Jańa jyldyq shyrsha shattyǵy

Astanadan – Dastan KENJALIN.

Keshe Astanadaǵy «Dýman» oıyn-saýyq ortalyǵynda Qazaq­stan Respýblıkasy Prezı­denti­niń atynan jetim balalar men ata-ana qamqorlyǵynan aıyryl­ǵan balalarǵa arnalǵan Jańa jyl­dyq shyrsha ótti. Osynda balalardy Elbasy Nur­sultan Nazarbaev LED-dıs­pleıdegi ekran arqyly kele jat­qan Jańa jylmen quttyqtap, mol baqyt, zor densaýlyq, oqýda ozat bolýǵa tilektestigin bildirdi. «Qymbatty balalar, búgin baı­taq elimizdiń barlyq óńirinde óne­geli balalar Jańa jyldyq shyr­shanyń aınalasyna jınal­dy. Jańa jyl, eń aldymen, balalar men búldirshinderge qýanysh syılaıtyn mereke. Men senderdi, sender arqyly barsha qazaq­stan­dyq balalardy kele jatqan Jańa jyl merekesimen quttyqtaımyn. Bıyl Qazaqstannyń Táýel­siz­di­gine 20 jyl tolǵanyn bilesizder, sondyqtan bul jyl barshamyz úshin aıryqsha jyl boldy. Táý­el­sizdik arqyly bizdiń uly Ota­ny­myz jyldan jylǵa órkendeı túsýde. Qazir dúnıe júzi Qazaq elin qurmetteıdi. Sender osyn­daı erekshe elde ósip kele jatqan baqytty urpaqsyńdar. Zerdeli de zerek, bilimdi de bilikti bolyń­dar. Buǵan elimizde barlyq múm­kindik bar. Jasampaz isterdiń bar­lyǵy senderdiń jarqyn bola­shaqtaryń úshin jasalyp jatyr», – dedi  Prezıdent N.Nazarbaev. Odan ári balalar shyrshanyń aınalasynda álemniń ártúrli ha­lyqtarynyń – qazaq jáne orys, aǵylshyn jáne shved, nemis jáne fransýz, túrik jáne dat ertegi­leri­niń keıipkerlerimen birge baqyt formýlasyn izdeýge ty­rysty. Onda búldirshinderge Aıaz Ata men Aqshaqar baqyt for­mý­lasynyń 11 áripten turatynyn aıtyp, sol sózdi sheshý úshin baı­qaýlar men sózjumbaqtar ótkizdi. Sóıtip, balalar merekelik shara barysynda baqyt formýlasyn tapty. Ol formýla – «Táýel­siz­dik – altyn besigim» dep ataldy. Kesh sońynda balalarǵa Elbasy atynan syılyqqa jeke noýtbýkter, «Bal-bala» ulttyq oıynshyqtar, «Daryn» respýb­lıkalyq ortalyǵynyń kitap­ta­ry, tátti syılyqtar men jumsaq oıynshyqtar tabys etildi. Osy jerde balalarmen birge sharaǵa qatysqan Astana qalasy ákiminiń orynbasary Aıda Balaeva bizben áńgimesinde Jańa jyldyq shyr­shaǵa balalar úılerinen 200-den astam tárbıelenýshiniń qatys­qanyn, mundaı merekelik is-shara Jańa jylǵa deıin qalanyń ár jerinde jalǵasatynyn aıtty. Sonymen birge, ol qalada myń­nan astam Jańa jyldyq shyr­shalardyń ótkizilip, oǵan 50 myńnan astam balanyń qatysyp jat­qanyn jetkizdi. «Jańa jyl qarsańynda ba­la­lardyń bári merekelik sharadan tys qalmaıdy. Astana qala­synyń ákimdigi demeýshilerdiń kómegimen barlyq búldir­shi­n­der­diń, ásirese, jetim, ata-ana qam­qorlyǵynan aıyrylǵan, tur­my­sy tómen otbasynan shyqqan ba­lalardyń kóńilin tabý úshin bárin jasaıtyn bolady», – dedi ol. Al bizdiń Jańa jyldyq shyrshaǵa qatysqan 200-den astam balanyń ishinde ózge etnos ókil­deriniń 16 búldirshininiń memlekettik tilde erkin sóılep, qazaq­sha taqpaqtar men ánderdi naqy­shyna keltire oryndaǵany qýant­ty. Olardyń bári №63 balalar úıiniń tárbıelenýshileri eken.

