«Nurly jer» baǵdarlamasy boıynsha Turǵyn úı qurylys jınaq banki arqyly salynyp jatqan nysandar týraly aqparatty baspana.kz portalynan tolyq bilýge bolady. Qoljetimdi turǵyn úıden úmitker jeke kabınetine kirip, ózi páter alǵysy keletin nysandy tańdap, unaǵan páterdi kórsetip, turǵyn úı satyp alýshylar pýlyna qatysý úshin ótinish beredi.
Sol sııaqty Turǵyn úı qurylys jınaq banki salymshylary memlekettik baǵdarlamalardan bólek «О́z úıim» atty banktiń jeke baǵdarlamasy boıynsha, sondaı-aq úlestik qurylysqa qatysý arqyly baspana satyp ala alady.
Qazir Turǵyn úı qurylys jınaq bankinde 1,2 mıllıonnan astam shot bar. Jyl basynan beri 285 197 jańa depozıt ashylǵan. Barlyq qazaqstandyqtardyń arasynda úıge dep aqsha jınaýda almatylyq salymshylar eń belsendi bolyp tur. Statıstıkaǵa sáıkes, árbir 10-shy almatylyqta Turǵyn úı qurylys jınaq bankinde salym bar. Almaty boıynsha barlyǵy 169 000 depozıt tirkelgen. Osy ýaqytqa deıin 25 myńnan astam adam Turǵyn úı qurylys jınaq banki arqyly Almaty qalasynan úı alǵan. Jyl basynan beri Almaty qalalyq fılıal qyzmetkerleri úı alýǵa dep 4 000 myńdaı zaem resimdedi.
Aınash ESALI,
«Egemen Qazaqstan»
ALMATY
