Alash qaıratkeri, alǵashqy matematıkterdiń biregeıi Á.Ermekovtiń aty men eńbegin respýblıka jáne elorda kóleminde ulyqtaý, eske alý týraly qarar qabyldandy.
«Egemen-aqparat».