Almatydan – Aınash ESALI.

Keshe  Almatydaǵy Qabyldaý úıinde Elbasy Nursultan Nazar­baevtyń atynan balalar úıiniń tárbıelenýshileri men jaǵdaıy tómen otbasylardyń balalaryna, oqý ozattaryna jáne ár túrli baı­qaýlardyń jeńimpazdaryna ar­nalǵan dástúrli Jańa jyldyq shyrsha bolyp ótti. Bıyl osymen 12-ret uıym­das­tyrylǵan shyrshaǵa 150 bala qatysty. Balalarǵa teatrdyń, kıno men estradanyń eń úzdik ártis­teriniń qatysýymen arnaıy daıyndalǵan merekelik baǵdarlama usynyldy. Olar shyrshany aınala án aıtyp, bı bılep, Aıaz ata men Aq­shaqar­ǵa óz ónerlerin kórsetti. Jańa jyldyq qoıylymda súıikti ertegi keıipkerleri – Aldarkóse men Jırenshe, Rapýnsel, Jalmaýyz kempir, sondaı-aq  kele jat­qan Aıdahar jylynyń sımvoly  búl­dir­shindermen birge álem halyq­ta­ry­nyń túrli oıyndaryn birge oınap,  báıgege qatysyp, halyq bılerin bıledi. Balalardy 2012 jylmen sondaı-aq tanymal ártister Alıshman,  Emotion jáne «Orda» toptary quttyqtap, dýmandy merekeniń ajaryn ashty. Merekelik shyrshanyń bastalýynda arnaıy jazylǵan beınetaspa arqyly el Prezıdenti Nursultan Nazarbaev shyrshaǵa jınalǵan balalardy kele jatqan Jańa jyl merekesimen qut­tyq­tap, olarǵa zor densaýlyq, jańa jetistikter men barlyq armandarynyń oryndalýyn, barynsha jaqsy oqyp, sapaly bilim alyp, maqsattaryna jete berýlerin tiledi. Merekelik oıyn-saýyq baǵdarlama­sy­nan keıin ár bala Elbasy atynan syılyqtar aldy.

Aqtóbeden – Satybaldy SÁÝIRBAI.

«Táýelsizdik – altyn besik» degen atpen «Atameken» demalys ortaly­ǵyn­da uıymdastyrylǵan Prezıdent shyr­sha­syna bizdiń oblystyń 200 balasy qatysty. Olar — 9-13 jas ara­ly­ǵyndaǵy úzdik oqıtyn, úlgili, tártipti jetim, ata-anasynyń qamqor­ly­ǵyn­syz qalǵan, múgedek jáne az qam­tylǵan, kópbalaly otbasylardyń balalary. Qyzyldy-jasyldy shamdary jar­qyldaǵan, ádemi bezendirilgen alyp shyrshanyń mańyna toptasqan balalar Táýelsiz Qazaqstannyń qur­da­sy Altyn batyr men Aqshaqardy qo­shemetpen qarsy aldy. Kóńildi toptyń ajaryn Aldar Kóse de toltyrdy. Budan soń oqýshylar ertegiler eliniń qonaq­tarymen birge respýblıkamyzdyń ár óńirine saıahat jasady. Baldyrǵandar Aıaz Atany erekshe yqylaspen qarsy aldy. Merekeniń bas keıipkeri búldirshinderdi Jańa jylmen quttyqtap, jyly lebizderin bildirdi. Budan soń balalar bir-biriniń qoldaryn ustap, shyrshany aınalyp án saldy, áýen yrǵaǵymen bıledi. Budan keıin kóńildi top Jańa jyl «ıesi» – Ulýdy qoshemetpen qarsy aldy. Elimizdiń Bas shyrshasyna arnaıy shaqyrtýmen kelgen balalar Elbasy Nursultan Nazar­baevtyń quttyqtaýyn tyńdady. Prezıdent quttyqtaýynan soń ob­lys ákimi Arhımed Muhambetov qut­tyq­taý sóz sóıledi.  Arhımed Begejan­uly Prezıdent shyrshasyna jınalǵan balalardyń árqaısysyna Elbasy atynan syılyq taratty. Ár syılyqta jyly syrt kıim, bas kıim, etik, sporttyq kıimder, keńse taýarlary salynǵan rıýkzak, tátti taǵamdar bar.

