Komıtet tóraıymy, memleket jáne qoǵam qaıratkeri Birǵanym Áıtimova Joldaýda belgilengen mereıli mindetterdi júzege asyrý barysyndaǵy bar jumysqa ishteı daıyn bolyp, tastúıin jumylǵan el yntymaǵyna rızashylyǵyn bildire kele, birlik bar jerde halyqtyń mindet údesinen shyǵatyndyǵyna zor senimmen tolaıym tabys tiledi.
– Biz oblysta eki keńeıtilgen kóshpeli májilis ótkizýdi uıǵaryp otyrmyz, – dedi B.Áıtimova, – halyqpen júzdesýlerdiń taqyryby ártúrli bolǵanymen, saıyp kelgende ishki mazmundyq negizi bir arnada toǵysyp jatyr. Bul – Elbasy Joldaýynyń mazmunyn halyqqa jetkizip, negizgi mindetterdiń aýqymyn saralaý.
Elbasynyń Joldaýy qyrýar eńbekpen, mańdaı termen kelgen jetistikterdi qoryta kele, keler kúnniń kókjıegine nyq senimmen attap, bolashaqty baıandy etýge baǵyttaıdy. Joldaýda: «Bizdiń strategııalyq maqsatymyz 2050 jylǵa qaraı álemdegi ozyq otyz eldiń qataryna qosylý» degen jolbastar pikirler jaı aıtylyp otyrǵan joq. Aldymyzǵa maqsat qoıǵannan keıin, boıymyzdaǵy bar qajyr-qaırat, kúsh-qýatymyzdy jumyldyryp, biz sol bıikke jetemiz. Oǵan halqymyzdyń qaıyspas rýhy, ishki qýaty tolyǵynan jetedi. Elbasynyń Joldaýy osyndaı el eńsesin kóteretin ulyq sózdi aıtyp otyr.
Komıtet tóraıymy óz sózin táýelsiz elimizdiń beıbitshilik súıgish saıasatymen, el ishiniń yntymaq-yrysymen, turaqty damýyna qatysty pikirimen órbitti. Elge 300 mıllıard AQSh dollary kólemindegi ınvestısııa tartylyp otyr. Bul qarjy ǵana emes, eldiń abyroıy, oǵan degen senim men halyqaralyq moıyndaý deseńiz de bolar.
Shırek ǵasyrdan endi asqan jas memleket alǵa qaraı senimdi, nyq qadam jasaýda. Jańa Joldaýdaǵy alty bólim osy maqsattardy kózdeıdi. Jalǵyz kózdeý ǵana emes, oǵan jetý joldaryn da qolmen qoıǵandaı etip kórsetip beredi. Senat komıtetiniń tóraıymy aldaǵy ýaqytta eń tómengi jalaqy mólsheri 1,5 ese ósetindigin, bilim berý men densaýlyq saqtaý qyzmetiniń sapasy jaqsaratynyn alǵa tartty. Sondaı-aq Joldaýdyń árkimnen zaman aǵymyna saı bolý kerektigin de talap etetindigin túsindirip ótti.
Kóshpeli májiliste sóz sóılegen Senat depýtattary da Elbasy Joldaýynyń mán-mańyzyna tereńdeı boılap, jan-jaqty toqtaldy. Jınalǵan qaýym Áleýmettik-mádenı damý jáne ǵylym komıtetiniń hatshysy Serik Bekturǵanovtyń 1 mıllıon 300 myń adamnyń eń tómengi jalaqy alyp kelgendigin, endigi jerde shamamen 600 myń adamnyń jaǵdaıy jaqsaratyny týraly aıtqan sózin jyly qabyldady. Bul jerde taǵy bir el eńsesin kóterýge septigin tıgizetin jaı bar. Ony da ashyp aıtýymyz kerek. Eń tómengi jalaqydan salyq ustalmaıdy. О́zge kategorııalar boıynsha da jalaqy kólemin arttyrý úrdisi jalǵasa bermek. Osy arada qaıtarym nátıjesi de baqylaýda bolatyndyǵyn aıta ketken jón. Serik Bekturǵanov keltirgen derekterdi saralaıtyn bolsaq, adam densaýlyǵynyń on prosenti ǵana medısınalyq qyzmetterge táýeldi, qalǵany óziniń ómir súrý daǵdysyna baılanysty. Bıylǵy Joldaýda bul jaı atap kórsetilgen. Sondyqtan, azamattardyń jeke jaýapkershiligi degen máseleni umytpaǵan jón.
Komıtet músheleri Baqyt Jumaǵulov, Murat Baqtııaruly, Dınar Nóketaevalar Joldaýdyń jyldaǵy merzimnen erterek jasalýy ondaǵy mindetterdi oryndaýǵa negiz bolatyn bıýdjetti qalyptastyrý úrdisine baılanysty ekendigin jáne onyń qaıtarymy únemi baqylaýda bolatyndyǵyn, búgingi kúni el turǵyndarynyń 72,5 paıyzynyń ómir jaǵdaıy jaqsarǵandyǵyn, ustaz mártebesi týraly zańnyń mańyzdylyǵyn, «Jastar jylyn» jarııalaýdyń mánin, agroónerkásiptegi kooperatıvtik qozǵalys pen qaıta óńdeý salasyn, jalpy básekelestiktiń mazmunyn túsindirýge baǵyttaldy. Osy oraıda, jergilikti kásipker Valerıı Sımchýk Aqkól aýdanynda Jalpyǵa Ortaq Eńbek Qoǵamyn qalyptastyrýdaǵy ıgi bastamalardyń júzege asyrylyp jatqandyǵy týraly baıandap berdi. Oblystyq máslıhattyń depýtaty retinde osy máselege oraı óziniń de qanshalyqty eńbek sińirip otyrǵandyǵy týraly málimdedi. Aýdan ákimi Temirjan Edigenovtiń, oblystyq atqarýshy organdardyń Parlament Senat depýtattarynyń suraqtaryna tolymdy jaýap qaıtarýy da Joldaýda keńinen oryn alǵan mindetterdiń tap-tuınaqtaı oryndalatynyna zor senim qalyptastyrady.
Senatorlar osy kezdesýden keıin Aqkól men Bulandy aýdandarynyń eńbek ujymdarynda halyqpen júzdesip, jergilikti jerde atqarylyp jatqan ıgi isterdiń barysymen tanysty.
Baıqal BAIÁDIL,
«Egemen Qazaqstan»
Aqmola oblysy
