Úkimet Jańaózenmen beınebaılanys jasady

Premer-Mınıstr Kárim Másimovtiń tóraǵalyq etýimen ótken keshegi Úkimet otyrysynda elimizdiń áleýmettik-ekono­mı­kalyq damýynyń 11 aılyq qorytyndysy qaraldy. Osy máseleni qaramas buryn Premer-Mınıstr Aqtaý qa­la­sy­men on-laın rejiminde beıne­baı­lanysqa shyǵyp, jaqynda ǵana «Samuryq-Qazyna» ál-aýqat qo­ry­nyń basshysy bolyp taǵaıyn­dal­ǵan О́mirzaq Shókeevpen, Mań­ǵystaý oblysynyń jańa ákimi Baý­yrjan Muhamedjanovpen sóı­lesti. Olardan Jańaózendegi qaı­ta qalpyna keltirý jumys­tary­nyń barysy týraly surap, at­qa­rylyp jatqan sharalardyń oryn­dalýyn bildi. Aldymen sóz alǵan О́mirzaq Shókeev ústimizdegi jyldyń 20 jeltoqsanyndaǵy derekter boı­yn­­sha birqatar málimetter keltirdi. Qa­zirgi kúni Jańaózen qalasy men Teńge jáne Shetpe aýyl­da­rynda qırandylardan paıda bol­ǵan qoqystardy tazartý jumys­ta­ry qyzý túrde júrgizilip ja­tyr. Barlyǵy 100 tonnadaı qal­dyqtar shyǵarylǵan. Búgingi kúni Jańaózen qalasyndaǵy ákimdik ǵımaratyn qaıta qalpyna keltirý jumystary bastalǵan. Al kom­mer­sııalyq nysandardy qaıta qal­pyna keltirýde týyndap otyr­ǵan máseleler bar. Sonymen qa­tar kommersııalyq nysandardan órtelgen jáne joǵalyp ketken zattardyń ornyn toltyrý úshin jergilikti «Jarylqaý» qaıyrym­dy­lyq qorynyń qarjylaryn paıdalanýǵa týra keledi. Ol úshin bul qorǵa úkimettik rezervten tys qarjy kózderi qarastyrylýy kerek. Zalal kelgen 31 nysannyń 12-siniń ıesi óz shyǵyndaryn 208 mıllıon teńgege balap otyr. О́mirzaq Shókeev osynyń anyq-qanyǵyna jetý úshin sarapshylar komıssııasynyń qurylatyndy­ǵyn málim etti. Shyǵyndardy qal­pyna keltirýdiń taǵy bir joly – jeke menshik ıelerine jeńildikti nesıeler berý. Bul úshin de arnaıy sheshim qajet. Osy máselege baılanysty Ká­rim Másimov Ekonomıkalyq damý jáne saýda mınıstri Qaırat Kelimbetovke Ulttyq bankpen birlese otyryp, jaǵdaıdy jedeldetip sheshý týraly tapsyrma berdi. Sondaı-aq Premer-Mınıstr qarjy máselesin jańa jylǵa deıin jedeldetip sheshý úshin árbir oblystan orta eseppen 100 mıllıon teńgeden kómek jınaý qa­jettigin eskertti. Keıbir máse­lelerge baılanysty tıisti zańdar men qaýlylarǵa da ózgerister engizilýi múmkin ekendigin aıtty. Jańaózende jumys istep jat­qan komıssııa osy ýaqyttyń ishinde halyqpen buqaralyq aqparat quraldarynyń qatysýynsyz jeti ret kezdesý uıymdastyryp, keıbir daýly máselelerdi talqy­la­ǵan. Halyq qazirgi kúni memleket tarapynan qolǵa alynyp jatqan isterdi quptap, qoldap otyr. Jumysqa ornalasý týraly ótinish bergen 104 adam úkimettik komıssııa usynǵan jumystarǵa barýǵa kelisimin bergen. Oblystyń jańa basshysy Baýyr­jan Muhametjanov búgingi kúni «О́zenmunaıgazǵa» qarasty kompanııalar tolyq jumys istep tur­ǵan­dyǵyn, jumysshylardyń bar­lyǵy jumysqa shyqqandyǵyn má­lim­dedi. Mańǵystaý jerinde júr­gen Ishki ister mınıstri Qalmu­ham­bet Qa­symov tergeý jumys­tary­nyń barysy jaıly málimet berdi. Sondaı-aq, halyqpen júr­gi­zilgen kezdesýlerde adamdar El­ba­synyń komendanttyq saǵat engizý jónindegi Jarlyǵyn tolyq quptap, tártip tolyq qalpyna kelgeninshe ony odan ári soza túsýdi suraǵan. О́mirzaq Shókeev óz sóziniń qorytyndysynda mundaǵy áleý­met­tik máselelerdi tolyq kóle­min­de sheshý úshin osynda jumys istep jatqan bıtým zaýyty sekildi birqatar naqty jobalardy júzege asyrý qajet bolar degen pikirin bildirdi. Máselen, azyq-túlik qymbatshylyǵyna tusaý salý úshin «QazAgro» holdıngin tarta otyryp, munda azyq-túlik beldeýin qalyptastyrǵan jón bolar degen usynysyn aıtty. Atalǵan máselelerdiń barly­ǵy komıssııa músheleriniń Úkimet basshysymen betpe-bet kezdesýlerinde talqylanatyn bolyp sheshildi. Munan keıin Úkimet kún tár­tibindegi máseleni qaraýǵa kiristi. Osy boıynsha negizgi baıandamany ja­saǵan Ekonomıkalyq damý já­ne saýda mınıstri Qaırat Kelim­betov­tiń aıtýynsha, ótken 11 aı­dyń ishinde ishki jalpy ónim kó­le­mi 7,5 paıyzǵa ósken. Mundaǵy bir qýanyshty jáıt, elimizde ın­dýstrııalyq-ınnovasııalyq damý baǵdarlamasynyń aıasynda qolǵa alynyp jatqan jumystar nátı­jesinde óńdeý ónerkásibi taý-ken ónerkásibimen salystyrǵanda, ozyq jaǵdaıda damyp, onyń kó­leminiń ósýi 6,7 paıyzdy qu­raǵan. Buǵan negizinen hımııa óner­kásibiniń, máshıne jasaý sa­lasynyń, metallýrgııa óner­ká­sibiniń qarqyndy damý nátı­je­sinde qol jetkizildi. Atalǵan másele jóninde keıinirek keń kólemde baıanda­maqpyz. Suńǵat ÁLIPBAI.