Atyraýdan – Joldasbek ShО́PEǴUL.

Bul kúndi, ıaǵnı, Elbasy Nursultan Nazarbaevtyń Jańa jyldyq quttyq­taýyn atyraýlyq balalar da asyǵa to­sady. Jańa jyldyq shyrshaǵa qatysýǵa shaqyrý alǵan 200 balanyń kóńili ala­burtyp, Atyraýdaǵy dene shynyqtyrý-saýyqtyrý kesheniniń qaq ortasyna qoıylǵan jasyl shyrsha janyndaǵy shattyq bastalǵansha degbiri qalma­ǵanyn baıqadyq. Bul joly Prezıdenttik shyrshaǵa munaıly óńirdiń jeti aýdanynyń ár­qaısysynan 10 baladan shaqyrylsa, Atyraý qalasynyń kishkentaı turǵyn­da­ryna kóbirek shaqyrý berilipti. Balalardyń barlyǵy da máz-meıram, aralarynda Aıaz Atany kútýge ázirligin pysyqtaý ústinde júrgeni kóp. Biri jattaǵan taqpaqtaryn qaıta-qaıta qaı­talap álek. Endi biri bı yrǵaǵyna berilip júr. Aldymen ortaǵa barshamen qoshtasý úshin Qoıan shyqty. Onyń izin ala Ulý shyǵyp, barshaǵa baq-bereke tiledi. Al­tyn Adam da Qazaqstannyń Táýelsizdik alýymen qol jetkizgen tabystarynyń aldaǵy kezeńde de jalǵasýyna tilekshi ekenin jetkizdi. Aq taıaǵyn taıanyp, aq saqaly jelbirep Aıaz Ata ortaǵa shy­ǵyp, sıqyrly taıaǵymen alýan túrli oıynshyqtarǵa kómilip turǵan jasyl shyrshanyń shamdaryn jaqqanda, úlken zaldy balalardyń qýanyshty ý-shýy kernedi. Osy sátte qabyrǵaǵa ilingen úlken ekrannan Elbasy Nursultan Na­zarbaevtyń Qazaqstannyń barlyq bal­dyrǵandaryna arnaǵan Jańa jyl­dyq quttyqtaýy bastaldy. Elbasy bala­lardy Jańa jylmen quttyqtap, bilimdi bolýǵa, ǵylymdy meńgerýge sáttilik tiledi. Atyraý oblysy ákiminiń birinshi orynbasary Bolat Dáýkenov Elbasy atynan Jańa jyldyq shyrsha merekesine jınalǵan balalarǵa jyly kıimderdi tartý etti. Ortaǵa alyp tátti tort ta ákelindi. Al qýanyshtan júzderi bal-bul janǵan balalar Aıaz Atamen birge shyrshany aınala dóńgelenip bıleı jóneldi.  

Qostanaıdan – Názıra JÁRIMBETOVA.

Jangeldın aýdanynda turatyn Jaqan Dýman Prezıdent shyrshasyna daıyn­dal­ǵaly qashan. Osy shyrshaǵa bara­ty­nyn estigende qýanyp, sabaqqa da bar yqylasyn bólip, «bestikter» alyp júrdi. Anasy qoıannyń kıimin tigip berdi. Aq qar, kók muzda 8 saǵat júrip, sonaý shal­ǵaı­daǵy Jangeldın aýdanynan Qos­ta­naı­ǵa da jetti. Oblys ortalyǵyndaǵy «Aq shańyraq» meı­ram­ha­nasyna balalar ob­lys­tyń barlyq aýdandary men qala­larynan jına­lyp­ty. Meıramhananyń ishi ertegidegideı bezendirilgen. Ekranda Elbasy Nursultan Nazarbaev balalardy jańa 2012 jylmen quttyqtap, olardyń densaýlyǵynyń myqty bolyp, jaqsy oqýyna tilek bildirdi. – Elbasynyń atynan alǵan syıly­ǵy­ma keremet qýandym, – deıdi kishkentaı Jaqan. Balalardy munan keıin oblys ákimi Sergeı Kýlagın kele jatqan Jańa jyl­men quttyqtady. Oblys basshysy jas urpaq úshin elimizde kóptegen ıgilikti jumystar atqarylyp jatqanyna toq­tal­dy. Qazaqstannyń patrıoty bolyp ósýi úshin olarǵa jaqsy oqyp, ustaz­da­ry­nyń aqyl-keńesin buljytpaı oryn­daýy kerektigin aıtty. Balalarǵa baqyt tiledi. Prezıdent shyrshasyna oblystyń barlyq óńirinen 150 bala qatysty. Alys aýdandar men aýyldardaǵy kóp balaly, áleýmettik az qorǵalǵan ot­ba­synan shyqqan jáne jetim balalar shyrsha qyzyǵyn, Aıaz Ata men Aq­sha­qardyń kelýin jáne kishkentaı óner­paz­dardyń konsertin tamashalady, olarǵa Elbasy atynan berilgen syılyqtaryn taratty.  

