Senat komıtetiniń tóraǵasy Birǵanym Áıtimova ǵylymı nátıjelerdi kommersııalandyrý ǵylymı qamtylǵan ekonomıkany qalyptastyrýǵa, ǵylymı zertteýler nátıjelerin óndiriske engizýge jáne ınnovasııalyq ónimder óndirýge yqpal etetinine qatysýshylardyń nazaryn aýdardy. «Ǵylymı nátıjelerdi kommersııalandyrý, olardy ekonomıkalyq aınalymǵa tartý asa mańyzdy másele. Bizdiń basty maqsatymyz – ǵylym jáne ǵylymı-tehnıkalyq qyzmet nátıjelerin kommersııalandyrýdyń zańnamalyq turǵyda qarqyndy damýyna barlyq jaǵdaıdy jasaý», - dep atap ótti senator.
Dóńgelek ústel otyrysyna Senat depýtattary, memlekettik basqarý organdarynyń, ǵylymı-zertteý ınstıtýttarynyń, ǵylymı uıymdar men joǵary oqý oryndarynyń, «Nur Otan» partııasynyń, «Atameken» ulttyq kásipkerler palatasynyń basshylary men ókilderi, ǵalymdar men jetekshi mamandar qatysty.
Basqosýda ǵylymdy damytý jáne onyń nátıjelerin kommersııalandyrý jónindegi aýqymdy máseleler boıynsha pikirsaıystar boldy.
Dóńgelek ústel qorytyndysy boıynsha Parlament Senatynyń depýtaty, akademık Baqytjan Jumaǵulov sóz sóıledi.
Ol Qazaqstannyń ǵylymı jáne ǵylymı-ınnovasııalyq salasy búgingi kúni ǵana emes, sondaı-aq bolashaqta da mańyzy zor qundy nátıjelerge qol jetkizetinin atap ótti. Atap aıtqanda, aýyl sharýashylyǵynda belsendi ınnovasııalyq úrdis damyp keledi. «Baıserke-Agro» holdıngi búginde jetekshi kásiporyndar qatarynan oryn aldy, olar birqatar baǵyttar boıynsha rekordtyq kórsetkishterge qol jetkizdi. Asa mańyzdy mindetterdiń qatarynda - fermerlerdiń, aýyl sharýashylyǵy ǵylymy men bıznes arasyndaǵy kedergilerdi joıý, memlekettik tıimdi qoldaý, sandyq tehnologııalardy engizý bar. Ken-metallýrgııa jáne munaı-gaz sektorlarynda keleshegi zor jetistikter bar. Ǵylymı jetistikterdi kommersııalandyrý úrdisi bastaldy. Ǵylymı jetistikterdi bıznespen birlesip qarjylandyrýdy engizý negizgi qadam bolyp otyr. Ǵylymdy strategııalyq basqarýda ilgerileý bar. Ǵylym týraly ulttyq baıandamada álemdik ǵylymı úrdisterdi taldaý mańyzdy deńgeıge kóterildi. Ǵylym qory bizdiń elimiz úshin ǵylym men tehnıkanyń damýyndaǵy qazirgi úrdister týraly zertteýlerdi júıeli túrde júrgize bastady.
B.Jumaǵulov sondaı-aq osy saladaǵy birqatar máselelerdi aıqyndady, olardyń biri - bıznestiń ǵylymǵa jáne tehnologııalyq jetistikterge júıeli suranysynyń joqtyǵy.
Senator Elbasy N.Nazarbaevtyń Joldaýynda «naqty sektordyń jańa tehnologııalarǵa suranysyn yntalandyrý» mindeti qoıylǵanyn atap ótti. Ony sheshý úshin birqatar mınıstrlikterdiń, Úkimet pen Parlamenttiń kúsh-jigerin biriktirip, zań shyǵarý salasynda aýqymdy jumystardy júzege asyrý qajet. Oılasqan tujyrymdamalar, zań jobalary jumystaryn strategııalyq josparlaý, olardyń júıeli jáne kelisilgen áreketteri birinshi kezekke shyǵatyn bolady.
Dóńgelek ústeldiń qorytyndysy boıynsha naqty usynystar jasaldy. Senatorlar Qarjy mınıstrligi Bilim jáne ǵylym mınıstrligimen birlese otyryp, ǵylymdy qarjylandyrýdy Jalpy ishki ónimniń 1 paıyzy deńgeıine jetkizý, jyl saıyn jas ǵalymdar úshin ǵylymı zertteýlerge granttyq qarjylandyrý; Salyq kodeksine ózgertýler engizý arqyly ǵylymı-zertteý jumystaryn qosylǵan qun salyǵynan bosatý jóninde sharalar qabyldaý qajet dep sanaıdy.
Bilim jáne ǵylym mınıstrligine ǵylymı jáne ǵylymı-tehnıkalyq qyzmet nátıjelerin kommersııalandyrýǵa memlekettik qoldaýdy ulǵaıtý; qoldanbaly ǵylymı zertteýlerdiń kezeń-kezeńimen aǵylshyn tiline kóshýin júzege asyrý boıynsha sharalar qabyldaý; qoldanystaǵy normatıvtik-quqyqtyq aktilerge ózgertýler engizý arqyly qoldanbaly zertteýler men jańalyqtar úshin jeke sektordan qosymsha qarjylandyrýdy qamtamasyz etý tetigin ázirleý jáne taǵy basqa múmkindikterdi qarastyrý usynyldy.
Dóńgelek ústel aıasynda «Ǵylym-Bıznes-О́ndiris» kórmesi ótkizildi.
