Eńseli meshit el ıgiligi úshin

Ulan aýdanynyń or­ta­lyǵy  – Qasym Qaı­se­nov atyndaǵy kentte el esinde qalatyndaı eleýli oqıǵa boldy. Osy aýdannyń týmasy, aýǵan soǵysynyń ardageri, taıaýda ǵana kásipkerlikti damytýǵa qosqan erekshe úlesi úshin «Qurmet» ordenimen marapattalǵan, aldyńǵy jyly Elbasynyń qolynan «Paryz» syılyǵyn alǵan Qaırat Mýsın óz qarjysyna soqqan, ishine 500 adam erkin syıatyn eńseli meshitti jerlesterine syıǵa tartty. Oblys ákimi Berdibek Saparbaevtyń bastamasy­men osydan eki jyl buryn «Týǵan elge – taǵzym» ak­sııa­sy júzege asa bastaǵan. Onyń maqsaty – jergilikti jerden shyqqan qaltaly azamattardy kindik qany tam­ǵan ólkege bastaryn bu­ryp, mektep, balabaqsha, sport keshenderi men meshitterdi óz qarjylaryna salǵyzý bolatyn. Sonyń naqty dáleli emes pe, eki jylda óńir bas­shy­synyń bastamasyna ún qos­qan elýge tarta azamat jer­lesteriniń alǵysyna bólendi. Endi, mine, Ulandaǵy eńseli meshit el ıgiligine aınaldy. Meshittiń ashylýyna óńir basshysy B.Saparbaev, Aýǵan­standa Q.Mýsınniń komandıri bolǵan elimizdiń birtýar aza­ma­ty, «Halyq Qaharmany» Ba­qytjan Ertaev, Shymkent, Taraz, Semeı, basqa qalalardan kásipkerdiń  dostary arnaıy keldi, qýanyshtaryn birge bólisti. «Qaırat sııaqty eliniń keleshegin oılaǵan azamattarǵa alǵystan basqa aıtarymyz joq. Ol budan buryndary da sport, mádenıet saıystaryna demeýshilik jasaıtyn. Búgin quny 200 mıllıon teńgeden asatyn meshitti jerlesterine syılap tur», dedi óńir bas­shysy. «Qaırat men basqarǵan batalonda erlikpen shaı­qas­ty. Qazir onyń omy­raý­yn­da jıyrmadan astam jaý­yngerlik nagradalar bar. Jaqynda Elbasynyń Jar­ly­ǵymen «Qurmet» ordenimen marapattaldy. Biz Aýǵan soǵysynyń ardagerleri aty­nan Qaıratqa aqboz at syı­laımyz», dep B.Ertaev ká­sip­kerdiń ıyǵyna shapan jaý­yp, tulparǵa  mingizdi. Ońdasyn ELÝBAI. Shyǵys Qazaqstan oblysy.