Qaraǵandydan – Aıqyn NESIPBAI.

Jańa jyl merekesi, ásirese, balalar úshin úlken qýanysh. Temirtaýdaǵy eń záýlim ári keń ǵımarat – Mádenıet úıinde bas qosqan qalanyń 200-ge tarta jetkinshegi júzderi bal-bul jaınap, ómirlerindegi shattyq shaqty birge qar­sy alyp turǵandaryna mereıleri ta­syp, umytylmas áserge bólendi. Buǵan deıin bir-birin bilmeıtin ár mektepterdegi oqý ozattary, kóp balaly jáne áleý­mettik jaǵdaıy álsiz otbasylar órenderi, múgedek jasóspirimder mu­nyń aldynda shahardyń ádemi oryn­da­ryn, ólketaný-tarıhı murajaıyn aralaý kezinde tanysyp-tabysyp, baýyr­las­qan bolatyn. Ásem kórikten­diril­gen, bıik, sáýleleri jarqyraǵan Prezıdent shyrshasy aldynda ár etnos ulandary qol ustasyp, dóńgelene án men bıge qosyldy. Elbasynyń ózde­rindeı barsha qazaqstandyq zaman­das­taryna arnalǵan quttyqtaý sózi kóńilderin ósirdi. Qýanyshtaryna ortaqtasýǵa, bólisý­ge kelgen oblys ákimi Serik Ahmetov 2012 jyl bárine baqyt pen shattyq, ata-analaryna bereke men tabys ákelýin tiledi. Memleketimizdiń erteńgi órkendeýin jalǵastyratyn óskeleń urpaq retinde tereń bilim, sanaly tár­bıe sińirý arqyly eren isterge laıyq­ty úles qosatyndyqtaryna, Elbasy­nyń aıaly qamqorlyǵyn aqtaı alatyn­dyqtaryna senim bildirdi. Prezıdent shyrshasy kezdesýine jı­nal­ǵan balalar qýanyshyn bárine birdeı syılanǵan tartý-taralǵylar odan saıyn jarastyrdy.  

О́skemennen – Ońdasyn ELÝBAI.

Jańa jyldyq Prezıdent shyrsha­syna Kendi Altaıdyń aýdandary men qalalarynan 200-ge tarta bala keldi. Onyń ishinde 41-i jetim balalar, 80-i turmysy az qamtylǵan otbasylardyń balalary, al qalǵandary oqýda ozat shákirtter. Densaýlyq saqtaý kesheniniń keń zalyndaǵy sahna tórinde Jańa jyldyq shyrsha jarqyrap tur. Bir ýaqytta sahnaǵa Jambyl atyndaǵy qazaq drama teatrynyń ártisteri shyǵyp, Aıdahar, Tazsha bala, Tarıhshy áje kele jatqan Jańa jyldyń erekshelikteri jaıly qyzyqty etip aıtyp berdi. Balalar bı bılep, án saldy. Elbasy N. Nazarbaev teledıdardan óz quttyqtaýyn joldady. Oblystyq bilim berý basqarmasy bastyǵynyń orynbasary Dýmanǵazy Arǵynǵazınniń aıtýynsha, Elbasynyń sálemdemesi – 50 myń teńgeniń qysqy kıimderi syıǵa tartyldy. Biz Rıdder qalasyndaǵy Gagarın atyndaǵy mektep-ınternattyń ustazy Álııa Janbatyrovamen tildeskenimizde, olardyń Prezıdent shyrshasyna kóńilderi tolatynyn tilge tıek etti. Ata-anasy joq balalar kórkeıgen, jańa ǵımarattar salynyp jatqan О́skemendi aralap, teatrda boldy.  

