Kelýshiler aldymen qazaqtyń ulttyq kıimi men qolóneriniń, sýretshiler shyǵarmasynyń kórmesin tamashalady. Aty aıtyp turǵandaı, qoǵamdyq kelisim men jalpyulttyq birliktiń qazaqstandyq úlgisin nasıhattaýǵa arnalǵan respýblıkalyq lektorııdiń maqsaty – «Rýhanı jańǵyrý» baǵdarlamasyn jáne «Qazaqtaný» jobasyn iske asyrý aıasynda Qazaqstan halqy Assambleıasy qyzmetiniń baǵyttaryn talqylaý, óńirlik deńgeıde QHA-nyń praktıkalyq mindetterin belgileý bolatyn. Oǵan Qazaqstan halqy Assambleıasy Tóraǵasynyń orynbasary, «lituanica» qoǵamdyq birlestiginiń tóraǵasy Vıtalıı Tvarıonas, oblys ákiminiń orynbasary Marat Júndibaev, ǵalymdar men qoǵamdyq birlestikter, uıymdar, zııaly qaýym ókilderi qatysty. Osy lektorııde eldiń eldigin, halyqtyń birligin nyǵaıtatyn, keler urpaqqa mura etip qaldyratyn eki másele talqylandy. Onyń biri – «Qazaqtaný» jobasy tóńireginde aıtylǵan máseleler.
– «Qazaqtaný» jobasynyń maqsaty – qazaq etnografııasyn taný, halqymyzdyń dástúri, ádebıeti, mádenıeti, fılosofııasy týraly elimizdegi túrli etnostarǵa tereń aqparattar berý bolyp tabylady. Onyń syrtynda bul jobanyń etnosaralyq qarym-qatynastar, kóshi-qon máselesi, qazaq dástúrlerin saqtaý, ony jańǵyrtý sekildi ishki baǵyttary da tolyp jatyr. Lektorııde kóshi-qon, etnosaralyq máselelerdi qamtydyq. Adamdarǵa halyqtyq dástúrlerimizdiń túp-tamyrynan qol úzip qalmaýymyzdy túsindirdik. Osyndaı máseleler Qazaqstandy otanym deıtin adamdardyń barlyǵyn oılantýy tıis, – dedi tarıh ǵylymdarynyń doktory, professor Jambyl Artyqbaev.
Lektorııge ekinshi arqaý bolǵan taqyryp «Dástúrli qazaq qoǵamyndaǵy medıasııa» atty másele edi. Medıasııa da halqymyzdyń bir qundylyǵy dep aıtýǵa bolady. Keıde bir aýyldy bir aqsaqaldyń bıleýi, úlkenge qurmet, kishige izet kórsetý, árkimniń óz orny bolýy tıis degen sııaqty dalanyń jazylmaǵan zańdarynyń izi kómeskilengendeı bolady.
Sharaǵa jınalǵandar Rýdnyı, Lısakov qalalary jáne Qarabalyq aýdandarynda bolyp, turǵyndarmen kezdesti.
Názıra JÁRIMBET,
«Egemen Qazaqstan»
Qostanaı
