Ústimizdegi jyldyń sáýir aıynda senator Edil Mamytbekovtiń jáne ony qoldap qol qoıǵan bir top Senat depýtatynyń saýaly Úkimetke joldanǵan edi. Onda senatorlar Úkimettiń 2015 jyldyń 30 jeltoqsandaǵy Qaýlysyna sáıkes basymdy tártippen jekeshelendiriletin respýblıkalyq menshiktegi iri uıymdar tiziliminen Investısııalar jáne damý mınıstrliginiń qaramaǵyndaǵy «Kásibı áskerılendirilgen avarııalyq-qutqarý qyzmeti» respýblıkalyq memlekettik kásiporynyn (RMK) shyǵaryp tastaýdy suraǵan bolatyn. Kásibı qutqarý qyzmeti jekeshege berilse, ol aqsha tabýdy ǵana kózdep, memleketke tıimdiligi az bolatyndyǵy alǵa tartylǵan edi.
Osy depýtattyq saýalǵa Úkimet tarapynan atalǵan másele Ekonomıkany jańǵyrtý jónindegi memlekettik komıssııa otyrysynda qaralyp, «KÁAQQ» RMK múliktik keshen retinde eki kezeńdi prosedýralyq konkýrs boıynsha satylatyny jóninde jaýap berilgen bolatyn.
Bul jaýap depýtattardy qanaǵattandyrǵan joq, ony máseleniń mánisine boılamaı kezekti jaltarma jaýap dep baǵalaǵan senatorlar ekinshi ret saýal joldaǵan. Úkimettiń jaýabyn taldaǵan depýtattar: «KÁAQQ» RMK-nyń básekelestik naryǵyn arttyrýǵa qalaı áser etetindigi jaýapta ashyp kórsetilmegen. Sonymen qatar apattyq-qutqarý qyzmetinde qazirdiń ózinde 42 jekemenshik kásiporyn bar ekendigi aıtylǵan. Sóıtip senatorlar Úkimet basshysy B.Saǵyntaevqa máseleni ekinshi ret qaraýdy usynǵan edi.
Saýalǵa Úkimetten taǵy da jaýap keldi. Onda Prezıdenttiń 2018 jyldyń 10 qańtaryndaǵy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda jekeshelendirý josparyn tezirek júrgizip, memlekettik organdardyń vedomstvolyq uıymdaryn qysqartý talap etilgeni aıtylady. Qazir osy mindet jappaı oryndalyp, kásipkerlik qyzmetterge memlekettiń qatysýyn qysqartý jumystary qyzý júrip jatyr. Sonyń ishinde kvazımemlekettik sýbektilerdiń tizimi jasalyp, olar básekelestik ortaǵa berilýde nemese joıylýda. Qazaqstan Respýblıkasynyń Kásipkerlik Kodeksiniń 21-babynda jeke kásipkerlik pen básekelestikti damytý maqsatymen memleket kásipkerlik salasyndaǵy zańdy tulǵalardyń jarǵylyq kapıtalyndaǵy memlekettiń qatysýyn qysqartý kózdelgen. Alaıda osy Kodekstiń 192-babynda memlekettiń kásipkerlikke qatysýynyń (tıisti taýarlyq rynokta jekemenshik sýbektileriniń bolmaýy) negizderi kórsetilgen. Al «KÁAQQ» RMK Kodekstiń bul normasyna sáıkes kelmeıdi. О́ıtkeni apattyq-qutqarý jumystary naryǵynda jekemenshik qyzmetter áreket etip, olar básekelestikti arttyryp, baǵany túsirýge úles qosýda.
Sondyqtan Úkimettiń 2018 jyldyń 16 shildedegi №428 Qaýlysymen «KÁAQQ» RMK eki kezeńdik ádispen konkýrs arqyly satýǵa qoıyldy. Sonymen birge konkýrs sharty boıynsha jumys oryndarynyń sany jáne qyzmet túrleri saqtalady.
Sonymen birge jaýapta qazir apatty jaǵdaılardyń sany azaıa túskeni aıtylǵan. Máselen, ol 2010 jylmen salystyrǵanda 2017 jyly 68 prosentke azaıdy delingen onda.
Jaqsybaı SAMRAT,
«Egemen Qazaqstan»