Qyzylordadan – Cerik PIRNAZAR, jýrnalıst

(arnaıy «Egemen Qazaqstan» úshin).

Keshe Qyzylorda qalasynda da Prezıdent shyrshasynyń shamy jaǵyldy. Ol Syr boıy bas qalasyndaǵy № 264 mektep-lıseıde saǵat 11-de shapaǵyn shashty. Munda da Elbasy Jańa jyl­dyq shyrshasy Qazaqstan Respýblıkasy Táýelsizdiginiń 20 jyldyǵyna arnal­dy. Negizgi mazmuny «Táýelsizdik – altyn besik» taqyryby aıasyna astasa ótkizilgen saltanatty sharaǵa oblys­taǵy 9-13 jas aralyǵyndaǵy oqý ozat­ta­rynyń arasynan jetim, ata-ana qam­qorlyǵynan qaǵys qalǵan, az qamta­ma­syz etilgen jáne kóp balaly otbasynan shyqqan balalar qatysty. Negizinen shara segiz bólimnen tur­dy. Ol teatrlandyrylǵan kórinispen órnek­teldi. Munda bári de boldy. Balalar ertegiler eline de saıahat jasady, qazirgi zamannyń tamashalaryna da qa­nyqty. Sonyń tórtinshi bóliminde bala­lardyń shaqyrýy boıynsha Aıaz Ata men Aq­shaqar ortaǵa shyǵyp, dýman kórigin qyz­dyrdy. Oblys ákimi Bolatbek Qýandyqov osy sátte sıqyrly taıaqshanyń kómegimen shyrsha shyraǵyn tutatty. Budan soń balaqaılar Elba­sy­nyń ınteraktıvti quttyqtaýyn den qoıa tyńdady. Munyń sońyn ala aımaq basshysy da qatysýshylardy Jańa jylmen qut­tyqtap, balalarǵa syılyqtar tap­syr­dy. Barlyq balalar noýtbýk, kitaptar men tátti syılyqtarǵa ıe bolyp, qýa­nyshqa bólendi. Sodan keıin balalardy sýretke túsirý rásimi boldy. Balalar oblys ákimimen, kelgen qonaqtarmen, ertegi keıipkerlerimen sýretke túsip shattandy. Toıdyń sońy merekelik das­tarqanǵa jáne mýzykalyq baǵdarlamaǵa ulasty.  

Kókshetaýdan – Baqbergen AMALBEK.

Qazaqstan Respýblıkasynyń Prezıdenti  Nursultan Nazarbaevtyń atynan balalardyń Jańa jyldyq shyrsha toıy ádettegideı eń úlken ǵımarat – «Kókshetaý» mádenıet saraıynda ótkizildi. «Táýelsizdik – altyn besik» ataýyndaǵy merekege barlyq 16 aýdannan, qalalardan jastúlekter qatysty. Olardyń arasynda 7 balalar úıinen, 4 oblystyq arnaıy mektep-ınternat­y­nan, balalar men jasóspirimderdi ońal­tý jáne áleýmettik beıimdeý ortaly­ǵynan, sanatorıılik mektep-ınter­na­tynan oblystyq múgedek balalar asso­sıasııasynan, kópbalaly otbasylardan ókilder bar. Jalpy, 9-13 jas ara­ly­ǵyndaǵy 200 bala shaqyrylypty. Eki kúnge sozylǵan alaqaı toıdyń alǵashqy kúninde Kókshetaý qalasynyń kórnekti jerlerin aralaǵan balalar jańadan salynǵan «Býrabaı» sport kesheninde, muzdy qalashyqta boldy. Keshki merekelik as mázirinen dám tatqan balǵyndarǵa arnap №3 oblys­tyq daryndy balalar mektep-ınter­natynyń kúshimen qyzyqty konsert qoıyldy. Asyǵa kútken shyrsha toıy da bastaldy. Saraıda olardy ertegiler jáne mýltfılmder keıipkerleri qar­sy aldy. Ertegiler áleminiń qusha­ǵyn­daǵy balalar kóp uzamaı teatrlandy­ryl­ǵan kórinister qaHarmanyna aına­lyp ketkenin de baıqamaı qalǵandaı. Olardy Memleket basshysy Nursultan Nazarbaev úlken ekran arqyly Jańa jyl merekesimen quttyqtady. Oblys ákimi Sergeı Dıachenko El­basy atynan shyrsha dýmanyna shaqyrylǵan balalardyń bárine noýtbýkter men tátti saýǵalar tabystady.  

