Bul baǵytta qoldanystaǵy zańnamaǵa sáıkes atqarylǵan jumystar da barshylyq. Degenmen shekaralyq aımaqtarda ornalasqan halyqtyń áleýmettik jaǵdaıyn jaqsartý maqsatyndaǵy birqatar mańyzdy máseleler óz sheshimin kútýde.
Osyǵan qatysty bir jyl buryn Parlament Senatynyń depýtattary Úkimet basshysyna saýal joldaǵan.
Búgin Shyǵys Qazaqstan oblysynyń shekara mańynda ornalasqan Kúrshim jáne Katonqaraǵaı aýdandaryndaǵy eldi mekenderde mektepterdiń jabylýy sebebine nazar aýdarǵymyz keledi. Reseımen 245, Qytaı Halyq Respýblıkasymen 45 shaqyrym boıy shektesetin Katonqaraǵaı aýdany halqynyń sany sońǵy 20 jylda 29 myńǵa azaıǵan, 6 aýyl eldi meken mártebesinen aıyrylǵan, 48 eldi mekenniń 17-sinde uıaly telefon baılanysy joq, sapaly ınternet jelisi tek aýdan ortalyǵynda ǵana jumys isteýde. Osy merzim ishinde oqýshy sany 9261-den 3518 balaǵa deıin azaıyp, 15 mektep jabylǵan. Qytaımen 300 shaqyrymdaı shektesetin Kúrshim aýdanyndaǵy jaǵdaı da osyǵan qaraılas. Shekara mańyn ıesiz mekenge aınaldyrýdy toqtatý sharalaryn jedeldetý, eldi mekenderdi nyǵaıtyp, kóptep qonystandyrý strategııalyq mańyzy bar másele bolyp otyr.
Búgingi tańda shekara shebinde qalyptasqan úderiske tereń mán bere otyryp, Senattyń Halyqaralyq qatynastar, qorǵanys jáne qaýipsizdik komıteti jýyrda Kúrshim aýdanynda ótken kóshpeli otyrysta osyndaı shekaralyq aımaqtarǵa tán túıindi máseleler qatarynda qysqartylyp jatqan mektepter jaıyn da qozǵady. Mektep sanyn qysqartý týraly másele jalpy shekara aımaǵyndaǵy problemalardy keshendi túrde sheshý arqyly qarastyrylǵany durys dep sanaımyz.
Bul baǵytta ShQO basshylyǵy arnaıy jospar jasap Úkimetke birqatar usynystaryn joldaǵany málim. Bilim jáne ǵylym mınıstrligi tarapynan bilim berý uıymdary jelisiniń normatıvine negizgi jáne orta mektepterdiń qyzmet etýi úshin normany tómendetýge qatysty ózgerister engizýdi, Úkimettiń 2013 jylǵy 29 qarashadaǵy №1289 qaýlysymen bekitilgen Qazaqstan Respýblıkasynyń shekara mańyndaǵy aýdandaryn damytý jónindegi 2014-2020 jyldarǵa arnalǵan sharalar kesheni aıasynda mektepterdi qoldaý, olardyń jabylýyn toqtatýǵa baǵyttalǵan sharalar qarastyrylyp, ońtaıly sheshimder qabyldanýyn usynyp, biz Úkimet basshysynyń atyna depýtattyq saýal joldadyq. Sonymen qatar Elbasynyń kezekti Joldaýynda bergen tapsyrmalaryn oryndaý maqsatynda, shekara aımaǵyndaǵy mektepter máselesi eldi mekenderdi damytý josparlarymen ushtastyrylyp, jańadan ázirlenetin «О́ńirlerdi damytýdyń 2025 jylǵa deıingi pragmatıkalyq baǵdarlamasynda» jáne elimizdiń 2030 jylǵa deıingi aýmaqtyq-keńistiktik damýynyń boljamdy shemasynda arnaıy sharalar kesheni retinde erekshe oryn alýy qajet dep sanaımyz.
Dúısenǵazy MÝSIN,
Senat depýtaty
