«Rýhanı jańǵyrý» baǵdarlamasy aıasynda ótken mádenı sharaǵa halyq ártisi, T.Júrgenov atyndaǵy Qazaq ulttyq óner akademııasy estradalyq vokal kafedrasynyń meńgerýshisi, professor Lakı Kesoglý, Qazaqstannyń eńbek sińirgen qaıratkeri, Memlekettik respýblıkalyq koreı mýzykalyq komedııa teatrynyń dırektory Lıýbov Nı jáne de basqa mádenıet, óner qaıratkerleri qatysyp, el damýyndaǵy jastardyń róline qatysty mazmundy pikirlerimen bólisti.
Ýchılıshe dırektory, Qazaqstannyń eńbek sińirgen qaıratkeri Aıa Qalıeva búginde Qazaqstannyń bolashaǵy, damýy, qundylyqtary, ekonomıkasynyń ósýi, saıası-qoǵamdyq ómiri jastarmen tyǵyz baılanysty ekendigine toqtalyp, jastarǵa qoldaý kórsetý – el damýynyń ınvestısııasy ekenin atap ótti. El Táýelsizdiginiń alǵashqy jyldarynan bastap jastardyń áleýmettenýi Elbasynyń nazarynda bolyp keledi. Respýblıkanyń áleýmettik-ekonomıkalyq jáne mádenı damýyndaǵy jastardyń keleshegine, bilim alýy men damýyna, belsendi eńbegine qamqorlyq erekshe.
Ýchılısheniń bolashaǵy da jastardyń ómirimen tyǵyz baılanysty. Atalǵan oqý ornynda bı óneriniń damýy, saqtalýy men nasıhattalýy jolynda jastardy kóptep tartýǵa basymdyq berilgen. Sonymen qatar básekege qabiletti balet ártisterin tárbıeleý maqsatynda, qazaq baletin álemde nasıhattaýǵa baılanysty «Jahandaǵy zamanaýı qazaqstandyq mádenıet» jobasy aıasynda kóptegen jumystar jolǵa qoıylǵan. Bul baǵytta kórnekti qazaq bıshisi Ramazan Bapovtyń shyǵarmashylyǵyna arnalǵan «Ramazan Bapov. Tanes dlınoıý v jızn», qazaq bıshisi, baletmeıster Sara Kósherbaevanyń ómiri men shyǵarmashylyǵy týraly «Balerına» kitaby jaryq kórgendigin aıta ketken jón.
Al ýchılıshe túlegi Anvara Sadykovanyń «Turan dala – qyran dala» horeografııasyn mysalǵa alǵan ýchılıshe dırektory, bul qoıylymnyń ón boıynda bútin bir ulttyń qalyptasýy, batyrlyǵy, otansúıgishtigi men qazaq halqynyń óz eline degen súıispenshiligi jatqandyǵyn atap ótti. Ottyń jalyny, qalyqtaǵan aýa, sýdyń syldyry, jerdiń qýaty kórinis beretin balet «Turan» folklorlyq-etnografııalyq ansambliniń mýzykasymen áser arta túsip, erekshe izdenistegi qoıylym retinde baǵalandy. Lıbrettosyn jas baletmeıster Damır Orazymbetov jazsa, kostıýmderdiń avtory qazaqstandyq belgili dızaıner Ásel Luqpanova men ssenograf Erbol Bısenovtyń shyǵarmashylyq eńbegi zor.
Shyǵarmashylyq kezdesý aıasynda otansúıgishtik, el men jerge degen súıispenshilik, ulttyq salt-dástúrge qurmet, jahandaný zamanynda rýhanı qundylyqtardy saqtap qalýǵa baılanysty mazmundy oılar aıtyldy.
Jas ártister ustazdarynyń pikirlerin tyńdap, ózderin tolǵandyrǵan suraqtarǵa jaýap aldy.
Elvıra Serikqyzy,
«Egemen Qazaqstan»
ALMATY