Oraldan – Temir QUSAIYN.

Júrdek poıyz Qazaqstan qalala­ryna aıaldap, odan soń júrisin qaıtadan údete túsedi. Sońǵy beket – Astana. Elordanyń myń qubylǵan ottary samaladaı jarqyrap kóringendeı bolady. Búldirshinderdi munda Bas qalanyń Bas sáýletshisi úlken meıirimmen, atalyq júrekpen qarsy alyp, Jańa jyldary­men quttyqtap, kókirekterine menmun­da­laǵan arman shyraǵyn jaqqandaı. Bas sáýletshi dep otyrǵanymyz – El­ba­sy, Ult kóshbasshysy Nursultan Na­zar­baevtyń ózi ekeni Prezıdent shyr­shasyna jınalǵan balalardyń qýa­nyshyn odan ári kóbeıte túskendeı. Bir qaraǵanda, olardyń keshegi ertegideı kórgen álemi shyndyqqa aınalyp, óte qysqa ýaqytta ásem elorda boı túzepti. Ertegi emes, shyndyq qoı bul. Bıyl Aqjaıyqta Prezıdent shyrsha­syn uıymdastyrýshylar oǵan qaty­sý­shy­larǵa osyndaı tyń da tosyn teatr­landyrylǵan ssenarıı úlgisin usyndy. Taǵy bir erekshelik – bıyl oblys ortalyǵyna, Prezıdent shyrshasyna qa­tysýǵa kelgen baldyrǵandar ótken jyldarmen salystyrǵanda kóbirek kórindi. Iá, túısigimiz aldamapty. Olar­dyń qataryna bıyl 50 búldirshin qosylypty. Kóp balaly jáne turmysy tómen otbasylardyń perzentteri, oqý úzdikteri óz ónerlerin ortaǵa saldy. Olardyń qaı-qaısysy da Pre­zı­denttiń arnaıy joldaǵan syı-sııa­patynan tys qalǵan joq. Elbasynyń jarqyn júzi ekrannan kóringen kezde balalar eshkimniń nusqaýynsyz dý qol shapalaqtap Nursultan Ábishulynyń ózderine joldaǵan quttyqtaýyna yqy­las­tana qulaq túrdi.  

Pavlodardan – Farıda BYQAI.

Jyl saıyn jeltoqsan aıynyń sońynda Elbasy atynan Jańa jyldyq shyrshany ótkizý dástúrge aınalǵany belgili. Jańa jyl keler aldynda  ózderin Elbasy quttyqtaıtyn Jańa jyldyq shyrsha merekesi bolatynyn balalardyń bári de biledi. Bıyl da solaı, oblys ortalyǵyndaǵy «Astana» muz aıdyny saraıynda oblys ákimi Baqytjan Saǵyntaevtyń qatysýymen Elbasy Nursultan Nazarbaevtyń atynan Jańa jyldyq shyrsha ótkizildi. Jalpy, bul mereke jetim balalarǵa, múgedek balalarǵa, az qamtamasyz etilgen jáne kóp balaly otbasylarynan shyqqan balalarǵa, sondaı-aq 9-13 jasqa deıingi elimizdiń úzdik oqýshy­laryna arnalyp ótkiziledi.  Jýyqta oblystyń 150 balasy respýblıkalyq Jańa jyldyq shyrshaǵa qatysyp qaıt­ty. Al keshe oblystyń qalalary men aýyldarynan kelgen 150 bala Jańa jyldyq ásem shyrsha merekesine qatysty. Elbasy Nursultan Nazarbaev úlken teledıdar arqyly balalarǵa  quttyqtaý joldady. Ár balaǵa sport kostıýmderi, kitaptar, mektepke ar­nalǵan quraldary bar sómke, táttiler toly merekelik qoraptar berildi. Balalar kóńildi, ánder shyrqap, shyrshany aınala oıyndar oınap, bıler bıledi. Táýelsizdik, Otan týraly taqpaqtar aıtty. Tereńkóldegi balalar úıinen 8 bala keldi. Munda tárbıelenip jatqan ózge etnos ókilderiniń balalary qazaq tilinde án aıtyp, taqpaqtar oqyp berdi. Basqa da balalar úıleriniń tár­bıelenýshileri óz ónerlerimen kózge tústi. Budan keıin Sháken Aımanov atyndaǵy kınoteatrda 3 «D» pishininde «Smesharıkı» kınofılmi kórsetildi.  

