SELDIŃ QAÝPIN SEIILTÝ ShARALARY JÚRGIZILÝDE

Qańtardyń sońǵy kúnderindegi jańbyr men qardyń mol túsýi óńirde ylǵaldyń shamadan tys jınalýyna ákeldi. Oǵan aqpandaǵy aýa raıynyń kúrt jylynýy men jyly jańbyrdyń áseri qosylyp, kóptegen aımaqtarda sel qaýpin týǵyzyp, ábigerge saldy.Qazirgi kezde Panfılov aýdanyndaǵy Qyryqqudyq, Ile aýdanyndaǵy Aqshı, Uıǵyr aýdanyndaǵy Shonjy, Jambyl aýdanyndaǵy Uzynaǵash, Tarǵap, Eskeldi aýdany jáne Qapshaǵaı qalalaryndaǵy oıpań jerge ornalasqan turǵyn úılerdi, kósheni sý basyp, jedel kómek qajettigin kórsetti. Osyǵan oraı oblys ákimdigi men tótenshe jaǵdaılar jónindegi departament qyzmetkerleri, áskerıler turǵyndardyń qystyń kózi qyraýda japa shekpeý shara­laryn qarastyryp, qajetti tehnıka túr­lerin jumyldyrýda. Sondaı-aq, halyqty qaýipsiz jerge kóshirý, ornalastyrý jumys­tary da uıymdastyrylǵan. Panfılov aýdanyndaǵy Qyryqqudyq aýylyndaǵy otbasylary ýaqytsha qonaqúı­lerge ornalastyrylsa, Uıǵyr aýdanyndaǵy Qalǵantam jáne Uzyntań eldi meken­derindegi kópirlerdi qalpyna keltirý jumystary qolǵa alynyp, adam kúshi, tehnıka jumys isteýde. Tarǵap aýylyndaǵy 40-tan astam otbasy qaýipsiz jerge kóshirilse, temir jol beketteriniń boıyn­daǵy halyqtyń da qaýipsizdigin qamtamasyz etý maqsatyndaǵy jumys jalǵasýda. Jaǵdaı Kúrti sý qoımasynyń tómengi saǵasyna ornalasqan Aqshı aýylynda kúr­deli. Mundaǵy 6 000 adam qaýipsiz aımaq­tarǵa kóshirilgen. Oblys ákiminiń oryn­basary Bolat Tákenov pen Ile aýdany­nyń ákimi Nıkolaı Logýtov basqarǵan komıssııa músheleri turǵyndardyń otbasylary men mal-múlkin seldiń shaıyp ketpeýi úshin platınadaǵy sýdy birneshe kompressorlar arqyly arnasyna jetkizbeı aǵyzýdy jal­ǵas­tyrýda. Seldiń aldyn alý sharalary­na 20 tehnıka, júzden astam adam kúshi jumyl­dyrylyp, tótenshe jaǵdaı jarııalanǵan. Jaǵdaı áli de qaýipti qalpynda qalyp otyr. Buǵan aýa raıynyń kúrt jylynyp, jań­byrdyń jıileýi qosylsa, qaýipti seıilt­peıtini aıtpasa da túsinikti. Demek, turǵyn­dardyń úılerine oralýyna áli erte. Al, komıssııa músheleri túngi, kúndizgi kezekshilikti uıymdastyryp, qaýipsizdik sharalarynyń aldyn alyp, bar múmkindikti jumyldyrýda. Kúmisjan BAIJAN, Almaty oblysy.