Patrıottar qatary tolyǵa tústi

Alystan at arytyp kelgen alma­ty­lyq áriptesterin Qazaqstan Patrıot­ta­ry partııasy Shymkent qalalyq ko­mı­tetiniń tóraǵasy Vladımır Nagısbaev qarsy aldy. Vladımır Ivanovıch UQK-niń zapastaǵy general-maıory ekendigin de aıta ketken jón. Ol osynda týyp-ósken. Aksıonerlik qoǵamnyń akkýmýlıator shyǵaratyn sehynyń jumys­shy­lary­men bolǵan kezdesý barysynda zaýyttyń jabylmaýy qajettigi keńinen sóz boldy. Jumysshylar zaýytty qala­nyń syrtyna shyǵarý máselesine ózde­ri­niń renishterin bildirdi. Zaýyt tolyq ju­mys kúshine enip, jergilikti jerdiń eko­nomıkasyna oń yqpalyn tıgizýi qa­jettigi jıyn barysynda ótkir másele etip qoıyldy. Sondaı-aq kezdesýde elimizdiń ındýstrııalyq-ınnovasııalyq damý  baǵ­dar­lamasyna sáıkes óńirlerde jańa óndiris oryndaryn kóptep ashý jóninde de biraz oılar ortaǵa salyndy. Sonda atalǵan kombınattyń bir kezderi dúr­kirep turǵany men qazirgi jaǵdaıy aı­ty­lyp, qalalyq ákimdiktiń zaýytty qa­la­nyń syrtyna shyǵarý týraly usy­ny­sy jumysshylar tarapynan synǵa alyn­dy. Partııa ózi tarapynan bul má­selede olardyń problemasyn kótere­tin­dikterin jetkizdi. Shymkentte, sonymen qatar, depý­tat­tyqtan úmitkerler kolledj shákirt­te­rimen, sportshylarmen kezdesý ót­kiz­di. Ońtústik Qazaqstan sport qaýym­das­tyǵy ókilderimen bolǵan kezdesý kezinde aýyl, aýdan jáne kishigirim qalalarda sport keshenderiniń joqtyǵy kóldeneń tartyldy. О́ıtkeni, jastardyń qazirgi tańda baratyn jeri bolmaı tur. Bul máseleniń túpkilikti sheshim tabýy úshin sportshylar bul salaǵa ınvestısııa tartý qajet, dep esepteıtindikterin de jasyrmady. Partııa belsendileri Shymkent shaha­ryn­da da bazarlardy aralap kórip, otan­dyq aýyl sharýashylyǵy ónimderin kóptep shyǵarý qajettigine kóz jetkizdi. Qazirgi tańda qala bazarlaryna sapasyz jemis-jıdekter syrttan tasylsa, sapa­ly da arzan ónimdi ózimizde-aq shyǵara ala­tyn edik, dedi patrıottyqtar. Olar­dyń paıymynsha, ońtústik óńirde jemis-jıdekterdi kóbirek ósirip, ony óńdeıtin óndiris oryndaryn da salýǵa bolar edi. Patrıottar partııasy atynan Má­ji­lis depýtattyǵyna kandıdattar keshe Almaty qalasynda «Qazaq tabıǵat qor­ǵaý» qoǵamynda bolyp, onda ekolo­gı­ıa­lyq máseleler talqyǵa salyndy. Eko­logııa ǵylymdarynyń kandıdaty, belgili ekolog Aıjan Sqaqova Patrıottar partııasynyń jastar qanaty atynan sóz alyp, birqatar ekologııalyq bastama­lardy kóterdi. Osy jerde jumys isteıtin kóptegen ekologtar ózderiniń par­tııaǵa ótetindikterin málimdep, bas-aıaǵy 37 adam partııa qataryna qosylǵany bel­gili boldy. Sol sııaqty «Qazaq ta­bı­ǵat qorǵaý» qoǵamynyń tóraǵasy, professor Amangeldi Sqaqov óziniń jú­rek­jardy tilegin bildirip, senim bildirilgen adam retinde partııa atyna biraz jyly sózder de aıtty. Osy oraıda Taraz qalasynda 5 adam partııa qataryna ótse, Shymkent shaharynda 7 erikti ózderiniń partııa qat­arynan kóringisi keletindikteri týraly nıet bildirdi. Olar partııaǵa qabyldandy. Osylaısha partııa belsendileri óz qatarlaryna qosylǵysy keletinderdi tirkeýden ótkizip, partııa bıletin qolma-qol tapsyryp otyrdy. Asqar TURAPBAIULY.