Petropavldan – О́mir ESQALI.

Prezıdenttiń Jańa jyldyq shyr­sha­sy Pogodın atyndaǵy orys drama teatrynda atalyp ótti. Oǵan qatysý qurmetine ata-ananyń qamqorlyǵynsyz qalǵan 200 bala ıe boldy. «Táýelsizdik – altyn besigimiz» degen taqyrypta ótken jıyndy tama­sha­laýshylar  Elbasy Nursultan Nazar­baev­tyń Jańa jyldyq quttyqtaýyn erekshe yntamen tyńdaǵannan keıin bal keshin qyzyqtaýǵa kiristi. Ertegiler eline saıahattap, neshe túrli oqıǵalardy bas­tan keshti. Sáttilikke jetkenderine qýanysty. Balalardyń qýanyshyna oblys ákimi Serik Bilálov te ortaq­ta­syp, ıgi  tilegin jetkizdi. Prezıdenttiń jańa jyldyq syılyqtaryn saltanatty jaǵdaıda tabystady. Karnavaldyq kostıýmder konkýrsy qorytyndylanyp, Shóptikól korrek­sııa­lyq mektep-ınternatynyń 5 synyp oqýshysy Danııar Ismaılov gran-prıdi utyp aldy. Aıyrtaý  aýdandyq jáne oblystyq jetim balalar úıleriniń tárbıelenýshileri Nafısa Ivanova men Sofıa Pısaleva  birinshi oryndy ıelendi. Jeńimpazdar men júldegerler baǵaly syılyqtarǵa ıe boldy.  

Tarazdan – Kósemáli SÁTTIBAIULY.

Prezıdenttiń Jambyl óńirindegi Jańa jyldyq shyrshasyna oblystyń barlyq aýdandary men Taraz qalasynan 200 bala qatysty. Olardyń 58-i kóp balaly, 99-y az qamtamasyz etilgen otbasylardan bolsa, 22 bala jetim, al 21 bala ata-analarynyń qamqorly­ǵyn­syz qalypty. Ata-analary múgedek búldirshinder de bar. Biraq buǵan qarap beıkúná sábılerdi baqytsyz deýge bolmaıdy. О́ıtkeni, olar Otan-anasy barda ómirden ógeılik kórmek emes. Sondyqtan bolar, bala­lardyń Jańa jyldyq merekesin bar mázirimen kóńildi ótkizý úshin jergilikti bıýdjetten 13 mıllıon 362 myń 200 teńge bólinipti. Osyndaı qamqor­lyq­tyń arqasynda Prezıdent shyrsha­sy­nyń tańǵajaıyptaryn tamashalaýǵa kelgen balalardyń árqaısysyna 60 myń 300 teńge kólemindegi syılyqtar tapsyryldy. Olardyń ishinde bala­lardyń sholaq tony, sporttyq bas kıim men aıaq kıimder, túrli oqý quraldary salynǵan sómke, jumsaq oıynshyqtar men táttiler bar. Prezıdent shyrshasyna alystan kó­ńilderi alaburtyp jetken balalar óz­derine arnalǵan mádenı baǵdar­la­malardy tamashalap, «Eýrazııa» oıyn-saýyq ortalyǵyndaǵy oıyndarǵa qatysty. Oblystyq drama teatrdyń ártisteri daıyndaǵan qoıylymdy qyzyqtady. Sondaı-aq, ólketaný mýzeıindegi tarıhı jádigerlermen tanysyp, Qazaqstan Respýblıkasynyń Tuńǵysh Prezıdenti atyndaǵy saıabaqta serýen qurdy.  

Taldyqorǵannan – Kúmisjan BAIJAN.

