Bıylǵy jyl Qalıbek Qýanyshbaev atyndaǵy Qazaq mýzykalyq drama teatry úshin de tabysty jyl boldy. Prezıdenttiń sheshimimen bul óner ordasyna akademııalyq teatr mártebesi berildi. Táýelsizdiktiń tól qurdasy Qallekı teatrynyń ujymy, osynaý az jyldardyń ishinde kóptegen jetistikterge qol jetkizdi.
Teatr tarıhy 1991 jyldyń 15 qarashasynda Jaqyp Omarov sahnalaǵan Ǵ.Músirepovtiń «Aqan seri – Aqtoqty» qoıylymynan bastaldy desem, óner ujymy osy az ǵana jyldyń ishinde kóptegen belesterdi baǵyndyryp úlgerdi.
Táýelsizdik merekesi qarsańynda ǵana akademııalyq mártebege ıe bolǵan Q.Qýanyshbaev atyndaǵy mýzykalyq drama teatry osy jańa jyl qarsańynda taǵy bir qýanyshqa kýá boldy. Teatrdyń úsh birdeı ártisi Meıram Qaısanov, Núrken О́teýilov, Altynaı Nógerbek Qazaqstannyń eńbek sińirgen qaıratkeri ataǵyn alsa, Gúljan Áspetova «Qurmet» ordenimen marapattaldy. Al endi osy qos qýanyshqa oraı, óner ujymynyń belsendi ókilderine sóz kezegin berelik.
Jumagúl QÝANYShBEKQYZY, «Egemen Qazaqstan».
* * *
Tilektes MEIRAMOV, Qazaqstannyń halyq ártisi: Qanshama jyldan beri osy ónerdiń qazanynda qaınap kelemiz. Kezinde J.Omarov irgetasyn qalaǵan, Ázekeńder qoltańbasyn qaldyrǵan bul kıeli shańyraqqa akademııalyq mártebe berilýi zańdylyq dep bilemin. Elbasymyzǵa, ártisterdiń ár qadamyn qadaǵalap, ónerine baǵa berip otyrǵan qala ákimi Imanǵalı Tasmaǵambetovke aıtar alǵysymyz sheksiz. Mádenıet mınıstri M.Qul-Muhammed myrza da mádenıetimiz ben ónerimizdiń damý jolynda aıanbaı eńbek etip kele jatqan jandardyń biri. Sondaı-aq, 3 jyldan beri teatrymyzdyń mártebesin kóterýge janyn salyp qyzmet etip kele jatqan Erkin Jýasbekke de myń alǵys.* * *
Gúljan ÁSPETOVA, Qazaqstannyń halyq ártisi: Eńbegiń elenip, halyqtyń baǵasyn alyp jatqanyna ne jetsin. 20 jyldyq tarıhy bar osynaý óner ordasynyń osyndaı mártebege ıe bolýy búkil qazaq halqynyń qýanyshy dep bilemin. Iá, bul osy teatr ujymynyń kúndiz-túni tókken mańdaı teriniń aqysy.* * *
Leılo Beknazar-HANINGA, Qazaqstannyń eńbek sińirgen qaıratkeri, professor: Halyq qaharmany Á.Mámbetov osynda kelgende, biz de joldasym ekeýmiz ol kisimen birge kelgenbiz. Odan beri de 12 jyl ótti. Ázekeń teatrdyń osy mártebege ıe bolatynyna nyq senetin. Táýbe, teatr bıik deńgeıge kóterildi. Dúnıejúzilik, halyqaralyq konkýrstarǵa qatysyp, úlken oljalarǵa ıe boldy. Sońǵy 3 jylda teatrymyzdy teatr synshysy E.Jýasbek basqaryp otyr. Osyndaı óner adamynyń basqarýynan keıin teatr óziniń ekinshi tynysyn ashqandaı boldy. Árbir qoıylǵan spektaklge, árbir oınalǵan obrazǵa analız jasalynýy, talqylanýy ujymdy jańa izdeniske jetelep otyr. Endi kórermen mol sııatyn teatr ǵımaraty bolsa, ujymnyń joǵy túgendeler edi degen oıymdy da osy qýanysh ústinde jasyrǵym kelmeıdi.* * *
Bolat UZAQOV, rejısser, Qazaqstannyń eńbek sińirgen qaıratkeri: Biz úlken qýanyshtyń ústinde otyrmyz. Akademııalyq mártebe jyl saıyn nemese 10 jylda bir berip otyratyn ataq emes. Bul 50 jylda, 70 jylda jetetin dáreje. Qazaqstan Táýelsizdigimen birge ósip kele jatqan teatrymyz úshin bul úlken baǵa! Shynaıy kózqaraspen qaraǵanda, teatrdyń osy dárejege laıyq bolýynda shyǵar. Respýblıkalyq, halyqaralyq festıvaldarda joǵary júldelerge ıe bolyp júrgeni ujymnyń múmkindigi óte joǵary ekenin kórsetedi. Teatrdaǵy aǵa býynnan bastap, orta býyn jastar Astanamen birge ósip-ónip jatyr. Osynyń aıqyn aıǵaǵy úsh ártisimizdiń Qazaqstannyń eńbek sińirgen qaıratkeri ataǵyn alýy der edim. Iá, aıtsa aıtqanda ı, táýelsiz elimizben birge ósip-órkendep kele jatqan astanalyq teatrdyń qol jetkizgen bıigi az emes. Áıtse de akademııalyq degen ataǵyna saı alar asýy, shyǵar bıigi alda dep bilemiz. Láıim, solaı bolǵaı!
