Alǵys jaýǵan aýyl

Nura aýdanyndaǵy Izendi aý­y­ly­nyń tarıhy tyń ıgerý kezinen tartylsa da naǵyz órkendeý keze­ńi táýelsizdikke qol jetken jyl­dar­men tuspa-tus keldi deýge bolady. Oǵan deıin aımaqtyń bir búıirinde onshalyqty elenbeı kún keshken bul eldi meken tur­ǵyn­darynyń  mań­daıy­na jazyl­ǵa­ny qoı baǵýdan aı­nymaý edi. Ja­nyndaǵy sharýashy­lyq­tar as­tyq óndirý arqyly asyp-tasyp jat­qan­da áleýmettik-turmys­tyq jaǵ­daıy múldem turalap qal­ǵan  bul aýylǵa kóńil aýdary­lyp, eskerile qoımaǵan-dy.

Osyndaı kúıdegi  aýylǵa ót­pe­li  kezeńniń bastapqy ýaqyty óte aýyr soqty. Áıteýir jerlesterin al­ǵa bastar alǵyr azamattar taby­lyp, ómir kóshine ilestirip áketti. «Ot­qanjar» atty JShS qurǵan Qa­nat Otarbaevtyń uıytqy bolýy­men ızen­dilikter eńsesi tiktelip, jańa jaǵdaıda eńbek  etýge ju­my­lyp, qul­­shyndy.

Qazir adam tanyǵysyz ózger­gen Izendi oblystaǵy eń dáýletti ári kó­rikti eldi mekenderdiń shoq­tysy sa­na­lady. Qoı sany qaı­ta­dan 15 myń­nan assa, egin egý de  6 myń gektarǵa jetti.  Aldaǵy ýa­qyt­ta  jyl­qy túli­gin 700-den asyrý jobalanyp otyr.

Turǵyndarǵa súıinishtisi – eń­bek ıgiligi ortaq. Seriktestik ta­rapynan ujym múshelerine qam­qor­lyq molynan kórsetiledi. Má­se­len, sońǵy jeti jylda seriktestik esebinen áleýmettik salany da­mytýǵa  150 mıllıonnan astam  teń­ge jumsaldy. Bul kúnde aýyl ajaryn ashyp turǵan qoǵamdyq qyzmet kórsetý ort­a­ly­ǵy, atap aıtqanda, quramyn­da­ǵy kitaphana, baılanys bólim­she­si, medısına­lyq pýnkt «Ot­qan­jardyń» óz kúsh-qarajatyna salynyp berildi. Keıinde olar selolyq okrýg  qa­ramaǵyna erikti túrde  basybaıly ótkizildi.

Osylaısha turǵyzylǵan ny­san­dardyń biri – 30 oryndyq mektep-ın­ternat boldy. Alystaǵy qys­taq­tardaǵy shopandar bala­lary­nyń onda sabaqqa alańsyz daıyn­dalyp, úlgili tárbıe alý­laryna jaq­sy jaǵdaı barshy­lyq. Oqýshy­lar­dyń demalys kún­deri úılerine baryp-qaıtýyna arnaıy kólik bólingen. Jalpy, jetkinshekterge degen kómek-qoldaý aý­qy­my asa keń. «Jyl oqýshysy» nomına­sııa­sy boıynsha oqý jyly qorytyn­dy­synda  ozattar­dy yntalandyrý syılyǵy tap­syrylady. Sonymen birge «Úz­dik synyp» atanǵan  top ta  kóter­melenedi. Oqýshylar jyl saıyn Astananyń kórkem, tarıhı oryndaryn aralaýǵa ekskýrsııaǵa jiberilip turatyn úrdis te qa­lyptasqan. Boksshy Baqtııar Artaev atyndaǵy  sport kesheni so­lar­dyń enshisine tıgen. Mádenıet úıin­degi kórkemónerpazdar úıir­me­siniń tu­raqty jumys isteýi, mýzykalyq aspaptar, kıim-keshekter bosa-bolmasyn seriktestik moı­nynda.

Izendidegi jas otbasylarǵa aıa­ly qamqorlyq ta bir bólek. Tur­ǵyn úımen qamtamasyz etý qaras­tyrylǵan. Náresteli bolý­shy­larǵa 10 aılyq eseptik kórsetkish kóleminde bir jolǵy «Jórgekpul» tólenedi. Aýyl azamattary arasy­nan mamandar daıarlanady.

Osyndaı ıgi is-sharalardyń bas­tamashysy retinde seriktestik jetekshisi Qanat Otarbaev bur­na­ǵy jyly  Bilim jáne ǵylym mı­nıstrliginiń uıymdastyrýymen ótken baıqaýdyń «Bilim» mesena­ty  dep tanylsa, son­daı-aq bız­nes­tiń áleýmettik jaýapkershiligi jónindegi respýblıkalyq «Paryz» konkýrsynyń altyn júlde­geri ekenin de  ataı ketken oryndy.

Sóz basynda aıtylǵandaı, Izen­di tazalyǵy men mádenıet­tiligi ja­ǵy­nan aımaqtaǵy úlgili aýyl. «Eń ádemi aýla», «Eń ádemi úı»,  «Eń ádemi kóshe» turǵyndar kóńiline jaqqan, belsene qatysa­tyn  baı­qaý­lar. Olar ádette merekeli dýmanǵa ulasyp, syı-sııapattar tartý etilip, jurtty  týǵan ortalary kelbetin kóriktendirýge baýraıdy.

Záýlim meshit, jarqyraǵan má­denıet úıi, sándi toıhana, dóńge­len­gen qymyzhana, balalar oı­naý­ǵa ar­nal­ǵan alańqaı, syńǵyrlaǵan sport kesheni, ıisi burqyraǵan naýbaıhana mine, búginde  Izendiniń kóz súı­sin­terlik, qyzyqtyrarlyq kórinis beı­ne­si osyndaı. Sharýa­shy­lyǵy nyǵa­ıyp, ekonomıkalyq qýaty kúsheıgen saıyn «Otqan­jar» JShS-niń aýyl­dyń áleý­met­tik salasyn áldendirýge asa yn­ta­lylyǵy qýantady. Kórgen adam­nyń janyn jadyratyp sala beretin, tynys-tirshiligi súısindi­re­tin, ajary tamsandyratyn bul  me­ken­­niń quttylyǵy áleýmettik qam­qor­lyqtyń arqasy. El ishi qamyn oılaǵan azamattary barymen mereıli. Múddelerin qorǵap, shyna­ıy keń­peıildilik, jaısań jomart­tyq ja­saýshy baýyrlastaryna rıza. Táýel­siz zamanda ósip-órken­deý­diń baǵy qonǵan Izendi qazirgi qazaq  aýyly­nyń juldyzdy beınesindeı  jańa­ryp-qulpyrýy támam jurtty ta­ńyr­qata, jarqyraı túsip otyr.

Tamasha ózgerister jasaýshy, alǵa umtyldyrýshy, shat-shadyman ómirge bóleýshi azamattaryna aq alǵys jaýǵan aýyl bul.

Aıqyn   NESIPBAI.

Qaraǵandy oblysy, Nura aýdany.