Elbasynyń Jańa jyldyq shyrsha­sy­na jer-jerden áleýmettik jaǵynan jetkiliksiz qamtylǵan otbasy­laryn­daǵy ozat oqýshylar qatysty. Bıik, ári ásem bezendirilgen shyrsha saltanaty B. Rımova atyndaǵy drama teatr ártis­teri­niń merekelik baǵdarlamasymen bas­taldy. Memleket basshysynyń balalarǵa arnaǵan aqjarqyn tilegi keń ekrannan tamashalandy. Osy qýanyshty sátti eli­mizdiń túpkir-túpkirindegi Jańa jyl­dyq shyrshany tamashalaǵandar bir mezette tyńdaýǵa múmkindik alǵany bir ǵanıbet. Elbasynyń quttyqtaýynan keıin oblys ákimi Anzar Musahanov dál qazir Elbasynyń ózderińe degen ystyq lebizin tyńdap, mereılendińder, dedi. Qaı kezde de bizge Táýelsizdikten asqan ba­qyt joq. Sender erkin eldiń ulany­syńdar. Demek, elimizdiń keleshegine úles qosatyn azamat bolýlaryń kerek. Elbasynyń ózderińniń oqyp, bilim alýlaryńa jasaǵan qamqorlyǵy zor. Básekege qabiletti bilim alyp, tárbıeli azamat bolyńdar. Balalarǵa Elbasynyń atynan oblys basshysy qystyq kıim, Jańa jyldyq bazarlyq taratty. Balalar mundaı jaq­sylyqqa alǵys aıtyp, úmitterin aqtaıtynyn jetkizdi. Aıaz Ata men Aqshaqar da keldi. Aıaz Ata jasyl shyrsha janyndaǵy dýmandy qyzdyryp, Jańa jyl – Ulý ortaǵa shaqyryldy. Ulý jyly tek jaqsylyq bolatynyn jetkizdi. Án aıtylyp, bı bılenip, bazarlyqqa kenelgender ánnen shashý shashty. Sport kesheninde budan soń Elbasy shyrshasyn Taldyqorǵan qalasyndaǵy ozat oqýshylar jalǵastyryp áketti. Bazarlyq alǵandar «Elbasyna alǵys aıtamyz, oqýda ozat, táýelsiz eldiń nurly bolashaǵyna úles qosamyz» degen kóńil-kúımen mereke shyraıyn kirgizdi.  

Shymkentten – Baqtııar TAIJAN.

Balalardyń Jańa jyldyq tama­sha­sy – Prezıdent shyrshasyna arnalǵan saltanat elimizdegi bir partııanyń oblystyq fılıalynda ótti. Ortada – shyrsha. Oblys ákimi Asqar Myr­zah­metov bir búldirshindi kóterip baryp, shyraǵdanyn jaqty. Sodan keıin-aq Jańa jyl qyzyǵy bastalyp ketken. Aıaz Ata, Aqshaqar, ertegiler elinen kelgen keıipkerler keń zaldy dýmanǵa bóledi. Úlken ekrannan Elbasynyń quttyq­taýy tyńdaldy. Daryndy balalarǵa syılyqtar tapsyryldy. – Sizderdiń bilimdi, bıik parasatty azamat bolyp ósip, álemde básekege qabiletti bolyp jetilýlerińizge memleket kóptegen ıgilikter atqarýda, –dedi oblys ákimi Asqar Myrzahmetov. – Oblysymyzda elimiz táýelsizdik alǵan 20 jyldyń ishinde 225 mekteptiń qurylysy salynyp, paıdalanýǵa berildi. Oblysta 2005 jyly mektepke deıingi uıymdardyń sany 117 bolsa, 2011 jyly qorytyndysymen jalpy 88425 balany qamtıtyn 904 mektepke deıingi uıymdar jumys isteýde. Memleket aldynda turǵan aýqymdy mindetterdi aldaǵy ýaqytta júzege asyrý jas urpaqqa júktelip, úlken úmit artylyp otyr. Sondyqtan da jaqsy oqyp, básekege qabiletti bolý úshin tereń bilim alyńyzdar. Táýelsizdikti qasterleı biletin, óz Otanyn janyndaı súıetin elimizdiń naǵyz patrıoty bolyp ósińizder. Bizdiń jasampaz elimizge eńsesi bıik, óresi keń, deni saý, kemeldengen aqyl-oıly, parasatty jastar qajet. Sizderdiń árqaısyńyzdyń osyndaı azamat bolatyndaryńyzǵa senimim mol, dedi oblys basshysy sóziniń túıininde.