Onda 5 jastaǵy balalardyń mektepaldy daıarlyǵy mektepke deıingi bilim berý uıymdarynyń sanatyna jatatyndyǵy, al 5 jastaǵy nóldik synyp jalpy bilim beretin uıymdar sanatyna jatpaıtyndyǵy kórsetilgen. Bul «Bilim týraly» zańnyń talaptaryna saı kelmeıtindikten, osy nóldik synyptardyń baǵdarlamalary mektepterde qalaı júzege asyrylyp jatqany týraly suraqtar týyndaǵan bolatyn.
Úkimettiń bizdiń depýtattyq saýalymyzǵa 2017 jylǵy 20 qazanda bergen jaýabynda: «Búgingi kúni 12 jyldyq bilim berýdi engizýdiń naqty qurylymy men algorıtmi túpkilikti anyqtalǵan joq jáne qaralý satysynda... 12 jyldyq bilim berýge kóshý algorıtmin 2017-2018 oqý jylyndaǵy synaq qorytyndylary boıynsha jáne túpkilikti sheshim qabyldaý úshin barlyq tásilderdi pedagogıkalyq jáne ata-analar qoǵamdastyǵymen aldyn ala keńinen talqylaý júrgizý josparlanýda» delingen.
Prezıdent N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda qoıylǵan mindetterdi iske asyrý aıasynda bilim berý sapasyn halyqaralyq standarttarǵa sáıkes túbegeıli jaqsartý kerektigine basa nazar aýdarǵan. Osyǵan oraı jáne atalǵan synaqtyń nátıjeleri men qorytyndylary týraly jarııalylyqtyń joqtyǵy, sondaı-aq osy máselege bilim salasy mamandarynyń ártúrli kózqarastary birqatar saýaldar týǵyzyp otyr. Atap aıtqanda:
1. Búgingi kúni 5 jasar balalarǵa arnalǵan nóldik synyptar mektepterde jáne mektepke deıingi bilim berý uıymdarynda jumys isteýde. Eger mektepterge engizilgen nóldik synyp jalpy bilim beretin uıymdardyń sanatyna jatpaıtyn bolsa, onda nóldik synyptyń memlekettik standarttary, baǵdarlamalary qalaı bekitilip jatyr?
2. Nóldik synypta oqıtyn balalardyń oqý-ádistemelik quraldary qandaı qarjy kózinen qarjylandyrylyp jatyr, álde ata-analar esebinen be?
3. Mektepterde nóldik synyptardyń sabaqtaryn muǵalim-pedagog júrgizetin bolsa, balabaqshalarda tárbıeshiler júrgizedi. Sonda balabaqshadaǵy jáne mekteptegi nóldik synyptarda oqyǵan balalardyń mektepke daıarlyq deńgeıi qandaı bolmaq, oǵan qandaıda bir taldaý jasaldy ma?
Bilim jáne ǵylym mınıstrliginiń ustanymy boıynsha 12 jyldyq oqytýǵa kóshý nóldik synypty engizý arqyly júzege asyrylmaqshy. Demek 5 jastaǵy balalardyń mektepaldy daıarlyǵy shyn máninde 12 jyldyqqa kóshýdiń birinshi synyby bolyp tabylady.
О́kinishke qaraı, qazir mektepaldy daıarlyq pen bastaýysh mekteptiń úlgilik baǵdarlamasynyń arasyndaǵy sabaqtastyqtyń tujyrymdamalyq negiziniń álsizdigi, 12 jyldyq bilim berýdiń jańartylǵan mazmuny jurtshylyqtyń túsinýine qıynshylyqtar týǵyzyp otyr. Osynyń negizinde, Biz Úkimet basshysyna mynadaı usynystar jasadyq:
1) Bilim jáne ǵylym mınıstrligi usynǵan 12 jyldyq oqytýǵa kóshýdiń 0+11 qurylymdyq shemasyn qoldanystaǵy «Bilim týraly» zańnyń talaptaryna sáıkestendirý;
2) 12 jyldyq bilim berýge kóshýdiń naqty algorıtmi týraly pedagogtar men ata-analar arasynda jan-jaqty túsindirý jumystaryn júrgizý.
Ábdimanap BEKTURǴANOV,
Májilis depýtaty
