Taraptar kezdesý nátıjesi boıynsha «ShalqııaSınk LTD» jáne EQQDB arasynda 2017 jyldyń maýsymynda jasalǵan kredıttik kelisimge kepildik berý týraly kelisimge qol qoıdy. Qor Qyzylorda oblysyndaǵy Shalqııa ken ornynda baıytý fabrıkasynyń qurylysyn qarjylandyrýǵa tartylatyn 295 mln AQSh dollary somasyndaǵy mindettemelerge kepildik berýshi bolyp otyr.
«Shalqııa – Qordyń EQQDB-men yntymaqtastyǵyndaǵy negizgi jobalardyń biri. Elimizdiń eń iri qorǵasyn-myrysh ken ornynda baıytý fabrıkasynyń salynýy jylyna myrysh konsentratynda 100 myń tonnaǵa jýyq myryshty, qorǵasyn konsentratynda 20 myń tonna qorǵasyndy óndirýge múmkindik beredi», -dep atap ótti kezdesý barysynda Ahmetjan Esimov.
Sonymen qatar «ShalqııaSınk LTD» jáne Engineering Dobersek GmbH arasynda ken baıytý fabrıkasynyń qurylysyn tolyq aıaqtaý týraly kelisim-shartqa qol qoıyldy. Bul Shalqııa boıynsha jobany júzege asyrýdaǵy kelesi qadamǵa aınalyp otyr. Atalǵan nemis kompanııasy EQQDB-niń satyp alý erejelerine jáne talaptaryna sáıkes ótkizilgen eki kezeńdik saýda-sattyq qorytyndysy boıynsha joba merdigerimen (Plant-Design&Build) tańdaldy. Joba quny 651 mln AQSh dollaryn quraıdy. Jospar boıynsha kásiporynnyń birinshi kezegi 2020 jyly iske qosylady.
«Biz EQQDB-men yntymaqtastyqtyń aıasyn keńeıtýge daıynbyz. Máselen, bıyl jáne kelesi jyly jekeshelendirý tiziminde 100-den astam nysan bar. Bıznes turǵysynan alsaq, olardyń barlyǵy tartymdy», - dedi Ahmetjan Esimov.
Qor basshylyǵy Londondaǵy ınvestısııalyq forýmda brıtandyq kompanııalarǵa «Samuryq-Qazyna» kompanııalar tobynyń ınvestısııalyq múmkindikterin tanystyrdy. Forýmnyń ashylýynda sóz sóılegen Ahmetjan Esimov áleýetti ınvestorlardy Memlekettik aktıvterdi jekeshelendirý baǵdarlamasyna qatysýǵa jáne Qazaqstandaǵy úsh arnaıy ekonomıkalyq aımaqtyń aýmaǵynda birlesken kásiporyndardy qurý múmkindigin qarastyrýǵa shaqyrdy.
